The Definitive Guide to Living in the Capital , Cairo , Egypt

بعيدًا عن ملل بعض المسلسلات في رمضان، واللي قليل لما تطلع منها بعنوان حلو ومميز، أو حدوتة جديدة، هنقف النهارده بره الملل ده، عند طاقة نور.

مسلسل طاقة نور بطولة هاني سلامة وحنان مطاوع ووليد فواز، هو حالة من الأفكار الحلوة اللي مبتكملش، يعني تحس إن المسلسل فكرته حلوة لكن لسه فيه حاجة ناقصاه.

هو بيحكي باختصار عن قاتل مأجور بيقوم بعمله بكل احتراف، وبيخليك تحب الشخصية كمان، بالذات لما بتبدأ تتحول وتبقى شخصية تانية، تحول عجيب في شخصية القاتل صعب إن الإخراج يقنعك بيه، بس مش هنا المشكلة.

المشكلة إن السوشيال ميديا بقت فضاحة قوي، يعني الشباب كان ليهم كام ملاحظة كده على الإخراج بتاع المسلسل منها مثلًا إن ممثلة كانت مخطوفة ظهرت في الخطف شعرها بلون، ولما رجعت لون تاني، أو إن كادر المصورين والمخرجين كله كان ظاهر في نضارة أشرف عبد الغفور.

أداء هاني سلامة جيد لأقصى درجة، بالذات إننا عرفنا إنه واظب على تدريب لعبة الآيكيدو على يد الكابتن/ محمد السيد أحد مدربي الآيكيدو المشهورين في مصر، وكان هدفه من التدريب إنه يظهر بمظهر جيد، خاصة إنه في المسلسل طالع بدور مدرب آيكيدو، وقاتل مأجور، ودي نقطة جيدة لصالح هاني سلامة.

الكارثة بقى اللي في المسلسل هي إنه حواليه ضجة كبيرة قوي، صاحب الضجة دي هو الكاتب الصحفي والروائي والسيناريست محمد صلاح العزب

واللي اتكلم عن مسلسل ليه اسمه “الدرويش”، تقدر تقول إنه نفس فكرة طاقة نور. اللي منسوب فكرته والسيناريو بتاعه إلى حسان دهشان. والعزب طلع بيان صحفي، فيه فكرة المسلسل ونهايته كمان، علشان يؤكد على صحة كلامه، وكان البيان ده يوم 1 يونيه، وإحنا لسه في أول رمضان.

محمد قال في البيان أنه أثناء مشاهدته للحلقات الأولى من مسلسل طاقة نور، بطولة الفنان هاني سلامة وإنتاج شركة سينرجي للإنتاج الفني، وتأليف حسان دهشان وإخراج رءوف عبد العزيز. لاحظ نوع من التطابق الشديد بين قصة المسلسل المذكور، وقصة مسلسل من تأليفه يحمل اسم “الدرويش”. مسجل بحقوق الملكية الفكرية بتاريخ 11 سبتمبر2012. وأنه لما تمكن من الوصول إلى قصة مسلسل “طاقة نور” كاملة، اتأكد من تطابق القصتين بشكل واضح وتام ونهائي ولا لبس فيه، على حد تعبيره.

محمد بدأ في إجراءات قانونية ضد الشركة المنتجة للمسلسل.

لكن إحنا في كايرو 360 مقدرناش نوصل لشركة الإنتاج علشان نجيب ردهم على الكلام ده. ولحد اللحظة دي مافيش أي حكم قضائي صدر يعني يبقى كلام محمد صلاح العزب مجرد اتهامات.