The Definitive Guide to Living in the Capital , Cairo , Egypt

في زحمة مسلسلات رمضان من كام سنة بدأ يظهر شخصية فنان عربي يكون بطل مسلسل من المسلسلات، وأصبحنا كل رمضان نخمن يا ترى مين من الممثلين العرب اللى هـ يكون موجود السنة دي، السنة اللى فاتت كانت الفنانة اللبنانية ميريام فارس اللى أبهرت الجميع وهيفاء وهبي اللى قدمت مسلسل "كلام على ورق" وتعرضت لانتقادات كثيرة على أداءها للدور، السنة دي اتفاجئ الناس بهيفاء كبطلة لمسلسلين في رمضان منهم "مولد وصاحبه غايب" .

المسلسل بـ يتكلم عن "نوسة" فتاة فقيرة بـ تشتغل راقصة في المولد علشان تقدر تعيش، بـ تقع خلافات كثيرة بينها وبين زوجة أبوها (فيفى عبده)، وخلال الأحداث تقع في حب المهندس عمر (حسن الرداد) ويواجه حبهم اعتراض من والده رجل الأعمال (أحمد خليل) وبـ تتطور الأحداث وبـ تدخل نوسة السجن ولما بـ تخرج بـ تتحول حياتها وبـ تبقى سيدة مجتمع، ومازلنا بـ نتابع معاكم تطور الأحداث .

كان منتظر من هيفاء أن أداءها يكون تطور أكثر من كده خصوصًا بعد أداءها في مسلسل كلام على ورق، لكن للأسف أداء هيفاء كان سيء وغير مقنع وبعيد تمامًا عن ملامح البنت الفقيرة اللى بـ تمثل دورها وساهم في سوء الأداء الماكياج اللى ما كانش مناسب أبدًا لبنت فقيرة، وأداء باقي الممثلين كان بـ يفضح أداء هيفاء لما بـ تكون في مشاهد مشتركة .

بالرغم أن المسلسل بـ يضم نخبة كبيرة من الفنانين زي أحمد خليل وسميحة أيوب وفيفي عبده وحسن الرداد والمطربة الشعبية أمينة وحجاج عبد العظيم وباسم سمرة ومحمد كريم، إلا أنه ما حققش عنصر الجذب اللى المفروض كان يحققه، يمكن ده راجع إلى أن فكرة المسلسل نفسها مش جديدة ومكررة من أيام الأفلام الأبيض والأسود، ولأن أصلًا ما بقاش فيه موالد فيها راقصات دلوقت زي زمان، خصوصًا أن أحداث المسلسل بـ تدور في فترة قريبة وهي فترة حكم مبارك، حتى موالد السيدة والحسين اللى بـ تتعمل دلوقت بـ يبقى فيها حضرة وإنشاد ديني ما بـ يبقاش فيها الرقص اللى موجود في المسلسل ولا حتى في مناطق الصعيد، وبالتالي كان دور فيفي عبده وهيفاء وهبي غير مقنع .

منتظرين نتعرف على دور الفنانة سميحة أيوب أكثر خصوصًا أن أول ظهور لها كان متأخر لما قابلت نوسة لأول مرة في السجن وبـ تقوم بدور وهيبة الجارحي السجينة اللى هيفاء أكلت علقة سخنة بسببها من السجينات علشان ما وقفتش ووهيبة معدية.

منتظرين تأثير سميحة أيوب في المسلسل، واللى هـ تكشفه الحلقات القادمة .