The Definitive Guide to Living in the Capital , Cairo , Egypt

في
بلاتينوم مول الموجود في شارع شهاب وبعد ما تطلع دور وراء دور على السلالم
المتحركة وتشوف كم كبير من المحلات المهجورة والأدوار المظلمة بالكامل هـ توصل
الدور السادس وتلاقي «بلاتينوم جيم – Platinum gym».

عدد
من المشايات موجود في منطقة أجهزة اللياقة والجري وشكلها تقليدي وقديم شوية
بالمقارنة بباقي الأجهزة، لكن في نفس الوقت سهلة الاستخدام والبرمجة. الأجهزة كلها
أمام الشباك اللي بـ يطل على شارع شهاب، وفيه شاشة تليفزيون بين كل مشايتين. خلف
صف المشايات صف ثاني من أجهزة التجديف أو Rowing Machines ولو كنت بـ تستخدمها والمكان زحمة شوية هـ تحس أن المسافات قريبة
قوي بينك وبين الناس اللي بـ تتمرن على المشايات أمامك. والأجهزة اللي استخدمناها
في القسم ده كانت كلها نظيفة وناعمة في الاستخدام.

من
ضمن أدوات التدريب لقينا حاجة مش متعودين نشوفها في أي جيم في القاهرة؛ وهي حزام
المقاومة أو Resistance
Band وكان موجود بألوان
كثيرة والمهم فيه أنه متعدد الاستخدامات لأن كل وضع للشريط المطاط على كل جزء من
الجسم له تأثير معين وبـ يحرك عضلات وأعصاب مختلفة، وأكيد هـ تحتاج مدرب علشان
يعرفك طريقة التدريب المثالية بالحزام.

قسم
التدريب الخاص بالأوزان الحرة والدامبلز مُقسم إلى جزئين: الأوزان الحرة والأوزان
الحرة الخفيفة. وفي الركن الأخير فعلًا بـ تلاقي مجموعة من الدامبلز اللي أوزانها
خفيفة جدًا للمبتدئين، لكن المشكلة أن المساحة صغيرة جدًا في القسم ده، ووقت ما
كنا هناك كان فيه مجموعة من اللاعبين الضخمين جدًا في القسم ده فـ كنا حاسين
بالزحمة بزيادة، وكان كل شوية الناس تخبط في بعض غصب عنها ويعتذروا لبعض!

ورغم
أن العاملين في المكان بـ يركزوا أكثر على التدريبات الفردية للأعضاء، لكن دائمًا
هـ تلاقي واحد بـ يمر ويتابع المتدربين الزوار، والميزة أنهم كانوا عارفين الأتيكيت
بتاع إمتى يتدخلوا وإمتى يسيبوك براحتك.

فيه
ستوديو تدريب في الجيم بـ يقدم حصص مختلفة زي تعليم رقص الصلصا واليوجا والصينية
والبيلاتس والكيك بوكسينج، وكل الحصص دي بـ تكون مجانية للأعضاء.

فيه
ركن خاص بالساونا وغرف البخار اللي بـ تكفي 8 أشخاص في نفس الوقت، وفيه جاكوزي. غرفة
تغيير الملابس ضيقة جدًا، وإحنا ممكن نتفهم ده، إنما اللي ما قدرناش نفهمه هو حالة
الحمامات والدش! النظافة قليلة جدًا في الحمامات والجاكوزي، والرائحة بالداخل لا
تطاق، والأرض مبللة وما كناش عارفين نحط رجلنا فين.

اشتراك
لمدة سنة هـ يكلفك 3450 جنيه، والعضوية بـ توفر لك 4 مدربين متخصصين بـ يتابعوا
تدريباتك ووزنك وقياساتك على الأجهزة وإزاي بـ تتقدم على مدار السنة. كمان هـ
تستفيد بـ 15 جلسة مساج و14 دعوة ممكن تدَّخل بهم أصحابك أو عيلتك لاستخدام يوم واحد.
اشتراك لمدة 6 شهور بـ 2400 جنيه، 3 شهور بـ 1600 جنيه، والشهر الواحد بـ 750
جنيه.