The Definitive Guide to Living in the Capital , Cairo , Egypt

صحة ولياقة

حافظ على شعورك بالدفء فى القاهرة خلال الشتاء

حافظ على شعورك بالدفء فى القاهرة خلال الشتاء
بواسطة
Hannah Cooper
جاء الوقت ده من السنة من ثانى ورجع الشتاء بسرعة زى كل مرة. ونتيجة لقصر فترة اليوم وطول وقت الليالى الساقعة، كثير مننا حاسس بما يسمى “الإحباط الشتوى”. أعراض الكسل، والفتور وانعدام الإحساس بأى حافز كلها أعراض متشابهة عند كثير من الناس.
الكلام ده بـ يحصل نتيجة تغيير المواسم اللى صعب تتعامل معاها لو ما عندكش القدرة على التكيف السريع. عندنا لحسن الحظ مجموعة متنوعة من الطرق البسيطة تساعد على التخلص من الإحباط والاستمتاع بشتاء مبهج ومريح.

تعرض لأشعة الشمس

فكرة واضحة طبعًا زى الشمس لكن ممكن تتنسى وأنت متغطى بالبطانية وفرحان بالدفء. التعرض لأشعة الشمس بـ يحفز المستقبلات الحسية فى العقل المتحكمة فى الحالة المزاجية. تمشى أو خلى الشبابيك مفتوحة خلال اليوم علشان تدخل مزيد من أشعة الشمس. حتى أسهل الطرق بأقل مجهود زى الجلوس قريب من الشباك وأنت قاعد فى الكافيه ممكن تساعدك. الفكرة كلها أنك تستفيد على قد ما تقدر من مصدر فيتامين “د” الممتاز.

اتمرن!
الكلمة دى لوحدها كفاية تخليك تسمع تأوهات واعتراضات كثيرة، بس أول ما تصبح عادة، تعتبر طريقة علاج ممتازة وفوائدها كثيرة. التمرين مانح فورى للطاقة وبـ يزود من عملية التمثيل الغذائى وكمان بـ يقوى جهاز المناعة وينشط العقل، ده غير مزايا ثانية كثير. إحنا بـ ننصح بتمارين اليوجا المجددة للطاقة علشان تعتبر تمارين لطيفة وتقدر تعملها بسهولة وأنت مرتاح فى البيت. افرش فوطة أو سجادة وابدأ فى ممارسة اليوجا عن طريق مجموعة دروس مقدمة أون لاين من YogaGlo.

تناول أكل طازج
شهور الشتاء بـ تولد إحساس غريب من الاشتياق لمصادر الكربوهيدرات البسيطة زى الخبز الأبيض والسكر، واللى كل وظيفتهم أنهم يقللوا من مستويات الطاقة عندك ويغيروا من حالتك المزاجية. فبدل ما تمشى وراء الإحساس ده، ركز على الفواكة الموسمية والخضروات زى اليوسفى، والرمان، والفجل والكرات. وبجانبهم كمان اشرب مياه كثير ومشتقات الحبوب زى الأرز والخبز، وجسمك وعقلك هـ يحسوا بتركيز أكثر وزيادة فى الطاقة.

اوعى تقلل من وقت نومك

زى كل الكائنات الحية، طبيعى أن أجسامنا بـ تحتاج نوم أكثر خلال شهور الشتاء. وللناس اللى جدول مواعيدهم دائمًا مزدحم، إدارة وقتك ممكن تصنع المعجزات. بكل سهولة حدد لنفسك هدف تسعى له. واظب على مواعيد نوم وصحيان محددة، وبكده جسمك بـ يتعود عليها. ولو تقدر كمان تأخذ قيلولة بسيطة من 10: 20 دقيقة هـ تفرق معاك كثير. أنت أكثر واحد يقدر يحكم احتياجات جسمك وعلشان كده لازم تخلى بالك منها.

حب نفسك!
أهم عامل من العوامل السابقة تأثيرًا عليك هى أنك تحب نفسك، وتستمتع بشوية من الراحة كل فترة والثانية. ممكن ده يحصل بطرق كثير، وحتى لو وقتك ضيق، القليل منها بـ يبقى له تأثير كبير عليك. احجز جلسة مساج أو عشاء مع صديق. وبالنسبة للبيت إضافة معطرات بروائح شتوية ممكن تخلق جو مريح: جمع شوية قرنفل، ولحاء القرفة وقشر البرتقال على صفيحة الفرن. اخبزهم لمدة ساعة أو اثنين على درجة حرارة قليلة والرائحة هـ تنتشر فى البيت فورًا. كمان، الزيوت العطرية فى الحمام أو المضافة مباشرة للبشرة ممكن تبقى مفيدة. على سبيل المثال، النارنج ممكن يساعد على رفع الروح المعنوية. ممكن تجرب النعناع كعلاج للنعاس وشجرة الشاى بـ تصنع المعجزات فى علاج الاحتقان. لو عاوز تشترى زيوت، اتفرج على تشكيلة نفرتارى بأسعارها المعقولة.

لمقالات أكثر عن الصحة واللياقة على كايرو 360، اضغط الرابط ده. كل شتاء وأنتم طيبين.

مقترح