The Definitive Guide to Living in the Capital , Cairo , Egypt

المثل القديم بيقول (من فات قديمه تاه) والمقصود بيه، أن اللي بينسى أصوله وتاريخه، مش هيكون له حاضر ولا مستقبل.

والحقيقة أن الدراما المصرية مليانة بأعمال نقدر نقول إنها خالدة في عقول وأذهان الناس. مش بس عند الشباب لكن عند كبار السن، وتقريبًا كل الأجيال شافت الأعمال دي، لكن الفارق أن الأجيال الأكبر شافتها في وقت عرضها لأول مرة، وبعد كده الأجيال اللي بعدها شافتها في إعادة الأعمال على التليفزيون أو على يوتيوب.

تعالوا نستعرض مع بعض 5 أعمال لا يمكن ننساها، لسة صالحة للمشاهدة في رمضان 2023.

 

مسلسل رأفت الهجان

الأب الروحي لكل مسلسلات الجاسوسية العربية، والعملاق اللي تعلم منه كل صناع الدراما في مصر، مسلسل رأفت الهجان مش مجرد مسلسل اتعرض وصالح للعرض حتى يومنا هذا وبيحقق نسب مشاهدة ممتازة، لكنه درس عظيم في إزاي ممكن عمل درامي يسيب أثر لا يُنسى في ذهن كل اللي شافوه، ويزرع جواهم الانتماء وحب البلد، من خلال قصة الجاسوس المصري رفعت علي سليمان الجمال (محمود عبد العزيز) ورحلته المذهلة داخل أرض العدو بتعليمات من المخابرات العامة المصرية. غني عن القول أن المسلسل مأخوذ عن قصة حقيقية وشارك فيه نخبة من أفضل وألمع نجوم مصر. منهم يوسف شعبان ومحمد وفيق ومصطفى متولي ويسرا وصبري عبد المنعم وغيرهم.

 

مسلسل لن أعيش في جلباب أبي

عن قصة نجاح رجل عصامي مكافح في عالم التجارة، بنتعرف على الشاب (عبد الغفور البرعي) اللي بيوصل وكالة البلح ويشتغل فيها صبي في ورشة بتبيع قطع غيار السيارات والحديد الخردة، لحد ما بيكون من أغنى التجار في مصر. المسلسل عن قصة إحسان عبد القدوس ومن بطولة نور الشريف وعبد الرحمن أبو زهرة وعبله كامل ومحمد رياض. ويكفي أننا نقول إن لحد النهارده ماحدش يقدر يفوت حلقة فرح سنية لو شافها على يوتيوب أو على قناة على التليفزيون بالصدفة!

 

فوازير المناسبات

كانت الفوازير واحدة من أشهر علامات الشهر الكريم. وفوازير المناسبات كان لها مكانة خاصة بسبب تصميم الرقصات والأغاني المختلفة فيها. بالإضافة لحبكة كل فزورة واللي بتناقش مناسبة من المناسبات في مجتمعنا، والمشاهد عليه إنه يستنتج ايه المناسبة دي ويبعت الحل على مبنى الإذاعة والتليفزيون، عن طريق الواتس آب أو الإيميل؟ (ماكانش فيه حاجة اسمها واتس آب أو إنترنت في مصر سنة 1988. الإجابات كانت بتتبعت بالبريد التقليدي) علشان يدخل في سحب للفوز بجوائز قيمة.

الفوازير كانت من بطولة يحىي الفخراني وهاله فؤاد وصابرين ورجاء الجداوي وغيرهم من نجوم الفن. ولسة الفوازير بتتشاف لحد النهاردة على قنوات زمان، وعلى اليوتيوب.

 

كارتون بكار

أحلى برنامج ترفيهي للأطفال في شهر رمضان كان مسلسل بكار، المسلسل الكارتوني الأشهر بأيدي مصرية 100٪ وده كان تحدي كبير في وقتها،  وبغناء تتر مميز لمحمد منير، وكان الأطفال بيقضوا أمامه وقت ممتع ويسيبوا الكبار للعزومات وخلافه.

كارتون بكار اتعمل منه أكتر من موسم، بس النسخة الأولى منه هي الأفضل، ولسة بتتشاف لحد دلوقت على يوتيوب وغيرها من القنوات المهتمة بعرض الأعمال القديمة.

 

الكاميرا الخفية

وأخيرًا.. البرنامج خفيف الظل اللي لسة بيحقق مشاهدات لحد النهارده. واللي كان بيقدمه النجم الراحل إبراهيم نصر، وكان سبب انطلاق شهرته في مصر والوطن العربي.

الكاميرا الخفية نفسها كفكرة برنامج مقالب، بتتقدم من قبل كده بكتير، ولحد دلوقت فيه منها نسخة شهيرة هي برامج رامز جلال، لكن عندنا اعتراض كبير على الطريقة اللي بتتنفذ بيها حاليًا.

نسخة إبراهيم نصر في رأينا أكتر نسخة قابلة للمشاهدة لحد النهارده. لأن خفة الدم اللي فيها لسه بتضحكنا لحد دلوقت من خلال المواقف اللي بتعملها (زكية زكريا) بدون أي إهانة أو استهزاء بالضيوف زي ما بيحصل مؤخرًا.