الضيف محمود العسيلي.. تفاصيل الحلقة الجديدة من أبلة فاهيتا
Mohammed Sabry
ناس كتير بتستنى من الجمعة للجمعة علشان تتفرج على الحلقة الأسبوعية من برنامج “أبلة فاهيتا” على قناة سي بي سي. اللي دايمًا مليان أخبار وفقرات كوميدية، تساعد الواحد يفصل من أي حاجة شغلاه طول الأسبوع ويفرفش شوية.
كايرو 360 كانت موجودة في تصوير الحلقة الجديدة من البرنامج. اللي هتتعرض بكرة، الجمعة 20 يناير. وجبنا لكم تفاصيل الحلقة:
الفقرة الأولى
كالعادة بدأت الفقرة الأولى بشوية أخبار خفيفة عن أهم أحداث الأسبوع. سواء سياسية أو رياضية أو غيرها. وطبعًا الموضوع مايخلاش من شوية فيديوهات كوميدية. وكمان أغنية عن الكورة قدمتها الأبلة بمناسبة ماتش مصر ومالي. اللي كان ميعاده يوم الثلاثاء الموافق يوم تصوير الحلقة.
الفقرة الثانية
اتكلمت الأبلة عن السياحة الداخلية في مصر. وعرضت أماكن مختلفة في كل أنحاء مصر ماحدش يعرفها. وتناولت موضوع الرحلات الداخلية اللي بتكون بميزانيات منخفضة.
الفقرة الثالثة
الفقرة الثالثة دايمًا هي فقرة الضيف. والأسبوع ده كان الضيف هو الفنان محمود العسيلي. وطبعًا زي كل الضيوف قعد الأول مع “كارو” علشان يملى الأبليكشن، ويستعد لمقابلة الأبلة.
والجميل في فقرة العسيلي إنه مش بس غنى، ده كمان الأبلة لعبت معاه لعبة “Fortune cookies”. وهي إنها تطلب منه أغنية معينة، وتخليه يغنيها بلحن مختلف. ودي بقى مش هنقول لكم فيها تفاصيل أكتر ونسيبها لكم تستمتعوا بيها في الحلقة.
ماتنسوش، البرنامج بييجي كل جمعة الساعة 10 بالليل على cbc.
مقترح
فن وثقافة
في الويك إند.. دليلك للسفر في رحلة بصرية مبهرة مع توت عنخ آمون
الجيزة المتحف المصري الكبير +5
معالم وسياحة
