The Definitive Guide to Living in the Capital , Cairo , Egypt

مع بداية سنة 2017 لاحظنا كمية مسلسلات جديدة بيتم عرضها علي كذا قناة مهمة، وده عكس اللي كنا متعودين عليه وهو أن رمضان موسم المسلسلات وبس، ومن ضمن المسلسلات الجديدة اللي شوفناها مؤخرًا مسلسل “حجر جهنم”، اللي هنتكلم عليه النهارده، واللي تم عرضه علي أكثر من قناة مهمة زي mbc  وبيتم عرضه الآن علي قناة DMC.

القصة

بتدور أحداث المسلسل حوالين ثلاث سيدات بيعيشوا حياة زوجية تعيسة وده اللي خلاهم يخططوا لقتل أزواجهم  عن طريق  تحضير قنبلة ووضعها في عربية، وبعد ما ركبها الثلاث أزواج أنفجرت بيهم وماتوا ماعدا واحد نجي من الموت وحاول يعرف مين عمل فيه كده علشان ينتقم منه وكل ده طبعًا في إطار تشويقي.

المسلسل من بطولة كندة علوش، أروى جودة، شيرين رضا، إياد نصار مع فريال يوسف وأحمد مجدي .

عن المسلسل

المسلسل مبهر بكل تفاصيله، تصوير رائع وواضح جدًا إن تكلفة إنتاجه ضخمة، ومن المسلسلات اللي أي مواطن مصري متوسط الحال أتفرج عليها هيتعقد من كل حاجة من أول لبس الممثلات الفخم لحد أثاث وديكورات الفيلات اللي مالهاش زي .

مع بداية حلقات المسلسل بيبان قد إيه الزوجات دول كانوا مخنوقين من تصرفات أزواجهم وبيحاول الحوار يبرر ليه كان عندهم كل الحق أنهم يزرعوا لهم قنبلة ويفجروهم، وظهر شوية تأنيب ضمير أختصره المخرج في حلقة أو أتنين وتابعوا السيدات التعيسات مشوارهم في البحث عن حياة جديدة من غير مشاكل.

في نهاية المسلسل بنكتشف مفاجأة حقيقية مش عايزين نحرقها لكم. شوفوا المسلسل علشان تعرفوها.

بنعيب على المسلسل إنه قدم صورة نمطية غير حقيقية عن المرأة، وهي دي بالذات أكبر عيوبة لأن المؤلفة لما قدمت شخصيات نسائية مصرية ماحاولتش تعرض ست مصرية كويسة، زوجات قاتلات، حماه بتحب أبنها جدًا وبتعامل مراته وحش لدرجة أنها بلغت عنها وحاولت تسجنها، للست اللي وصلت لمنصب عالي وبتدوس وبتقتل وبتشارك في شركة أدوية مليانه نصابين، للجارة  اللي بتنقل كل الأخبار، للست الفاشلة في شغلها بسبب حياتها الشخصية، أو المعقدة اللي كانت بتتعالج عند دكتور نفساني ومابتعرفش تشيل مسئولية ودي بعض النماذج مش الكل!!

معقول خلاص مابقاش فيه ست كويسة وشخصيتها قوية في مصر؟ مابقاش فيه ست تقدر تخلع أو تطلب الطلاق من جوزها من غير “قتل”؟  هي دي الرسالة اللي المفروض توصلنا؟

مش عارفين إمتى هنتفرج على مسلسل فيه قصة نجاح ست في علم من العلوم أو إمتى هنشوف مسلسلات بتقوي الست مش بتضعفها، إمتى هشوف مسلسل بيقول لأي ست ماتسكتيش علي أي إهانة وحاربي عكس أي تيار المهم تكوني مبسوطة ومرتاحه ومن غير قتل ولا قنابل.

إمتي هتفرج علي مسلسل يربي بناتنا ويفهمهم إن ماينفعش حد يجي عليهم ويظلمهم ويعرفهم ياخدوا حقهم وإزاي يختاروا شريك حياتهم.