The Definitive Guide to Living in the Capital , Cairo , Egypt

برنامج صباحك مصري على mbc مصر، برنامج صباحي يومي من الساعة 11 ولمدة ساعتين، وفيه متابعة لكل ألوان الحياة في مصر، بيهتم بالأخبار السياسية والاجتماعية والاقتصادية والفنية والرياضية.

البرنامج فيه لقطة مهمة جدًا إنه بيركز على القيم الإيجابية وبيحاول يطلع النماذج المؤثرة والفاعلة في المجتمع المصري، وبيسلط الضوء على السلبيات اللي موجودة في المجتمع علشان تظهر وبيحاول يدور لها على حلول عن طريق مكالمة المسؤولين أو استضافتهم.

وطبعًا زي أي برنامج صباحي الأخبار والمقابلات والترفيه والدم الخفيف هما أبرز حاجة هتلاقوها فيه، لإن الناس على الصبح بتبقى محتاجة جرعة كبيرة من  البهجة والفرح، الناس نفسها تنبسط، فلو البرنامج الصباحي ركز بس على المشاكل وحلها، الناس صعب تتابعه، علشان زي ما بيقول المصريين  "صباحك الفل، صباحك نادي" واللي بيتابع سلوك المصريين في الصبح هيلاحظ إنهم بيتفاءلوا قوي بالأخبار الحلوة على الصبح، وبداية اليوم، وتلاقي الناس الكبيرة وهي لسه صاحية تقول "يا فتاح يا عليم يا رزاق يا كريم"

البرنامج معمول بشكل حلو جدًا زي أغلب برامج mbc صراحة، وداخل فيه حاجات كتيرة من ديكور ظريف ومريح للعين، ونقلات كاميرا مرتاحة وهادية ومخرج شاطر بينقل ما بين الاستوديو والضيف والمداخلات والتقارير والفواصل.

البرنامج بيقدمه هشام عاصي وهو شاب مرح بيحب الضحك والهزار وبيعمل جو لطيف، وأسلوبه بيتميز بالبساطة يعني مش بيمثل في أداؤه كانه قاعد بيتكلم مع واحد صاحبه.

بيصاحب هشام في التقديم سهام صالح، شخصية قوية وجذابة وتحس إنها عندها طومح وإصرار تبقى حاجة مهمة وهي رقيقة جدًا في كلامها، وجريئة في حوارتها مع المسؤولين، وكمان ست بيت شاطرة.

البرنامج حلو بيدي طاقة حلوة كل يوم الصبح.