The Definitive Guide to Living in the Capital , Cairo , Egypt

شراء احتياجات البيت أكثر من
سهولتها مافيش علشان مافيش مكان إلا وهـ تلاقي فيه خدمات من محلات وسوبرماركت بـ
تقدم لك كل الأصناف والماركات لمنتجات ست البيت اللي بـ تحتاجها في الطبخ وتحضير
الأكل، لكن لما تلاقي مكان بـ يقدم لك ده وبأعلى جودة ومن مطابخ عالمية مختلفة
يبقى الكلام هنا مختلف.

في شارع محمد مظهر في الزمالك هـ
تلاقي على اليمين وأنت ماشي «ﭬوالا للأغذية الفاخرة – Voila Luxury Food»، الشركة اللي عاملة المحل ده
سافرت بلاد كثيرة حول العالم وأصبح لها خبرة كبيرة في مجال المطابخ العالمية ومنتجاتها
وقررت تنقلها للآخرين حول العالم، وده أول خط إنتاج لها في مصر.

“ﭬوالا”
جمعت أفضل تشكيلة من ماركات الطعام والمشروبات للذواقة اللي بـ يُقدروا زيهم المنتجات
عالية الجودة، أكثر من 300 منتج فاخر غالي التكلفة بـ يستوردوه يوميًا من فرنسا، وإيطاليا،
وأسبانيا، وأمريكا، وإنجلترا، والنمارك، وسكوتلاندا، ونورواي، وألمانيا، وإيران، وروسيا،
والمجر، وأخيرًا أندونيسيا.

من المنتجات اللي ممكن تلاقيها في
“ﭬوالا”: آيس كريم  Häagen-DazsوBen & Jerry’s (59 جنيه للعلبة الحجم الكبير)، وكمان الجبنة
الفرنسية A.O.C، شاي Forté، عصائر Tropicana، باستا Fiber، كافيه Corisini، وماركات مشهورة للكافيار
والسلمون وغيرها كثير كلها معبأة بطريقة فاخرة جدًا حتى أن شكل المحل من الداخل أي
نعم صغير لكن منظم جدًا ومصنف كل حاجة وطريقة عرضه ممتازة.    

غير امتياز أنك تشتري منتجات
فاخرة من كل أنحاء العالم “ﭬوالا” عندهم خدمة توصيل طلبات للمنازل توصل لك في
نفس يوم ما طلبت، ومافيش حد أدنى للطلبات.

في رأينا أن المحل ده هـ يكون
ممتاز للمطاعم الراقية خاصة الموجودة في الفنادق عن البيوت العادية، لأننا في مصر
مش عندنا حس التذوق عالي قوي، وبـ نأكل أى حاجة أمامنا مش شرط تكون أحسن منتج، لكن
للذواقة ومحبي الأكل الفاخر والمتنقي على الفرازة.. المحل ده لكم.