The Definitive Guide to Living in the Capital , Cairo , Egypt

حيطة كبيرة في بيت شعبي عليها كل حاجة ليها علاقة بالنادي الأهلي، دنيا كده من الحياة الشعبية الجميلة، اللي فيها الناس بتتعامل مع بعضها بكل حب، وبيستلفوا من بعض، وبيساعدوا بعض في كل حاجة.

دي كانت بداية الحلقة الأولى اللي فيها واحدة من جارات كابتن أنوش، بتستلف أكل من زوجة كابتن أنوش (عبير صبري)، أما أنوش بقى، أول لقطة بيظهر فيها، وهو بيحلم بكل لاعبي النادي الأهلي، وبيقول أساميهم واحد واحد، وبعدين يصحى على حيطة النادي اللي قدامه، ويصبح على كل لاعب منهم.

أنوش أو بيومي فؤاد، واحد من محبي النادي الأهلي، بيحب الكورة وبيتابع كل حاجة ليها علاقة بيها، وتحديدًا ليها علاقة بالنادي الأهلي.

كان بيلعب كورة وهو صغير، وحلمه الكبير كان يبقى لاعب كورة مشهور، ومعروف، وبالفعل هو وصغير دخل مع أشبال النادي الأهلي، لكن لما توفى أبوه، اضطر إنه يسيب النادي، ويهتم بأسرته.

بيعدي الوقت وأنوش بيجري جوه دمه لعب الكورة، وبيجري جوه دمه اللون الأحمر، تحديدًا النادي الأهلي، هو مثال لمشجع الأهلى الوفي، بيتابع كل المباريات و الجرايد و المجلات، ومتعته الكبيرة إنه يتفرج على “ماتش” للنادي الأهلي، ويشوفه وهو بيكسب.

مع بيومي فؤاد بيظهر نجوم تانيين عاملين حالة حلوة ومختلفة، منهم اللي احترف الكوميديا، ومنهم اللي يعتبر اكتشاف في الشكل الكوميدي، زي عبير صبرى، اللي بتجسد في أحداث المسلسل شخصية زوجة كابتن أنوش، وطبعًا هي كمان مشجعة للنادي الأهلي، والدور ده لعبير يعتبر اكتشاف، لإنها أدته بشكل جديد، وظهر عندها قدرات عالية في الكوميديا.

والاكتشاف التاني في المسلسل هو أحمد ثروت، اللي بيجسد دور “حارس مرمي”، وطبعًا كلنا عارفين أداءه اللي بيخليك تضحك من مجرد حركات جسمه وتعبيرات وشه، المرسومة بعناية، وثروت كوميديان نجمه ظهر في الفترة الأخيرة، بعد ظهوره على مسرح مصر، وبعدها بدأ يظهر في مجموعة أفلام ومسلسلات علت من نجمه.

المسلسل فكرته جيدة، وبيتكلم عن فكرة التعصب الأعمى، وإزاي ممكن نحلها،  وبيدور كمان في فلك الكوميديا حوالين مغامرات كابتن أنوش اللي قرر يحقق حلمه في الكورة، ويعمل فريق من أبناء الحارة، وده بيطلع مواقف كوميدية عالية ومختلفة.

وعلى الرغم من النجاح الجماهيري اللي لاقاه المسلسل، لكنه برضه لاقى هجوم محدود، لأنه حاجة كده زي ما تقول الراعي الرسمي للنادي الأهلي، وبيتكلم طول الوقت عن النادى، وعن فكرة التعصب الأعمى، اللي بيناقشها وهو برده بيعملها، لإنه متعصب للنادى الأهلى جدًا، عمومًا اتفرجوا وابعتولنا رأيكم.