The Definitive Guide to Living in the Capital , Cairo , Egypt

التتر:

فاكرين أفلام الأكشن الخاصة بشركة "Marvel" الشهيرة واللى أنتجت كثير من الأفلام المشهورة كان آخرها "Spiderman"؟ فاكرين مقدمات الأفلام دي الكارتون بـ تبقى عاملة إزاي وكل أبطالها بـ يتحولوا لكارتون ورسومات؟.. أهو ده بالضبط اللى حصل في تتر مسلسل بعد البداية واللى باين عليه من اسمه ومقدمته أن شكله جامد.. لكن تأتي الرياح بما لا تشتهي السفن.

عمر:

اختيار اسم عمر للبطل، بما له مدلول على العدل والخير والحق ارتباطًا باسم سيدنا عمر بن الخطاب أمر ذكي من المؤلف، فالأسماء لها تأثير على المتلقي خاصة لو مردودها مرتبط بأخلاق وصفات محددة عاوز أبينها في العمل الدرامي، ومن المهم أننا نعرف أن عمر في "بعد البداية" مش خليفة ولا ملك، إنما هو صحفي عادي، مجرد صحفي شايف أن مهمته في الحياة البحث عن الحقيقة وكشفها للناس، وفي ذات ليلة..

ذات ليلة:

هنا عمل درامي جديد نوعًا ومختلف في التناول نوعًا برضه.. لكن الجيد أن في ذات ليلة بـ يظهر فجأة عنوان في الصحف كلها عن عمر.. عنوان بـ يجننه وبـ يخليه عاوز يعرف إجابة السؤال الوجودي "هو فيه إيه؟".

كل الجرايد بـ تكتب خبر وفاة عمر الصحفي مع صورته، لكن مش دي المشكلة خالص، ولا المشكلة أنك بـ تقعد حلقتين مش فاهم حاجة، المشكلة بقى أنك بـ تفضل مستمتع بكل اللى بـ يحصل.. يعني صراحة طارق لطفي أدى دوره بامتياز وكمان المؤلف قادر أنه يعمل حالة تشويق غريبة.

التشويق:

من الواضح في رمضان ده أن فيه سلسلة مسلسلات كثير بـ تعتمد على التشويق وعلى الغموض لكن هنا فيه قواعد: مش أي مشاهد مش مفهومة وراء بعض تبقى غموض، والتشويق فن له أصوله (بس مين يقدر)، وآخر حاجة لو عاوز تشد المشاهد شوقه وعطشه للموضوع علشان تقدر تجيبه.

المسلسل:

مش هـ نكلمكم عن قصته فأكيد كلكم عارفينها لكن هـ نتكلم على مجموع الشخصيات الكثير اللى فى المسلسل والحبكة المعمول بها وكمان عدم الترابط اللى فى الأول واللى بـ يصنع فى النهاية المشهد الكبير واللى بـ تكونه بعد مجموعة حلقات وتبدأ تفهم.

علشان تفهم:

علشان نفهم اللى بـ يحصل حولنا لازم نعرف أن الموضوع فيه قضية تجسس وأنه مرتبط بالصحافة وأن المسلسل بـ يحاول يلمس من بعيد على زيف الصحافة وعلى الصفقات المشبوهة اللى بـ تجرى من تحت الترابيزة.. المهم المسلسل تصويره هايل وحبكة الدراما عالية.. والمطاردات كثير بس ملعوبة حلو في أغلبها، وأحيانًا بـ تاخد الطابع المصري وده مش عاوزينه، إحنا عاوزين مطاردات هوليوود بقى ونطلع بالمسلسلات للعالمية.. والإخراج تعب جدًا من كثر تفاصيل المسلسل، وبعودة عليكم الأيام.