The Definitive Guide to Living in the Capital , Cairo , Egypt

الكوميديا مش بس إنك تقدر تضحك اللي قدامك، الكوميديا حضورك قدام الناس، إنك تخلي قلبهم ينبسط، ساعتها بس هتبقى فعلًا فنان كوميدي، وفي أي مجال بقى هتقدر تأدي.

شيماء سيف، نشوى مصطفى، ليلى عز العرب.. التلاتة كوميديانات، بينطبق عليهم اللي قولناه فوق، إنهم يقدروا يضحكوا أي حد بجد، ومن قلبه، التلاتة قرروا يعملوا برنامج.. وسموه تلاتة في واحد.

شيماء ارتبطت معانا ببرنامج نفسنة، اللي كان بيتذاع على قناة القاهرة والناس، وفجأة بعدت عن البرنامج، واعتذرت عن تقديمه من كام شهر، علشان تخرج علينا بالبرنامج الجديد ده.

شيماء قالت في تصريحات للإعلام إن البرنامج مالوش علاقة من قريب أو بعيد ببرنامج نفسنة، لكن لازم نقول إن أول حاجة بناخدها على البرنامج إنه تقريبًا نفس نسخة نفسنة، مع شوية اختلاف بسيط، لكن كل التفاصيل من جوه هي نفسنة، وإن كان نفسنة قايم على فكرة تطبيق اسمه (نفسنة) في تلاتة في واحد، قايم على حاجات تانية، تعالى نشوفها مع بعض.

أولًا القبول، القبول ده حاجة بتاعة ربنا يعني بمقاييس الأنوثة والبرامج اللي بتعتمد على الإغراء وغيرها، يبقى شيماء بره السباق ده، علشان دي مش سكتها، لكن الملاحظ إن مافيش عمل بتدخله إلا والناس بتحبها فيه، يمكن ده علشان عفويتها وخفة دمها اللي طالعة من جواها.

نشوى مصطفى بقى، حالة من الضحك بطريقتها الجميلة واللي كونت قاعدة جمهور كبير ليها من زمان، خلى الناس متقبلة وجودها في أي حاجة، وكمان دي مش أول مرة تعمل برامج، وعندها خبرة كبيرة في الموضوع.

التالتة تابتة، التالتة هي الممثلة ليلى عز العرب، مع إن ظاهرها إنها ممثلة لأدوار الهوانم، وسيدات الأعمال، لكن ليلى عز العرب أثبتت في البرنامج إنها قادرة تتكامل مع زميلاتها، ويكونوا حالة مختلفة، ومقبولة بشكل كبير.

البرنامج ديكوره جميل ومريح للعين، وقايم بشكل أساسي على استضافة نجم وصناعة حالة ضحك جميلة، يعني مش هتحس بالزهق خالص، ومع إن البرنامج من تقديم تلاتة إلا إننا أخدنا بالنا من الإخراج اللي مخلي شيماء هي النجمة تقريبًا في كل حاجة.

خط سير الحلقات إن كل يوم جمعة شيماء تستضيف ناس من أبرز نجوم الفن، والسبت بيبقى يوم عائلي فني بحت، وبيستضيفوا ثنائي عائلي من الوسط الفني، والحد بيتقابلوا كلهم فيه ويناقشوا موضوع بيختاروه مع سلسلة مداخلات وتقارير، وأسئلة بره الصندوق، وحالة من الضحك الجميل.