-
سارة عبد السلام
-
طبخ
-
من الآن
-
محمد حسنمحمد حسن
Rasha Zeidan
صراحة السنة الأولى في كل حاجة بـ تبقى صعبة وغريبة وساعات كمان تقيلة على القلب.. افتكروا معانا كده سنة أولى ابتدائي وقد إيه لسه بـ تاخد على المدرسة أو بـ تتعلم القراءة.. طب بلاش سنة أولى كلية.. وأنت لسه بـ تتعرف على كليتك وجامعتك وأصحابك والمجتمع الجديد.. نقول لكم سنة أولى شغل وقد إيه قاعد تتعلم وتغلط وتتعرف على طبيعة شغلك علشان تبقى محترف فيه.. طب "سنة أولى طبخ" بقى إيه الحكاية؟
صحيح أن الطبخ اتعمل على أيد الرجالة العتاولة.. وأن الطباخين الرجالة أشهر من النار على العلم.. بشكل يصعب على أي ست أنها تحترف في المجال ده.. ما تستغربوش كلامي للأسف هي دي الحقيقة في الطبخ.
يا نساء العالم بصوا كده على أشهر الشيفات على مستوى العالم هـ تلاقوهم رجالة.. بس لكل قاعدة شواذ.. ومش لازم الرجالة يسيطروا على الموضوع.. علشان كده دورنا ودعبسنا لحد ما لاقينا "سوبر سارة" الشيف سارة عبد السلام صاحبة برنامج "سنة أولى طبخ"، سارة بقى بدأت الموضوع من الصفر فعلًا مع كل الستات.. يعني اللى عاوزة تتعلم ألف باء مطبخ تبدأ معاها ومش هـ تندم.. بس ده مش معناه أن المحترفات ما يتفرجوش بالعكس فيه معلومات مفيدة كمان.. فيا سيدتي السوبر هاتريك في المطبخ.. اتفرجي على سارة هـ تكسبي، لأنك ببساطة هـ تكوني معاها أشطر شيف في بيتك.. وهـ تبقى محترفة في أصول الطبخ وأساسياته.. ومش كده وبس سارة كمان بـ تعلمنا إزاي نكون منظمين في حياتنا، ونحافظ على اللى عندنا.. يعني بـ تعلمنا أصول التخزين وطريقة الحفظ والوضع في الفريزر حتى الشبت والبقدونس، ويا سلام لما عملت حلقة عن حفظ الخضروات ساعتها هـ تعرفي أنك ممكن تطبخي أى أكل في أي وقت.. والفاكهة كمان والمربي والمخللات وغيرها.. المهم نرجوكم وأنتم بـ تتفرجوا حافظوا على صحتكم.
البرنامج ناجح ومفيد وعوامل نجاحه مش بس أن اللى بـ تقدمه شيف شاطر.. لأ كمان عين الكاميرا الحلوة مع الأكل وتحضيره والبانوراما العامة لشكل المكان.. واللى بـ تخلينا نلاحظ الديكور الهادئ والمريح للعين والمخرج الشاطر اللى عينه على الشيف خطوة بخطوة.
الشيف سارة في مقدمة كل حلقة بـ تشرح موضوعها نظري الأول، والجديد بقى أنها بـ تشرحها على السبورة.. أيوه سبورة بس التلاميذ في البيت، ودي من الحاجات اللى بـ تعطي المشاهد فرصة يجيب ورقة وقلم علشان الوصفة اللى عاجباه.