The Definitive Guide to Living in the Capital , Cairo , Egypt

بجلسة أبو العربى وكلام فى السياسة “مش غبى منه فيه”.. ولكل مصرى بـ يقول “عاوز حقى” وشباب عانس بـ يتمنى “الجواز بقرار جمهورى” هـ تلاقوا هانى رمزى بـ يعمل حاجة كده زى ستاند أب كوميدى بس بشكل جديد “كوكتيل” سياسة على شوية قضايا اجتماعية على حبة كوميديا وسخرية مع هانى رمزى وضيوفه.

هانى استضاف نجوم كثير فى الفن والسياسة والإعلام والرياضة زى علاء صادق، محمد هنيدى، خالد سليم، محمد البرادعى، أوكا وأورتيجا. كل ضيف لازم يجيب معاه هدية زى أسامة منير اللى جاب معاه قرد، وخالد سليم جاب سلم خشبى واللى جاب معاه ميزان أو صابونة وكده يعنى.

لو تكلمنا عن هانى بشكل شخصى شوية فهو درس فى كلية التجارة ثم معهد الفنون المسرحية وبدايته كانت مع وحيد سيف وبعد كده اشتغل مع صبحى فى مسرحيات “تخاريف” و”وجهة نظر” وآخر أعماله مسلسل “ابن النظام”.

رمزى بـ يحاول فى كل حلقة من البرنامج يلاقى مدخل مختلف وبداية جديدة لكن شكل البرنامج وتقسيمته الثابتة بـ يخلوه غصب عنه ما يعرفش يجدد قوى فى الدخلات.

هانى رمزى ممثل محترف “ماشى” على عيننا وراسنا بـ يعرف يضحكنا فى أغلب أفلامه “برضه ماشى”، شوية من أفلامه بـ تناقش قضايا مهمة “وماله” لكن عاوزينكم تحطوا فى الاعتبار الآتى: السيناريو مكتوب قبل الفيلم بفترة، والممثل يقدر يقرأ السيناريو أكثر من مرة، وكمان يقدر يعمل أكثر من بروفة فى المشهد الواحد.

أما فى برنامج ” الليلة مع هانى” فكل العناصر اللى فاتت مش متوفرة، لأ وكمان صعب يعيد أكثر من مرة فى الفقرة الواحدة وأنه بـ يحضر أكثر من سكريبت كل أسبوع وبـ يعمل كل ده أمام جمهور فكل ده خلى الستاند أب كوميدى “هانى رمزى” يقع أمام الممثل الجميل هانى رمزى.

البرنامج فيه عدة فقرات وكلها فيها خفة دم مش علشان هانى رمزى بس اللى بـ يقدمها، لأ، في فقرة الضيوف فيها شوية دردشة مع الضيف ثم بـ يعرض هاني حاجة اسمها فيسبوكى وهى عبارة عن تعليقات ضاحكة ونكت من على الفيس وواضح كده أنه بـ يعتمد على صفحة “أساحبى” وكمان فيه النشرة اللى بـ تسخر من العيشة واللى عايشينها وفيه كمان إضافة على البرنامج عاملها هانى رمزى علشان يضحك الناس شوية وهى “عربية الفرفشة” بـ تلف الشوارع فيها فرقة غنائية ومهرج وهدايا من باب “ما حدش واخد منها حاجة”.