The Definitive Guide to Living in the Capital , Cairo , Egypt

يا رايح كتر من الفضايح، ده شعار برنامجنا النهارده وهو برنامج المخبر. البرنامج اللي بينقل الواقع المصري زي ما هو من غير أي تجميل.

مقدم البرنامج: أحمد الجارحي وهو مذيع ومخرج شاب قام بأخراج بعض الأعمال الصغيرة منها “دي سلطة، مسلسل بخ وفيلم قصير اسمه 150” ده غير أنه كان ضمن فريق عمل برنامج “البرنامج” اللي كان بيقدمه باسم يوسف ومن أحسن الحاجات اللي قدمها برنامج “ذيع موهبتك ” واللي كان بيتعرض علي اليوتيوب .

التصوير: البرنامج بيعتمد على التصوير في المسرح والتصوير والتسجيل الخارجي مع المواطنين وده اللي بيشكل صعوبة في البرنامج، لأن كلنا عارفين يعني إيه تصوير وكاميرا في الشارع المصري .

ميعاد إذاعه البرنامج :  البرنامج بيتعرض كل ثلاثاء الساعة 9 مساءً على قناة ON E .

فكرة البرنامج : القائمين على البرنامج شايفين إن الكاميرا هي سلاحهم اللي هيستخدموه لمحاربة أي فساد في المجتمع المصري، ففكرة البرنامج قايمة علي قيام عدد من الشباب بالتنكر بأزياء مختلفة والنزول إلى الشارع لفضح وكشف النصابين والناس المسئولة عن أغلب المشاكل اللي بتقابلنا كلنا زي حلقتهم عن النصابين والدجالين وزيادة أسعار الخضار وكمان حلقتهم عن الأهمال والرشاوي اللي بتتدفع في حديقة الحيوانات اللي في الجيزة .

أهم ميزة من مميزات البرنامج ده هو إنه قائم على شباب وإنه بينقل الواقع المصري بكل مشاكله.

لكن المشكلة اللي في البرنامج ده، إنه برنامج فكرته متكررة ومتقلدة ولكن بأسلوب ضعيف جدًا .البرنامج نسخة مصغرة من برنامج انتباه اللي بتقدمه الإعلامية/ منى عراقي على قناة المحور بقى لها سنين بتتعب وبتجمع معلومات وبتنزل الشارع بكاميرات علشان ترصد الواقع وتفضح وتكشف كل فساد وكل فاسد  .

ده غير إن مدة عرض “المخبر” 32 دقيقة وده وقت قليل قوي، علشان يتم عرض فيه مشكلة بشكل موضوعي أو حتى يقدم لها حلول . الغريب في الموضوع ده أنك لما تيجي تسمع صناع العمل وهما بيوصفوا البرنامج، هيوصلك على طول أنهم ناويين يعملوا حاجة ماتعملتش أو حتى هيساهموا في تقدم وتطور وقلة المشاكل اللي عندنا، ودي أول صدمة هتاخدها لما تتفرج وتتابع حلقات برنامج المخبر لأنهم مثلًا في حلقة من الحلقات وصل بيهم الحال لمحاولة افتعال مشكلة مع بعض بياعين الخضار وأستفزازهم وتقليد جزء من فيلم عادل إمام “سلام يا صاحبي”  لعرض مشكلة زيادة أسعار الخضار في مصر!!!!!

 للأسف البرنامج اتضاف لقائمة البرامج الساخرة اللي نتيجتها الوحيدة ضحكة مُرّة على وضع  قائم في مصر وفساد مش عارفين نلاقي طريقة صح علشان نغيره بيها.

نصيحتنا ليكم لو حابين تتفرجوا على برنامج “المخبر” أعرفوا أنكم مش هتستفادوا أي معلومة جديدة.. فياريت بعد البرنامج تحاولوا تطلعوا حتى لو فكرة واحدة، علشان تحاولوا تعالجوا بيها المشكلة اللي أتفرجتوا عليها يمكن لو عملنا كده البرنامج يبقى عمل حاجة كويسة.