The Definitive Guide to Living in the Capital , Cairo , Egypt

بعيدًا عن زحمة مسلسلات رمضان، والصراع اللي مش بنعرف نشوف فيه حاجة مع ضغط الإعلانات وسباق القنوات على المسلسلات الحصرية، ظهر لنا مسلسل بسيط وقوي على قناة CBC دراما علشان يأكد حقيقة إن العمل الكويس بيفرض نفسه على الساحة في أي وقت.

في عمارة راقية في حي أشبه بالمعادي بتنتقل أحداث مسلسل “سابع جار” بين حوالي 6 شقق لجيران وبنشوف الخطوط المتشابهة في أسر مصرية كتير، من أول الأم المصرية الأصيلة اللي بتقوم بدورها دلال عبد العزيز وشيرين الأختيين اللي ساكنيين جنب بعض، لحد سيادة اللواء اللي بتبدأ أول حلقة مع عزاء مراته، وبنشوف في مشاهد بسيطة إزاي كل الجيران بيتعاونوا في الحلو والوحش علشان يقفوا جنب بعض زي ما أتربينا زمان.

أول أسرة  طارق المحاسب البنكي ونهى مراته اللي مركزة على تربية ولادها وجوزها ومش بتشتغل، ومشكلتهم متشابهة مع بيوت كتير وهو تركيز نهى على مسئوليات الولاد والبيت ونسيان جوزها اللي هي خرجته بره مسئولية البيت وشالتها لوحدها، وده بيخلق مشاكل كتير بينهم، بين تعب نهى من البيت ورغبة طارق في أنه يقضي وقت رومانسي خاص بيهم من غير الولاد.

الشقة التانية فنانة عازفة التيشلو في الأوبرا وجوزها  “عمرو” واللي بيمثل دوره هاني عادل مؤلف الموسيقى واللي بيشتغل من البيت على حسب مزاجه وده اللي خلى سكان العمارة يحملوه مسئولية صيانة العمارة، وبين الزوجين فتور حاد بين طموح مراته واكتئابه الدائم بسبب حبه للموسيقى وعدم وصوله للي هو عاوزه. كمان فيه شقة مي مهندسة الديور وشريكها وصاحبها اللي بيحبها لكن هي حاطاه في الفريند زون وبتحاول تخرج مع ناس تانية يمكن تلاقي فتى أحلامها، وبتحاول تتجنب حب شريكها ليها.

نيجي للأختين  اللي عايشين في شقتين جنب بعض،  لمياء أو “دلال عبد العزيز” أرملة وعندها بنيتن وولد، بنت محجبة ودكتورة صيدلة ممكن تبان متشددة شوية عندها 30 سنة، وأهلها بيحاولوا يجيبوا لها عريس، والبنت التانية 26 سنة مش لاقية شغل وحتى لما جيه الشغل اللي هي متصورة أنها هتنجح فيه، والدتها رفضته علشان فيه سفر كتير وحفلات، أما الولد الصغير واللي بيقوم بدوره الطفل أحمد داش، فهو دور لطيف لولد بين حوالي 4 ستات بيحاول أنه يهرب منهم وياخد وقت لنفسه بعيد عن خناقاتهم المستمرة.

والأخت الثانية   “ليلى” واللي بتقوم بدورها شيرين، جوزها رجل أعمال فاشل دخل في مشاريع كتير انتهت بالخسارة وبقى في نظر ناس كتير نصاب، ويتطارده قضايا كتير، وده اللي خلاه يسيب بيته وخلى بناته الأتنين يبقوا في موقف حرج لو حد طلب يتجوزهم فالأخت الكبيرة اتجوزت أي واحد والسلام،  مش بيشتغل وبخيل عايش عالة على عيلتها، والأخت الصغيرة برغم منصبها الكبير في شغلها، ورغبتها في أنها تكون أم إلا إنها بترفض أي محاولة من أي حد أنه يتقرب منها.

نختم بسيادة اللواء اللي ابنه سابه ليلة وفاة أمه لأنه مرتبط بعقد عمل لبرنامج إذاعي في دولة عربية، وده سبب الخلاف الرئيسي بينه وبين والده اللي رافض يكلمه.

المسلسل أحداثه كتير، وأسماء شخصياته كتيرة علشان كده ماحبيناش نذكرها كلها علشان مانلخبطكمش، لكن الإخراج متميز جدًا وهو لـ 3 مخرجات واللي هم هبة يسري وأيتن أمين ونادين خان.، والتمثيل عفوي وجميل يحسسك أنك عايش مع الشخصية، ما ينفعش تميز شخصية عن شخصية بس لازم تحس بدفي البيت وأنت بتتفرج على المسلسل. برضه الديكورات والأزياء مناسبة جدًا للمستوى الأجتماعي لأبطال المسلسل ومش مبالغ فيها. لكن ماحسيناش بالموسيقى التصويرية خالص، غير في التتر اللي كان مميز زي المسلسل.

نأخد على المسلسل بس أنه نقل بعض العادات اللي موجودة حاليًا بس مش جزء من التقاليد المصرية، وده واقعي لكن خرجنا من دايرة الحنين للقيم اللي المجتمع مفتقدها، زي مثلًا إن مي سايبة شقة أهلها ووالدتها المريضة، وعايشة لوحدها وبتتضايق لما بتزورهم. أو زي لما زميل هالة في الشغل “علي” راح لها البيت بحجة أنه معاه شغل وباسها جوه بيتها اللي المفروض فيه مامتها وأهلها.

مسلسل بنكهة الحنين للماضي والعادات اللي قربت تختفي زي الإحسان للجيران والسؤال عليهم والهدايا المتبادلة بينهم والسند لما يكون فيه عزاء أو فرح، بيعرض تحول المجتمع في الفترة الأخيرة نتمنى أنه يعجبكم وتستمتعوا بباقي حلقاته على قناة CBC  دراما.