The Definitive Guide to Living in the Capital , Cairo , Egypt

يا ترى إيه الجديد اللي ممكن يقدمه لنا أي برنامج طهي ثاني بعد كل برامج الطهي دي، في وسط كل الزحمة دي بـ ييجي برنامج من "مطبخ أسامة"، بيننا وبينكم إحنا أمام برنامج للمحترفين.

الشيف أسامة كنا هـ ننسى ونقول "أسامة أطيب".. وده اسم البرنامج اللي اشتهر به الشيف على قناة دبى، بداية الشيف أسامة السيد كانت طبعًا على التليفزيون المصري لكن بعد كده ربنا فتحها عليه واشتغل في دبي سنين وسنين.

لغاية ما فاجئنا ببرنامجه الجديد على قناة cbc سفرة، وبكل حيادية هو واحد من أحسن برامج سفرة، مش هـ ننسى برامج كثير مميزة زي برنامج "الشيف" للشيف الشربيني ولا "حلو وحادق" لسالي فؤاد، بس برنامج "من مطبخ أسامة" عمل اختلاف كبير في شكل برامج الطهي على سفرة وتعالوا بنا نشوف فين الاختلاف.

طبخ تفاعلي وأكاديمي

أكاديمي في كل حلقة.. لأن الشيف بـ يعلمنا حاجة جديدة في المطبخ بـ تبدأ بإزاى تنظم مطبخك علشان الشغل فيه يكون أسهل وكمان اختيار أواني الطهي ونوع البوتاجاز وتضبيطات قبل العزومة.

وطبعًا هدف البرنامج الأساسي هو الطبخ، وده مش أي طبخ ده شغل المحترفين وهنا الشيف مش بـ يطبخ لوحده ده كمان بـ يشغل ضيوف الحلقة معاه في إعداد الأكلة وده جزء من التفاعل بينه وبين الجمهور علشان فريق البرنامج بـ ينزل الشارع ويسألهم عن رأيهم في موضوع الحلقة زي مثلًا حلقة إعداد التوابل في المنزل واللي استضاف فيها أحد العطارين علشان نستفيد من خبرته في عالم التوابل، وفي آخر الحلقة نطلع بنتيجة أن التوابل المطحونة في البيت أطعم وأوفر.

مطبخ الشيف أسامة عبارة عن ستوديو كبير وفيه مكان مخصص لضيوف الحلقة وكمان ساعات بـ يقدم هدايا عبارة عن مجموعة من كتبه وده حصل مثلًا فى حلقة عيد الأم.

ناقص حاجة واحدة كنا منتظرينها في مطبخ الشيف أنه زي ما بـ يطبخ الأكل الغالي بـ يطبخ الحاجات الثانية ويفكرنا شوية بأكل زمان، بس خلينا نقول أن ده سابق لأوانه شوية علشان البرنامج لسه في بدايته.

ودلوقت إحنا رمينا الكرة في ملعبكم إما تتفرجوا على أي برنامج طبخ وخلاص… أو تبتكروا أنتم وصفات أو تدخلوا على النت وتدوروا على وصفات.. أو تسألوا أهل الخبرة.. أو تشوفوا "من مطبخ أسامة".