The Definitive Guide to Living in the Capital , Cairo , Egypt

أول لما سمعت اسم “الباب فى الباب” جاء فى بالي على طول مسلسل
“ساكن قصادى” اللى كان بـ يعرض زمان، المسلسل ده برضه كان كوميدى وكانت
بـ تلعب بطولته القديرة سناء جميل، لكن لما شفنا كام حلقة من سيت كوم الباب فى
الباب حسينا أن إحنا أخيرًا قدرنا نعمل سيت كوم فعلاً بمعنى الكلمة، مش زي الأعمال
اللى كانت بـ تحاول قبل كده تخنق على الناس مش تبسطهم.

المسلسل بـ تدور أحداثه حول شخصية هشام فتح الباب (شريف سلامة) وزوجته دينا
(كارولين خليل) وأبوه (أحمد خليل) وأمه مدام كوثر (ليلى طاهر) بالإضافة إلى أخوه
عصام (هشام إسماعيل) وبـ يعرض على قنوات دريم وMTV  اللبنانية.

شريف سلامة بـ يجسد
شخصية محلل رياضي وهو زوج وأب لبنت وتوأمين، وبـ يحاول طول الوقت يكون محايد بين
زوجته ووالدته اللى مختلفين على طول، وده بسبب أنه ابن مدلل من ناحية والدته اللي
بـ تبدأ فى الغيرة عليه من زوجته دينا، وبـ تدور الأحداث فى قالب كوميدى خفيف يبين
تناقض مواقف عائلة الأب وعائلة الأم وتتوالى المشاكل تبعًا لأحداث العائلة فى
حلقات منفصلة متصلة.

اختيار كارولين خليل
فى الدور ده كان رائع لأنها قدرت بجد تجسد دور ست البيت المصرية بجدارة، وكمان الـديكورات مبهرة ولكن من غير تكليف، وأزياء الممثلين
مناسبة جدًا طول الوقت للحالة اللى بـ يكونوا عليها.

أصوات ضحك الجمهور زيادة شوية لكن تعتبر مقبولة عن سيت
كوم كثيرة استخدمت فيها قبل كده.

الباب فى  الباب قدر أنه يخرج بنا
بجد من حالة السيت كوم العقيم اللى كنا بـ نشوفه فى مصر طول السنين اللى فاتت ويحسسنا
أننا نقدر نعمل حاجة زى السيت الكوم الأجنبي من حيث الشكل لكن فى نفس الوقت تتناسب
مع حياتنا ومعيشتنا.