The Definitive Guide to Living in the Capital , Cairo , Egypt

هاه:

هاه سألت ولا لسه؟ طب ما تجرب تسأل.. اسأل مين يا عم.. اسأل العرب.. دى مش نكتة وإنما فكرة البرنامج الشيق "اسأل العرب"، البرنامج اللى بيحاول يوصل فكرة المعلومة والمسابقات لكل العرب مش لبلد واحد بس.. واسمه باين.. اسأل العرب.. طب إيه الفكرة؟

الفكرة:

هو واحد من أكبر برامج المسابقات فى العالم العربى.. فكرته قايمة على الجمع بين المشاركين فى المسابقة والمشاهدين فى البيوت بشكل تفاعلى.. بيحقق متعة جديدة للمسابقة، وشكل يخليك حابس أنفاسك طوال الوقت وعاوز تشارك.

البرنامج بيعتمد على الاستفتاء المباشر للمشاهدين وتوجيه سلسلة من الأسئلة والاختيارات محددة للإجابة على السؤال.. ده بالنسبة للمشاهدين اللى قاعدين فى البيوت ومنزلين تطبيق البرنامج وبيقولوا احتمالات الإجابة الصحيحة.. أما بقى المتسابقين اللى قاعدين فى الستوديو فمهمتهم أنهم يخمنوا إيه أكتر إجابة صوت عليها المشاهدين وحققوا أكبر نتيجة بها.. وبيبقوا ثنائى كل اتنين فى فريق، وكل فريق بيختار من وجهة نظرة أكتر إجابة قال عليها الناس.. وكل ما كانت إجابتهم أحسن فازوا بفلوس أكتر.. وعلشان يساعوا المتنافسين فى الستوديو ممكن يستعينوا بالأمهات مثلًا وأحيانًا كمان مايا دياب المذيعة اللامعة للبرنامج بتقدم لهم تلميحات للشريحة اللى اختارت الإجابة الصح.. يعنى شباب أو طلبة جامعة أو ربات بيوت وكده، وكمان ممكن المشتركين فى بيوتهم يفوزوا لو بعتوا كتير (طبعًا دى حركة تسويق) بس بتجيب مع الناس وبيصوتوا بشكل كبير.

مايا:

مايا دياب بدأت حياتها عارضة أزياء واتشهرت بعد برنامج "ستوديو الفن" اللى شاركت فيه وحققت نجاح كبير فى فئة عرض الأزياء سنة 1996 وفازت بالجايزة الذهبية.. وانتقلت لعالم الشهرة فمثلت وغنت وانضمت لفريق الفور كاتس علشان تنفصل عنهم بعد فترة وتشتغل لوحدها، وده ما أثرش على مسيرتها لكنها كانت دايمًا بتنطلق.. وحققت نجاح كبير فى البرامج اللى قدمتها خاصة البرنامج اللى بنتكلم عنه النهارده "اسأل العرب".

الأسئلة:

فى مقالنا عن البرنامج كان لازم نتكلم عن الأسئلة اللى بجد مختلفة، هى مش فكرة معلومات عامة زى ما أنتم متوقعين.. لا هى أسئلة جديدة من نوعها.. زى مثلًا: أسوأ كلمة تقولها المرأة لحماتها؟" أو "إمتى الأب يضرب ابنه على وشه؟" وحاجات كده بتخلى الإجابة مش معتمدة على معلوماتك وإنما على تفكير واستنتاج أكتر.. كمان البرنامج بيسأل المشاهدين علشان يصوتوا للفرق، وساعات الجمهور بيصوت ضد فرقة معينة علشان تخرج من المسابقة.. والبرنامج كمان بيخلى مشاهير وفنانين وإعلاميين يشاركوا فى البرنامج، وبيعملوا حالة جميلة، ناهيك بقى عن الإنتاج المبالغ فيه للبرنامج والستوديو والتصوير والإخراج اللى بيلعب على تنقلات كتيرة قوى ومزج ما بين المذيعة والمتسابقين والجمهور والشاشات للعرض وبجد برنامج يستاهل.