-
102 شارع مصطفى النحاس
-
أثاث ومستلزمات منزل
-
Waleed Abuarab
ناس كثير ما عندهاش فكرة منين ممكن تشتري أو تفصل مطبخ
أو دواليب ملابس أو دواليب حمامات. الطبيعي في الظروف دي أننا بـ نستخدم قاعدة
“اللي يسأل ما يتوهش” وبـ نرجع لأهل الخبرة ونوصل لأحسن عرض ممكن من حيث
الخامات والموديلات والأسعار، طبعًا مش بـ ننصحك تستغنى عن القاعدة دي لكن هـ نحاول
نعرض تجربة في مجال الأثاث وبالتحديد المطابخ وتصميماتها اللي بـ تشهد طفرة نوعية
في آخر كام سنة، وأهو تضيف اسم «وايت هاوس – White House» لقائمة المحلات اللي ممكن تزورها
وأنت بـ تستعد لتجهيز بيتك الجديد أو بـ تدور على أفكار جديدة تغير بها شكل بيتك
الحالي.
معرض موجود في شارع مصطفى النحاس في مدينة نصر، هـ تطلع
كام درجة سلم قبل ما توصل للمدخل الزجاجي، اللي هـ تشوف من خلاله وأنت بالخارج
غرفة مطبخ ملفتة جدًا يمكن وكان هو ده السبب أننا ندخل نستكشف باقي المعروضات في
المحل.
المعرض تخصصه الدقيق هو المطابخ وبـ يتم التفصيل حسب
الطلب وممكن تختار من أكثر من 1000 لون من الكتالوجات، وأنواع خشب مختلفة زي الـ MDF المستورد والأرو والكونتر زان،
سعر المتر المربع من موديلات الـ MDF
بـ يكون 1150 جنيه وهو نوع من الخشب المصنع أو غير الطبيعي وبـ يتم استيراده من
الصين، وبـ يتم استخدامه بكثرة في كل أشكال الأثاث المودرن. والأرو والكونتر بـ
1250 جنيه، وطبعًا الأسعار دي مش نهائية وتقدر تتفاوض مع المهندس صاحب المعرض
للوصول لسعر أفضل لكن ده بـ يبقى بعد الاتفاق على التفاصيل كلها والوصول لمرحلة
“مش هـ نختلف” الشهيرة.
التصميمات المعروضة كانت جذابة جدًا، وعرفنا أن الخامات
والحليات والمفصلات الحديدية والمقابض هي الأفضل والأغلى في السوق، وممكن يتم
إضافة أو تعديل أي تفصيلة من الموديلات المعروضة، زي الفتحات الخاصة بالأجهزة
المنزلية والفرن والميكرويف، وزي الأرفف السحرية في دواليب التخزين، والترابيزات
المتحركة اللي بـ تتفتح وتتقفل وتختفي داخل تفاصيل المطبخ. الألوان المستخدمة من
نوع جيد جدًا على حسب ما الموظف اللي صاحبنا في جولتنا قال لنا، وقال لنا كمان
أننا ممكن نختار أشكال وألوان معينة ونرسمها “كروكي” ومهندس التصميمات
يعملها لنا مخصوص.
كان معروض عدد من المطابخ باللون الخشبي من الموديلات
التقليدية القديمة وكانت على سبيل تعريف الزائر أنهم بـ يعملوا كل حاجة، لكن
الحقيقة كان شكلهم “نشاز” وسط التصميمات الحديثة بالألوان الأسود والفضي
والأحمر.
التسليم بـ يكون في خلال شهر من تاريخ التعاقد، لأن
التفصيل بـ يتم في مصانع الشركة، وممكن تتابع عملية التفصيل والدهان بنفسك. وطريقة
الدفع بـ تكون حسب الاتفاق، وغالبًا هـ تدفع نصف المبلغ مقدم لأن ده الشائع.
«وايت هاوس» بـ يفصل دواليب ملابس ودواليب حمام وغرف
تغيير ملابس بتصميمات عصرية، لكن أسعاره غالية شوية، وزيارة واحدة للمعرض وقعدة
طويلة مع المهندس المختص هـ توضح لك حاجات كثيرة يمكن ما ذكرناهاش في مقالنا ده.
أكتب تقييم
مقترح
معالم وسياحة
90 دقيقة من القاهرة.. أجمل 7 أماكن في الفيوم هيغيروا موودك
أجمل أماكن الفيوم الفيوم +4
تسوق
