The Definitive Guide to Living in the Capital , Cairo , Egypt

خلصانة بشياكة مسلسل داخل في سباق مسلسلات رمضان2017 وبيتعرض علي قناة DMC في تمام السابعة مساءً وهو مسلسل اجتماعي بيناقش مشاكل المجتمع المصري في إطار كوميدي أقرب للفانتازيا.

عن المسلسل

المسلسل عبارة عن حلقات منفصلة في كل حلقة بيتم مناقشة موضوع محدد ولكن متصل بالموضوع الأول للمسلسل وهو الصراع الأذلي بين الرجل والمرأة في المجتمع المصري.

بمجرد عرض الأعلان الدعائي للمسلسل كل جمهور أحمد مكي كانوا متشوقين لرؤية نجمهم المفضل، خاصة بعد تغيبه فترة كبيرة عن الشاشة بسبب ظروف مرضه اللي صرح بيها، وكمان كلنا كنا مستنيين الخطوة الجديدة لمكي بعد نجاح مسلسل الكبير قوي واللي تم عرضه طوال خمس سنوات ده غير أنه لأول مرة بيجتمع مع شيكو وهشام ماجد واللي بالفعل محققين نجاحات كبيرة في الكوميديا كل ده رفع حد التوقعات عندنا وخلانا مستنيين مسلسل فانتازيا رائع وجديد في كل حاجة.

إفيهات مستهلكة

 بس للأسف اللي حصل عكس كده فمع أول حلقة من حلقات المسلسل أتفاجئنا بمستوى أقل من الطبيعي لأحمد مكي.. إفيهات قديمة وأقرب ما تكون لكوميكس مواقع التواصل الاجتماعي ده غير المواضيع اللي أتناقشت أكثر من مرة قبل كده.

كمان ممكن يكون السيناريو مكتوب كويس بس للأسف الفكرة الأساسية تايهة وده اللي خلى نسب المشاهدة للمسلسل بتقل مع عرض كل حلقة.

ترويج للعنف

كل ده كان عادي جدًا وبيحصل بس اللي كان خارج الإطار ومش متوقع أن أحمد مكي -الرابر المصري المعروف بأغانيه اللي بتنتقد المجتمع وبتوجه الشباب وبتفهمهم حاجات جديدة- يعرض في حلقة من حلقات المسلسل أغنية من أغاني المهرجانات اللي أصبحت وباء منتشر بين الشباب.

ومش كده وبس ده بيشارك معاهم في الغناء والرقص اللي بيقوموا فيه بتكسير مصابيح كهربائية “لمبات نيون” كتيرة علي رأسهم في دعوة واضحة جدًا للعنف وكأنه تكرار لأعمال الفنان محمد رمضان اللي بيتميز أغلبها بنشر العنف، ومشاهدتنا لأحمد مكي بيكسر لمبات علي رأسه كانت صدمة كبيرة لينا واللي فعلًا أصابتنا كلنا بأحباط من العمل ده.

كمان بنعيب على المسلسل استخدامه لإفيهات عنصرية كتير قوي.

أحلى حاجة في المسلسل

أحسن حاجة في المسلسل تصويره والأزياء اللي باين وواضح جدًا أنهم دارسين ومفكرين في كل حاجة فيها.

رسالة لأحمد مكي: كنا متوقعين منك حاجة أحسن من كده يا نجم!