-
يوسف عادل
-
إنتاج مستقل
-
من الآن
-
محمد أبو العلا
Ahmed Abd El Gawad
مش كل حاجة بنعملها صح بنعرف نسلط الضوء عليها، ومش كل حاجة بنعملها بنعرف نقول عنها، فيه حاجات كتير لما بنعملها ممن تكون عادية في نظرنا لكنها عند الله كبيرة، وبتقعد عند الناس اللي بتعرف معنى المعروف.
برنامج المصري بأخلاقه، برنامج خفيف وراه فكرة ومؤسسة، ويمكن ده الجديد، الإعلامي الشاب يوسف عادل، قرر إنه يعمل مؤسسة بعنوان “المصري بأخلاقه”، واشتغل على أنشطة كتير في الشارع، وحملات توعية، وبعدين الفكرة كبرت، وبدأت الناس تعرفها، فعمل سلسلة لقاءات في أماكن كتير بنفس العنوان.
ولما الصدى بتاع الفكرة بقى واسع، عمل برنامج بعنوان “المصري بأخلاقه”، بيقول عنه إن فكرته قايمة على إعادة الأخلاق وقيمتها تاني عند الناس، وتذكيرهم بيها، لإن الأخلاق لو ضاعت، هينتشر الشر، ويظهر الفساد في كل المجالات السياسية والإعلامية والاقتصادية وغيرها.
يوسف لاحظ بعد إنتهاء الثورة، إن فيه حملة أخلاق من الناس، اللي بدأت تشتغل مع نفسها وتنشر مصلقات بتقول لا للرشوة ومش هرمي حاجة فى الشارع ومش هكسر إشارة المرور، لكن للأسف كل ده كان على الورق بس، علشان كده بدأ حملته، اللي بيتمنى تكون سبب فى رفع الأمم، زي ما سوء الأخلاق بتكون سبب فى إنهيار الأمم.
البرنامج مدته قصيرة، بالظبط كأنه فيديو يوتيوب صغير، قايم على مقابلات سريعة مع الناس في الشارع، وطرح القضية عنوان كل حلقة عليهم، والمونتاج بتاع البرنامج متعوب عليه كتير، وإخراجه ونقل الكاميرا ما بين المذيع وهو بيتكلم مع الناس وردود أفعالهم معمول بشكل احترافي.
يمكن مشكلة البرنامج في التصوير، لإن كادرات البرنامج بتقطع أجزاء من المشهد، وساعات بتركز على وجه المذيع من قريب قوي، وده مش بيخدم المشهد العام للبرنامج، وملاحظتنا كمان على توقيت البرنامج اللي ساعات بتكون الحلقة 4 دقايق وساعات 6 دقايق وساعات 7 دقايق، وده مش مهني شوية، لكن في المجمل البرنامج فكرته هادفة، وفريقه محترم، وواعي وعنده قيمة عايز يقولها ويوصلها للناس.