The Definitive Guide to Living in the Capital , Cairo , Egypt

بدأ الموسم الثانى من برنامج The Voice مع نفس طاقم العمل ونفس لجنة التحكيم، من إخراج جنان منضور وباسم كريستو والممثل المصرى محمد كريم هو كمان مكمل فى الموسم الثانى كمقدم فى البرنامج، بـ يعرض على قناة mbc مصر وmbc كل يوم سبت فى الثامنة مساءً، وسبق كتبنا مقال نقدي عن الموسم الأول.

ديكور البرنامج زى ما هو فى الموسم الأول عبارة عن مسرح و4 مقاعد للتحكيم ملفوفة للظهر ولما بـ يعجب محكم بصوت من الأصوات بـ يضغط على الزر اللى فى الكرسى بتاعه ويلف للمتسابق وإذا لف أكثر من محكم بـ يكون للمتسابق حق اختيار المدرب اللى شايف أنه هـ يستفيد منه وهـ يوصله للنهائيات.

أما الجديد فى الموسم الثانى هو “مناورة الاقتناص” اللى بـ تفتح المجال لكل مدرب من المدربين الثلاثة الآخرين أنه يتدخل ويضرب الجرس ويضم المتسابق المستبعد لفريقه وإتاحة الفرصة مرة ثانية أمامه للمنافسة لكن بشرط يكون مع مدرب ثانى غير المدرب اللى اختاره فى مرحلة الصوت وبس.

بدأت حلقات “ذا فويس أحلى صوت” الموسم الثانى فى آخر أسبوع من ديسمبر الماضى، ولأن هدف البرنامج البحث عن أحلى صوت كانت كل الأصوات المشاركة فى الحلقة الأولى مميزة وجميلة حتى الأصوات اللى لجنة التحكيم ما لفتش لها، لكن هم معذورين لأنهم بـ يبحثوا عن أحلى صوت، لكن كانت فيه أصوات أبهرت لجنة التحكيم من الحلقة الأولى زى “غازى الأمير” و”سناء عبد الحميد” و”عدنان برسيم” اللى أصواتهم أجبرت لجنة التحكيم أنهم يلفوا الكراسى الأربعة ويتنافسوا على ضم الأصوات دى لفريقهم.

وفى الحلقة الثانية كانت فيه مفارقات مدهشة منها تنافس عاصى الحلانى وكاظم الساهر على صوتين أخوات واللى حصل أن عاصى ضم غازى خطاب لفريقه وكاظم قدر أنه يضم عمار خطاب لفريقه وبكده من أول حلقة 2 أخوات قرر القدر أنهم يتنافسوا على أحلى صوت.

واتكرر الموقف ثانى بين الأختين حنين وهالة واستطاع كاظم أنه يضم حنين لفريقه وعاصى ضم هالة لفريقه، وغير المفارقات كان فيه مفاجأة وهى حضور أحد المتسابقين فى الموسم الأول وهو “فريد غنام” الشهير بفراولة واللى حضر علشان يدعم أحدى المتسابقات ولكن ما حالفهاش الحظ.

أما فاكهة الحلقة كانت الموهبة اللبنانية “أنجريد بواب” اللى لفتت انتباه المدربين الأربعة بصوتها لما غنت If I Ain’t Got You” وفضل عاصى وصابر كالعادة يتنافسوا بالعبارات علشان يضمها كل واحد لفريقه وشيرين وكاظم كمان حاولوا يقنعوها لكنها حسمت قرارها واختارت أنها تكون فى فريق القيصر كاظم الساهر.

أما الحلقة الثالثة كانت فيها مفاجأة حلوة جدًا لكل المصريين وهى أن المتسابقة “مروة ناجى” حازت على إعجاب لجنة الحكام بشكل غير عادى لدرجة أنهم لفوا الكراسى الأربعة من أول كلمة غنتها وقالوا لها بصراحة أنتى “ذا فويس” ورغم حيرتها تختار مين من المدربين لكنها قررت تختار صابر الرباعى.

وبـ يستمر فى الموسم ده عاصى وصابر فى قفشاتهم الكوميدية اللى بـ تضفي روح جميلة ومبهجة على البرنامج.