The Definitive Guide to Living in the Capital , Cairo , Egypt

من صفات النجم الناجح إنه يهتم بالنقد اللي بيوجه له، يعني يتقبله ويستفيد منه، ويعلى عليه، والزعيم في وقت ما اتوجه له نقد أنه كبر في السن خلاص وكفاية عليه أدوار الحب والعشق والبنات الصغيرة اللي بتحبه وكده يعني، الزعيم بقى مازعلش من النقد ده، بالعكس استفاد منه وعمل (التجربة الدنماركية) وطلع فيه بدور أب لأربع شباب (قد الدولاب) ونجحت الفكرة جدًا، ومعاها طلعت الفكرة في دماغ الزعيم، فكرة الأسرة والأب اللي بيخلي باله من عياله وبيعدي المواقف الكتير ويتعب علشان خاطرهم.

اتعودنا من عادل إمام على الكوميديا العائلية، وأبرز نموذج لده هو مسلسل (صاحب السعادة) اللي قام فيه بدور أب غني مش بس فلوس لكن كمان غني بعياله وعيلته، وكان مسلسل كوميدي من الدرجة الأولى، السنة دي بقى معانا مأمون وشركاه اللي برضه طالع في دور الرجل الكبير الغني، بس مع كل الغنى ده هو (بخيل) وتقدروا طبعًا تتخيلوا كمية المفارقات اللي ممكن تطلع من حاجة زي كده، ويظهر إنها موضة السنة دي (موضة التكرار) يعني كل نجم كان عامل حاجة السنة اللي فاتت، يبقى السنة دي عامل حاجة شبهها أو حاجة نفس قريبة منها.

المسلسل شايل كمية نجوم بتخليه في الصدارة زي لبلبة الممثلة الجميلة واللي بتعرف تعمل أدوارها كلها بإتقان، وخالد سليم الشاب الواثق من نفسه، وكمان خالد سرحان اللي عمل دور حلو في المسلسل ده، والنجم مصطفى فهمي صاحب الموهبة والخبرة.

بتدور أحداث المسلسل حوالين مأمون (عادل إمام) الراجل البخيل جدًا اللي عنده زوجة (لبلبة) أو نقدر نقول توأم عادل في الفترة اللي فاتت، وكمان 4 عيال، واللي طبعًا ماكانوش يعرفوا أي حاجة عن ثروة والدهم اللي بتقدر بالمليارات.

بس مش هي دي قصة المسلسل كلها، لا دي كمان بتناقش فكرة التعايش بين الأديان وده بيبان في زوجات أولاده اللي منهم اليهودية والمسيحية، وفيه زوج بنته السلفي واللي خلى بنته تلبس النقاب، عايزينكم بقى تتخيلوا الكوكتيل ده لما يتجمع مع بعضه شكله هيبقى عامل إزاي، ده بس لما يتقابلوا، طب تخيلوا بقى لما يعيشوا مع بعض في بيت واحد..

وزي ما أنتم عارفين فكرة الأب البخيل اتعملت قبل كده في مسلسل (البخيل وأنا) لوحش الشاشة فريد شوقي وطبعًا كان فيه مفارقات كتير.. لكن الاختلاف هنا في الإنتاج وطريقة عمل الفريق من تصوير بزوايا جديدة وإخراج مختلف بيهتم بكل التفاصيل، وكادرات معتمدة على تعبيرات الوجه وكوميديا الموقف والسيناريو المكتوب بحرفية.