The Definitive Guide to Living in the Capital , Cairo , Egypt

أي حد بـ يحب الطبخ أو يهواه لازم يشوف برنامج «ماستر
شيف أستراليا» اللى بـ يذاع على قناة  فوكس
الفضائية، وده من البرامج المدبلجة (زي المسلسلات التركية كده). وده بـ يخلي أي حد يشوفه يقدر يفهم طبيعة
البرنامج، خاصة أن له شكل مختلف وغير تقليدي عن باقي البرامج الأخرى، فهو بـ يدخل في
إطار برامج المسابقات لأنه بـ يختار الآلاف من الأستراليين ثم تصفيتهم لـ 50 من بينهم
عدد من الطباخين المهرة، وبعد كده بـ يروحوا لجزيرة مشهورة بأستراليا لعمل باقي
الاختبارات هناك علشان في النهاية يتم اختيار أحسن شيف على مستوى أستراليا. ويتم اختيار
من بين 50 متسابق 24 بس وبـ تكون مسابقة الطبخ  في أماكن ومواقع مختلفة، ويتم تقييمهم على 3
محاورهى “التصميم، الإيمان بالنفس وطبخ
أكلات شهية ” وكمان بـ يكون فيه اختبارات للطبخ تحت الضغط وده الجميل والجديد
في البرنامج وده اللي بـ يخليه فريد من نوعه 
بين البرامج الثانية.

والجديد فيه أنه بـ يبدأ ينزل للمتسابقين صندوق
كبير من خلال طائرة هليكوبتر مليان كافة أنواع اللحوم والخضروات والفواكة وكل
أدوات الطبخ اللى ممكن يستخدمها المتسابقون لتحضير أطباقهم الشهية وفي خلال 45
دقيقة يجب على كل متسابق أن يحضر طبق شهي يحوز إعجاب الحكام.

والجميل في البرنامج أن كل واحد من الـ 50 بـ يقدم
نفسه سواء عمله أو عائلته يعنى سيرة ذاتية مصغرة وإيه الهدف من دخوله مسابقة الطبخ
وكمان بـ نلاحظ أن بعد إعداد الأطباق الشهية يبدأ يعلق كل واحد على اللى حضره وإيه
الأخطاء اللى وقع فيها يعنى يعتبر تقييم لنفسه أمام لجنة التحكيم قبل ما هي تقيَّمه
وبعد كده بـ يختار الحكام من الخمسين أفضل 4 أطباق وأسوأ 10 أطباق ومنهم يعملوا
مسابقة مصغرة ثاني للعشرة لاختيار أفضل خمسة بينهم وده شئ رائع جدًا في البرنامج
لأنهم بـ يعطوا فرصة للمتسابقين حتى آخر لحظة غير أن اختباراتهم ذكية ومبتكرة
وطريقتهم في الحكم على المتسابقين ممتازة وكمان بـ يختاروا في كل مرة لتقييم
المتسابقين واحد من أشهر الشيفات على مستوى أستراليا لتقييم أدائهم في الطبخ.

وفي آخر تصفيه يتم الاختيار بين 5 متسابقين ليكون
واحد فقط هو ماستر شيف ويقوم كل واحد منهم بتحضير أكلة مميزة ليتم وضعها في كتيب
واختبار 5 من ربات البيوت على مدى قدرتهم فى فهم وصفة كل واحد من المتسابقين
وتنفيذها وهل هـ يقدروا ينفذوها زى ما هو مكتوب لهم ولا لأ وده شئ جميل لأنه من خلال ده يقدروا
يقيسوا مدى تقبل الجمهور لتلك الأطباق ومدى سهولتها، وبعد كده بـ يقارنوا بين طبخ
ربة البيت والمتسابق ومدى نجاح كل منهم إلى أن يفوز من بينهم واحد فقط ليواجه تحدي
أكبر في صنع أصعب أكلة وهل سينجح فيها أم لا؟ هل سيكون لها نفس الطعم؟ حتى يحصل
على لقب “ماستر شيف أستراليا” ويكون له كتاب خاص في الطبخ ويحصل على
جائزة مالية كبيرة.

الهدف الأساسي في البرنامج أنه بـ يركز على
تحويل المواد الشعبية في أستراليا إلى وجبات مذهلة وشهية، ونقدر نقول أن البرنامج
ده مشابه في فكرته مسابقات ملكات جمال العالم لكن الجديد والفريد أن المسابقة
لتقديم أحسن شيفات في الطبخ وفي رأينا لو تم تطبيق زي البرنامج ده في الوطن العربي
هـ يحقق نجاح كبير وهـ يصنع متنافسين على مستوى عالى في عمل وجبات مميزة وشهية وكمان
التقنيات الخاصة بالبرنامج متفوقة جدًا بـ تجعل المشاهد مستمتع وغير قادر على الالتفات
لأى برنامج ثاني وده دليل على نجاحه.

لكن رغم كل ده إلا أن هناك بعض من الحكام
تعليقاتهم لاذعة جدًا تجاه بعض المتسابقين وده بـ يصيبهم بالإحباط على حد قولهم.