The Definitive Guide to Living in the Capital , Cairo , Egypt

ابن عربى:

فللهِ قومٌ في الفراديسِ مذ أبتْ قلوبهم أن تسكن الجوَّ والسما

ففي العَجَلِ السرُّ الذي صدعتْ له رعودُ اللظى في السُفلِ من ظاهر العَجَى

وأبرقَ برقٌ في نواحيهِ ساطعٌ يجلِّلُهُ من باطنِ الرِجلِ في الشوى

فأولُ صوتٍ كان منه بأنفه فشمته فاستوجبَ الحمدَ والثنا

وفاجأهُ وحيٌ من اللهِ آمرٌ وكان له ما كان في نفسه اكتمى

فيا طاعتي لو كنتِ كنتُ مقرباً ومعصيتي لولاكِ ماكنتُ مجتبى

فما العلم إلا في الخلافِ وسرِّه وما النورُ إلاَّ في مخالفةِ النهى

دى كلمات تتر المسلسل اللى عمل ضجة فى مصر من أول حلقات له رغم الزخم الكبير اللى على الشاشة دلوقت والكلمات من أشعار فيلسوف الصوفية محيى الدين بن عربى اللى عاش فى الأندلس وكتب واحد من أعظم كتب الفلسفة والدين الإسلامى “الفتوحات المكية” وكان شاعر وفقيه وفيلسوف وصوفى ومن هنا نبدأ نتكلم عن “السبع وصايا”.

السبع وصايا:

لازم نعرف أن رقم سبعة من الأرقام المقدسة فى أغلب الديانات مش فى الإسلام وبس وعلشان كده فيه السبع سماوات والسبع أراضى وفيه فى مسلسلنا سبع وصايا.

بـ تبدأ الحكاية بسبعة أخوات متفرقين وأبوهم تعبان بقى له سنين.. ولما بـ يزوروه بـ يعرفوا أنه سايب فلوس كثير وهما عايشين فى فقر فبـ يقرروا “قتله” ودى واحدة من الخطايا السبع برضه، ومع أن بعضهم كان رافض للفكرة إلا أنهم فى النهاية قتلوه.. علشان الفلوس وأول ما اتعرف الخبر الجثة اختفيت “سلام قولًا من رب رحيم”، بـ تقول إيه يا عم يعنى إيه اختفيت؟.. آه والله زى ما بـ أقول لك كده اختفيت فى ظروف غامضة واتجنن العيال كلهم ما بقوش عارفين يعملوا إيه، المهم ما نطولش عليكم جابوا جثة من المشرحة طلع الرجل ميت مسموم والدكتور اللى هـ يطلع التصريح بلغ عنهم، كلهم هربوا إلا “بوسى” اللى بـ تقبض عليها الشرطة وتتوالى الأحداث.

بلاد الله لخلق الله:

بـ يتفرق الأخوات فى بلاد الله لكن خد بالك معانا هما بـ يتفرقوا فى المحافظات اللى فيها أولياء الله وبـ يحاولوا يكفروا عن ذنوبهم ويتوددوا لأولياء الله وفى الحلقة الخامسة تحديدًا كلهم بـ يقرأوا الفاتحة لكن قراءتهم مختلفة، يعنى فيه اللى بـ يقرأها للسيد البدوى علشان ربنا يكرمه.. وفيه اللى بـ يقرأها علشان ما يتكشفش أمره.. وفيه اللى بـ يقرأها علشان بـ يعمل “شر مطلق”، وعلى رأى سوسن بدر: “فى السجن الشر واضح”، ولما بـ يبدأوا يتعدلوا شوية بـ يشوفوا كلهم رؤيا لأبوهم فى المنام ويعرفوا أنهم علشان يلاقوا الجثة لازم يقرأوا الوصايا السبع اللى فى الشكمجية.

مدد:

لازم نقول بالفعل أن القدرة على كتابة عمل زى ده وكمية الأحداث واللعب على تيمة الأولياء وخلط الواقع بالخيال بالصدفة فى أحداث المسلسل وكمان اختيار الأماكن اللى تم التصوير فيها وكتابة السيناريو والحوار والبساطة المدهشة اللى بـ يمثل بها الأبطال والإخراج الرائع للفكرة كل ده بـ يخلينا نقول: مدد يا أهل الطريق لو عرفنا الوصايا بجد وعملنا بها هـ يتفتح لنا الباب اللى بـ يفصل بين الواقع والخيال ونشوف.

علشان تعرف مواعيد وقنوات عرض “السبع وصايا” زور “دليل كايرو 360 للتليفزيون فى رمضان“.