دليل صحة ولياقة القاهرة، أحدث المقالات عن صحة ولياقة مصر

صحة ولياقة

بالصور: مواقف إنسانية من أولمبياد ريو 2016
اصدرت في: 18/08/2016

فيه مواقف بنمر بيها في حياتنا بتبين لنا معدن البني أدمين اللي قدامنا، وإذا كانت أخلاقهم فعلًا أخلاق رياضية ولا مجرد شعارات لناس بتتنافس على ميداليات. وشفنا حاجات كتيرة من دي في أولمبياد ريو 2016. ومن ضمن المواقف اللي أثرت فينا في أولمبياد ريو 2016 : مروى العمري اللي حصلت على الميدالية البرونزية وزن 58 كلغ في رياضة المصارعة الحرة، اهدت تونس ثاني ميدالية بريو. برضه الجمال اللي فاجأنا وسط الألمبياد في سباق نصف النهائي الجري 5000 متر، ضحت المتسابقة النويزيلاندية نيكي هامبلن بالفوز علشان تساعد زميلتها آباي داجوستينو اللي عضلاتها خانتها فجأة وسط السبق، بس هنا المفاجأة كانت من الاتحاد الدولي لألعاب القوة اللي اعتبر الاتنين فايزين وسمح لهم بالمشاركة في النهائي 5000متر. بالرغم من وجود الأخلاق الحلوة إلا أن العكس موجود برضه، وروح المنافسة ممكن تعمي صاحبها وتخليه يعمل أي حاجة زي أوريلي مولر اللي حاولت تغرق منافستها الإيطالية أول لما قربوا من خط النهاية واتحرمت من الميدالية الفضية.

...

أرقام مستشفيات وصيدليات ممكن تحتاجها في سفرية الساحل
اصدرت في: 17/08/2016

نعتقد أن مجرد ذكر سفرية الساحل جدير بأنه يعدل الموود ويخليك تحس بطاقة إيجابية، ولكن لازم نعترف أن أحيانًا بتحصل مواقف تحتاج تدخل طبي –لا قدر الله- وعلشان كده إحنا قررنا نجمع لك مجموعة من الأرقام المهمة للمستشفيات والصيدليات الموجودة على طريق الساحل. مستشفى سيدي كرير للطوارئ وعلاج الحوادث (مستشفى مبارك سابقًا) الكيلو 39.5 منطقة سيدي كرير، قريبة من مستشفى آمون. التليفون: 033402090 مستشفى العلمين المركزي الكيلو 107 طريق إسكندرية – مطروح، عند مارينا 7 التليفون: 0464100212 مستشفى مارينا المركزي داخل مارينا 2 تليفون: 0464060833 مستشفى سيدي عبد الرحمن الكيلو 130، منطقة سيدي عبد الرحمن تليفون: 0464680044 الصيدليات متوفرة في بكثرة في الساحل، ولكن أهمها صيدليات العزبي؛ واللي لها فروع كثيرة في مارينا وهاسييندا باي، ولكن تقدر تكلمهم على الرقم السريع وهما هيوصلوا لك في أي مكان في الساحل على 19600. وبما أن الحيوانات الأليفة مهمين، دي أرقام وعناوين مهمة ممكن تحتاجوها: مستشفى الحيوان البريطانية هي ما لهاش مقر في الساحل، ولكن فيه مجموعة من الأطباء المتخصصين تبع المستشفى متواجدين هناك، واللي ممكن تتصل بهم على 01023330245 و01005449533 د. مصطفى أمين وهو متواجد في العجمي، ورقمه 01023121392 ولو عايز مستلزمات لحيوانك الأليف، محل وان دوج زون – 1 Dog Zone متواجد في مراسي بسيدي عبد الرحمن، وأجمل حاجة أنه بيوصل في الساحل، كلمه على 01115079999. أجازة سعيدة من غير مفاجآت.

...

أجمد 8 أماكن تقضي فيهم يوم على حمام السباحة في القاهرة
اصدرت في: 25/07/2016

الصيف وجماله وحلاوته وبهجته.. كلنا بنحب الصيف مفيش كلام، بس أكيد مش بنحب الجو ده وإحنا مزنوقين في القاهرة بزحمتها وحرّها معظم الوقت. المهم أنك تفتكر حاجتين مهمين في العيد موجودين في القاهرة: أولهم مافيش زحمة، وثانيهم في فنادق كثيرة بتعرض أسعار مميزة لتقضية يوم على حمام السباحة طول الصيف بدل ما نفضل نحسد أصحابنا اللي بيقضوا الصيف وسط الشمس والبحر والرمل. خلاصة الموضوع أن الصيف وصل، فخلونا نبدأ الاستمتاع به. محمد علي رويال كلوب هو المكان المعروف باستضافته أفراح وسهرات هايلة، مش بس كده، ومحمد علي رويال كلوب كمان عنده حمام سباحة عظيم تقدر تتفرج منه على المعمار الإسلامي المبهر. تقدر تقضي هناك بيوم كامل على حمام السباحة مع أصحابك وعائلتك بسعر 200 جنيه للفرد. ريتز كارلتون النيل لو نفسك تقضي يوم ممتع على حمام سباحة في قلب القاهرة، عليك وعلى ريتز كارلتون. ادفع 1400 جنيه لفردين واستمتع بحمام سباحة ريتز كارلتون النيل الضخم مع كابينة مجهزة بالكامل ومكسرات وفواكه موسمية ومشروبات غازية وكمان تقدر تدخل المنتجع الصحّي. الفندق كمان بيعرض باقات إضافية للأكل لفردين سعرها 600 جنيه للسي فوود أو 500 جنيه للمشويات علشان تقدر تستمع بيوم مثالي. لمعلومات أكثر اتصل على 0225778899. مينا هاوس لو عايز تقضي يوم للذكرى على حمام السباحة وسط إطلالة جميلة، مينا هاوس هو المكان المناسب. ادفع 350 – غير شامل غرفة – واستمتع بحمام سباحة مينا هاوس العملاق مع وجبة لذيذة، أو 700 جنيه لغرفة ثنائية وبرضه شاملة وجبة. للاستعلامات والحجز، اتصل على 02-3377-3222. كونراد استغل أجازة العيد واستمتع بمنظر النيل ووسط البلد وأنت بتعوم في حمام سباحة فندق كونراد. ممكن تقضي يوم على حمام السباحة مقابل 708 جنيه، وكمان تقدر تستخدم الساونا والجيم واللوكرات. لمعلومات أكثر عن العرض، اتصل على 02-2580-8000. فيرمونت نايل سيتي مع حمام سباحة فيرمونت نايل سيتي الموجود فوق روف الفندق وإطلالته الرائعة على القاهرة كلها – واللي أماكن قليلة في القاهرة بتقدر توفر مكان زيه – تقدر تقضي يوم عليه وتستخدم الساونا وغرفة البخار. لمعلومات أكثر عن أسعار فيرمونت، اتصل على 02-2461-9494. سوفيتيل الجزيرة يمكن حمام سباحة سوفيتيل مش أحسن اختيار للسباحين المحترفين، لكن حمام السباحة الإنفينيتي يعتبر من أحلى الأماكن للاسترخاء خصوصًا مع الإطلالة الرائعة على النيل. ممكن تحجز غرفة بسعر +600 جنيه وتستمتع بواحد من أحلى حمامات السباحة الموجودة في القاهرة. سيزونز كانتري كلوب يمكن للوهلة الأولى سيزونز كونتري كلوب مش أول مكان هيخطر على بالك لتقضية يوم على حمام السباحة، لكن الأكيد إنه مكان هايل للاستمتاع بوقت لطيف مع عائلتك. ادفع 200 جنيه واستمتع بيوم على حمام السباحة، ولما تروح ننصحك تشوف الأكل في المطعم. لمعلومات أكثر اتصل على 02-3838-7389. سقارة كانتري كلوب أخر مكان معانا يعتبر من أحسن حمامات السباحة من ناحية الأسعار، سقارة كانتري كلوب بيقدم عرض مميز لتقضية يوم على حمام السباحة بسعر 230 جنيه للفرد. صحيح الغرف الموجودة في الكلوب مخصصة للأعضاء فقط، لكن تقدر تستمتع بيوم على حمام السباحة شامل وجبة غداء.

...

أوسانا: منتجع الصحة واللياقة وأقصى درجات الراحة في المعادي
اصدرت في: 10/07/2016

شوفنا خلال السنين الأخيرة أهل القاهرة بيتبعوا مفهوم جديد للحياة الصحية، يعني مثلًا أجهزة الجري تغيرت لمفارش يوجا وملابس التمرين التقليدية تحولت لبنطلونات leggings مريحة وغنية بالألوان المبهجة. المختصر المفيد، أهل القاهرة فهموا أن الحياة الصحية مش مجرد نظام دايت وشوية تمشية – وقدرنا إننا نفهم أن في طرق بديلة كان من الصعب نوصل لها في مصر. الثقافة دي انتشرت بشكل أكبر مع زيادة عدد مراكز اللياقة، ومعانا النهارده واحد من أجدد الإضافات في عالم الصحة واللياقة اللي قدر يعمل ضجة في المعادي. مركز أوسانا ويلنس سنتر تحت إشراف ستيف دوبل ونينا سراج وسميه هولديك قدر يثبت نفسه ويقدم أوراق اعتماده للجمهور، والمميز هناك إنه بيأسس لفكرة مهمة وهي إن التمرين مش مجرد "وقت لطيف" بنقضيه وخلاص، لكن الموضوع هو التزام مستمر ورغبة من الناس إنهم يحسنوا أسلوب حياتهم. المركز موجود في منطقة سرايات المعادي الرائعة، وأول لما تدخل من باب أوسانا البنفسجي مش هتقدر تقاوم انبهارك من الهدوء وأجواء المكان المميزة. أوسانا بيقدم مجموعة متنوعة من التمارين المهمة للجسم والعقل، مع عدد من الحصص وورش العمل لكل أفراد العائلة، وكمان مجموعة كبيرة من التمارين الصحية وحصص بدون أحذية منها حصص يوجا – هاتا فلو يوجا، أكرو يوجا، فينياسا، بريناتال – وبيلاتس وتاي تشي وإيقاع ورقص وغيرهم. فكرة أوسانا بدأت لما المصور المعروف ستيف دوبل وزوجته نينا سراج وسميه هولديك حلموا بتقديم مركز لياقة يحقق احتياجات كل أفراد الأسرة. وقال ستيف في بداية كلامه معانا "أوسانا يعتبر واحة من الهدوء وسط الدوشة والزحمة اللي بنعيشهم في القاهرة. مكان تقدر تحس فيه بالراحة والهدوء وتجتمع مع أصحابك. مكان تقعد فيه مع عائلتك وتقضي وقت مع الناس اللي يهموك وتلاقي فيه كل حاجة من الأكل للعلاجات الصحية لحصص اليوجا والبيلاتس". المركز محاط بجنينة جميلة مجهزة بمنطقة ألعاب أطفال كبيرة وقعدات حواليها ورد جميل. يمكن أكثر حاجة عجبتنا في أوسانا في المنطقة الآوت دوور هي الستوديو الخشبي اللي بينظموا فيه حصص اليوجا. مركز أوسانا عبارة عن فيلا من 3 أدوار مقسومين لأقسام بيعملوا فيها الحصص وجلسات الطب البديل. جنب الاستقبال هتلاقي غرفة أطفال كبيرة مجهزة بكتب ومنطقة ألعاب صغيرة وكمان مخصصين مكان لتنظيم ورش عمل للأطفال. بعدها تكلم ستيف معانا عن طموحه لأوسانا وقال "بصفتي من عشاق اليوجا، بتواجهني مشكلة إن بعد التمرين مفيش مكان أقدر استريح فيه واتكلم مع الناس. عندنا مشكلة ثانية بتواجهنا في القاهرة وهي نقص أماكن اللعب للأطفال على عكس أوروبا المليانة حدائق في كل مكان". كافيه wholefood أوسانا موجود في الدور الأرضي، وتقدر تستمع فيه بماكياتو لذيذ، وكمان الكافيه بيقدم غداء يومي مختلف، ووقت زيارتنا كانوا عاملين شوربة عدس بالفلفل المشوي والجبن الشيدر، مع شوربة خضار وبروكولي وطحينة. وكمل ستيف كلامه وقال "فكرة الكافيه عندنا بسيطة جدًا. هتلاقي فيه الحاجات اللي بتشوفها في أي مدينة أوروبية صغيرة –ممكن نقول عليه كافيه بيقدم أكل صحي بأقل كمية زيت وأقل أكلات مصنعة مع استخدام أكلات موسمية وعضوية. الكلام ده بيقدم لأجسامنا طريقة أكل صحية تساعد على تحسين الصحة العامة. لازم كلنا نحافظ على عقولنا وأجسامنا ونركز كويس على الأكل اللي بيدخل لهم". أوسانا ملتزمين بشعارهم وهو "العقل والجسم والرياضة" وعشان كده بيقدموا مجموعة متنوعة من العلاجات البديلة من التمارين الرياضية زي craniosacral therapy ومساج القدم reflexology وعلاج العظام osteopathy والعلاج بالإبر الصينية acupuncture، وكمان العلاج بالطاقة اللي يشمل العلاج بالكريستال crystal healing وعلم الأرقام numerology والريكي reiki وأنواع مساج مختلفة تشمل مساج عطري وشياتسو shiatsu وتشي ناي تسانجchi nei tsang ، أما خدمات ما قبل وبعد الولادة فبرضه متاحة، وهنا ييجي الدور على سميه وخبرتها الكبيرة. تكلمنا مع سميه اللي قالت "إحنا بنحاول نعمل مجتمع صحي من كل أفراد الأسرة بمختلف أعمارهم، مجتمع مكون من مجموعات بتشجع بعضها زي مجموعات دعم مرضى السرطان، ومجموعات عدم القدرة على الإنجاب وغيرهم". أوسانا بيقدم مرة شهريًا عيادات مختلفة وكمان جلسات مجانية وعلاج للناس اللي متقدرش تدفع تكلفة الجلسات. الفكرة إن فريق العمل في أوسانا عندهم خطة طويلة الأجل وهي تعريف الناس بأهمية وطرق المحافظة على صحتهم وحياتهم. وشرحت سميه أكثر وقالت "اللي شوفناه في عالم الصحة واللياقة إن الناس بتعتبر الصحة رفاهية رغم إنهم في الحقيقة من الأساسيات. الصحة أسلوب حياة". حصص أوسانا بدون أحذية تشمل تاي تشاي وتشي كونج وتكلفتها بتكون 100 جنيه، أما اليوجا والبيلاتس فسعر الواحدة 120 جنيه. المركز كمان بيقدم عرض للحصص اللي سعرها 100 جنيه، بحيث لو اشتركت في 10 حصص تدفع 850 جنيه - العرض ساري لمدة 6 أشهر - أو تحضر أي عدد من الحصص لمدة شهر واحدة بسعر 1100 جنيه، والناس يقدروا يروحوا ويجربوا جلسات مختلفة ويختاروا الأنسب لهم. وقالت سميه "بنعرف من المشتركين هدفهم إيه من الحصص ولو كانوا بيشتكوا من أي مشاكل جسدية أو صحية بحيث نقدر نتعامل معاها. لو عندك مثلًا مشكلة في الظهر، ننصحك ببالإبر الصينية acupunctureوعلاج العظام osteopathy وcraniosacral therapy أو العلاج الطبيعي، أما اليوجا فتعتبر علاج هايل لمشاكل الهضم والقولون. المهم إننا نوصل في النهاية للصحة الجسدية والنفسية المناسبة". ولما سألنا عن موضة الاهتمام بالصحة اللي بنشوفها من فترة، قال ستيف إن من الرائع دخول ناس أكثر في عالم الصحة واللياقة، بس المشكلة إن كثير منهم بيهتموا بالقوة على حساب المرونة، رغم إنهم محتاجين أكبر من مجرد القوة العضلية للحفاظ على صحتهم. أما سمية فبتشوف إن مشكلة زي السمنة مش سببها الأكل وبس، الموضوع له جانب شعوري لازم يتعالج الأول، ولما يقدر مريض السمنة يواجه مشاكله النفسية ويمشي على نظام أكل وحياة صحية، هيقدر ينزل في الوزن بصورة طبيعية. وأضافت سمية "أعتقد إن ناس كثيرة عارفين إن الموضوع محتاج وقت، خصوصًا لو عندك مشكلة مزمنة. الموضوع مش بيخلص بدواء سحري. العلاج محتاج وقت، وممكن يستمر لسنين. أهم حاجة في الموضوع هو الالتزام والرغبة في التحسن وإننا نفهم إن الصحة الحقيقية بتتحقق بمنظومة متكاملة". من خطط أوسانا الفترة القادمة الاحتفال باليوم العالمي لليوجا في القاهرة مع مراكز صحية ثانية بهدف نشر ثقافة الصحة والإيجابية في كل القاهرة، وفي اليوم ده كل الستوديوهات هيعملوا يوم مجاني لممارسة اليوجا. أوسانا كمان طول شهر رمضان عاملين أنشطة كثيرة منها جلسات استرخاء forgiveness meditation sessions أيام الثلاثاء والأربعاء ويوم خاص لليوجا وسلسلة حصص يوجا Vinyasa Flow قبل الفطار وبعدها الاستمتاع بفطار لذيذ مع ساعة من يوجا restorative yoga. لسه حكايتنا مع أوسانا مستمرة، أصل فريق أوسانا قرروا يعملوا حديقة للتأمل حوالين الستوديو، وهي حديقة عامرة بالخضروات الأورجانيك، وهيكون فيها اجتماعات أسبوعية زي سهرة لمشاهدة فيلم ورحلات تخييم، وطبعًا هيكون في حصص إضافية زي الرقص والباركور. وختمت نينا سراج الكلام وقالت "فكرة أوسانا قابلت ترحيب كبير من أولياء الأمور. الفكرة أصلًا بدأت لما مقدرناش نلاقي لعب آمن لأطفالنا. وفي أمهات كثيرة قابلوني وشكروني على أوسانا". لمعلومات أكثر عن أوسانا، ممكن تتابعوا موقعهم الرسمي وصفحتهم على الفيسبوك وإنستجرام.

...

خمس نصائح مهمة للحفاظ على صحتك في رمضان
اصدرت في: 13/06/2016

مرحب برجوعك يا رمضان! شهر الأنوار في الشوارع والفوانيس بكل أحجامها وأشكالها والمدافع في ميادين القاهرة وموائد الرحمن في الشوارع. لكن وسط كل الروحانيات والأجواء المميزة للشهر الكريم، ناس كثير بتعوض وقت الصيام الطويل بنظام أكل غلط بيصعب عليهم الصيام. علشان كده بنقدم لكل واحد بيحب يستمتع بوجبة فطار قوية نصائح تساعده على الصوم وكمان تزود جسمه بكل العناصر الغذائية الضرورية. لازم وجبة الفطار تشمل كل أنواع الأكل لازم الفطار يتكون من أكلات تضمن أن جسمك يحصل على كل العناصر الغذائية اللي فقدها وقت الصيام. ممكن مثلًا تكسر صيامك بشوربة تعوض السوائل المستهلكة في الصيام. بعدها نروح للأكل اللي لازم يشمل حبوب وبروتين وخضروات وفاكهة وزيوت صحية زي زيت الزيتون. نصيحة كمان: كُل على مهلك علشان تتجنب وجع البطن وتساعد جهازك الهضمي يشتغل كويس. اضبط تمرينتك الرياضية أكيد ممارسة الرياضة في رمضان صعبة، لكن مافيش مستحيل. لو كنت عايز تتمرن في وقت الصيام، حاول تبعد عن أشعة الشمس وقلل من قوة التمرين، ولازم كمان تدخل البروتين في السحور مع شرب كمية كبيرة من السوائل ما بين الفطار والسحور. نصيحة كمان: ينصح بالتمارين المنخفضة الشدة قبل الفطار لأن الجسم هيتشحن بالأكل والشرب بعدها مباشرةً. حارب العطش بالمياه والفواكه والخضروات الطازة العطش ونقص سوائل الجسم مشكلة كبيرة في رمضان خصوصًا أن الصيف داخل علينا بثقله. لازم تأكل بعد الفطار فواكه وخضروات طازة فيها كمية كبيرة من المياه زي الكنتالوب والبطيخ والخيار، وممكن تشرب عصائر فريش وطبعًا ماننساش نشرب 8 أكواب مياه على الأقل. نصيحة كمان: البعد عن مصادر الكافيين لأنها بتدر البول فبتصعب على الجسم الاحتفاظ بالسوائل، ونقلل كمان من الأكلات الحادقة والمشروبات الغازية. المكسرات يا جماعة لازم المكسرات الغنية بالدهون الصحية تكون السناك الرئيسي بتاعنا في رمضان. من المكسرات دي اللوز وعين الجمل والبندق والفستق، وكلهم أغنياء بالألياف وفيتامين E وأوميجا 3 والدهون الصحية المهمين لصحة جسمك. نصيحة كمان: بلاش مكسرات مملحة. لما نتكلم عن السحور، فنوعية الأكل أهم من الكمية ناس كثير – ومنهم إحنا بصراحة – بتفتكر أن كل ما زادت كمية الأكل قبل الفجر، الجوع هيقل خلال وقت الصيام، وطبعًا النتيجة الحقيقة هي عطش رهيب طول اليوم. خبراء التغذية بينصحوا بأكل النشويات المعقدة زي البطاطا والفول والعدس والعيش المعمول من الحبوب الكاملة لأنهم بيزودوا الطاقة ويمنعوا انهيار أنسجة وخلايا الجسم، ويخلونا شبعانين لفترة طويلة. نصيحة كمان: الأحسن تناول وجبة سحور خفيفة قبل الفجر بساعتين علشان تقلل من عطشك خلال فترة الصيام. رمضان كريم يا أهل القاهرة الكرام!

...

مودرا يوجا ستوديو: واحة للصفاء الذهني والنفسي في الزمالك
اصدرت في: 25/05/2016

ما كناش عايزين نبدأ المقال بكلام عن "صعوبة الحياة في المدينة في عصر ما بعد الحداثة" -الكلام الكبير ده هزار على فكرة- وقد إيه رتم الحياة السريع في الزمن ده مش مخلينا عارفين نرتاح. بالرغم من أن الكلام ده كليشيه وسمعناه كثير، إلا أنه للأسف واقع، وواقع عالمي كمان. صحيح إحنا بنحب القاهرة، إلا أن الواحد برضه يقول اللي ليها واللي عليها؛ القاهرة بزحمتها وحرها ودوّشتها بتخلي الواحد دماغه تلف... ضيف على كده بقى ضغوط الشغل والحياة اليومية والمسؤوليات، نكدنا عليك؟ تمام، إحنا شخصيًا بنعاني من كل ده وما فيش وقت يسمح إننا نسافر برة القاهرة علشان "نطفي مَكَن"، فقررنا أننا نروح حصة يوجا من باب التجربة... أهو... يمكن الموود يتعدل شوية، وبالمرة قررنا نحكي لكم عن التجربة دي، واللي قمنا بيها في مودرا يوجا ستوديو – Mudra Yoga Studio في الزمالك. للي يعرف فين كافيه صوفي في الزمالك، مودرا موجود في نفس العمارة اللي فيها صوفي في الدور اللي فوقيه على طول في الشقة اللي في الوسط. أول ما بتدخل بتقلع الجزمة على الباب –ودي كانت حاجة موترة للأعصاب جدًا بالنسبة لنا، مع أننا بنغسل رجلينا والله- فاعمل حسابك كده وأنت رايح علشان ما تتفاجئش، وممكن طبعًا تفضل بالشراب، المهم تمشي حافي وخلاص. المدربين في مودرا لطاف جدًا وودودين، وهيحسسوك أنك في بيتك فما تقلقش، قبل ما تدخل الحصة هيسألوك لو عندك أي مشاكل صحية أو بتحس بوجع في أي مكان في جسمك. إحنا كنا داخلين حصة واحدة من غير اشتراك عضوية فدفعنا 100 جنيه –سعر الحصة- إنما أنت لو عايز اشتراك، ففيه عضوية لعدد 8 حصص سعرهم 650 جنيه، أو 12 حصة بـ 800 جنيه. طبعًا إحنا دي من المرات المعدودات في حياتنا اللي نلعب فيها يوجا، وده اللي وضحناه لمدربنا "ناصر"، واللي بدأ معنا الحصة بمجموعة من الإحماءات الخفيفة، وطلب مننا أن ما نضغطش على نفسنا بدنيًا تحت أي ظرف من الظروف، وده كان شيء مريح. بعد مجموعة من حركات اليوجا البسيطة جدًا –والمتعبة جدًا لحد لياقته البدنية على قده زيّنا- كان فيه فترة تأمل وإحنا في وضع (السافاسانا) وهو يشبه وضع الجثة (بالبلدي نايم على الأرض على ضهرك)، المدرب طلب مننا أننا نغمض عنينا وغماها بكيس فيه نبات اللافندر وهدأ الأنوار، وفضلنا كده حبة حلوين. بالرغم من أن الوضع اللي إحنا كنا عليه يبان سهل وبسيط، إلا أن فكرة تصفية الذهن من كل حاجة من أصعب الحاجات اللي قابلناها في التجربة. واللي نعرفه أن التأمل هو كمان زي الرياضة محتاج تمرين، فممكن جدًا أنك تواجه صعوبة فيه زي حالتنا. بعد ما خلصنا نظفنا الـ Mat (السجادة اللي بنلعب عليها يوجا) بنفسنا ورجعناها مكانها، غيّرنا هدومنا في الحمام الموجود في المكان واسترخينا لفترة في القاعة الخارجية علشان نتأهل للخروج للعالم الخارجي مرة ثانية. صحيح التجربة كانت غريبة علينا ولكن كانت حلوة جدًا، جلسة التأمل بالنسبة لنا كان تعذيب لأن مخّنا مش واخد عليه ولكن اليوجا كرياضة جرت الدم في عروقنا وغيرت موودنا تمامًا. عن نفسنا إحنا ناويين نرجع ثاني لمودرا.

...

جوائز محرري كايرو 360 لأفضل محلات بيع منتجات الصحة والجمال ‏لعام 2016
اصدرت في: 23/05/2016

صحيح القائمة اللي في المقال ده صغيرة، إلا أنها مهمة جدًا لكل الناس اللي بتهتم بجمالها الخارجي. نعتقد أن فيه ناس كثير مهما استمتعوا بالشوبينج مش هيحسوا بجماله غير لو دخلوا المحلات اللي بتقدم منتجات الصحة والجمال وكملوا شوبينج هناك. فيه انبساط من نوع خاص بتعمله منتجات الجمال في النفسية، حتى لو مش كل وقت هنستعملها إلا أنها بتفرق مع الواحد. المهم... دي يا جماعة أفضل الأماكن اللي بتقدم منتجات الصحة والجمال: بلووم – Bloom: أكبر مكان بيجمع منتجات الصحة والجمال في القاهرة، من أول الأدوية لحد ماركات المكياج والبرفانات العالمية، ده غير مجموعة المنتجات الخاصة بالأمهات وحديثي الولادة. عشاق منتجات الصحة والجمال هيبقوا فاهمين أننا مش بنبالغ لما نقول أن بلووم من أكثر الأماكن المبهجة بالنسبة لنا. بودي بيكس – Body Bakes : بالرغم من أن فيه أسماء كثيرة بتقدم مستحضرات تجميل وعناية بالبشرة مصنوعة من مكونات طبيعية، إلا أن أغلبها ماركات عالمية. بودي بيكس مش بس ماركة مصرية نفتخر بإنتاجها، دي كمان عندها مجموعة كبيرة من المنتجات المصنوعة من مكونات طبيعية ممكن تلاقيها في مطبخك، وكلها روايحها تجنن. نفرتاري – Nefertari: مصري 100%؛ المنتجات بالمكونات وحتى الفكرة والتنفيذ كله من مصر. نفرتاري من الأماكن اللي بتتميز بمصداقية وقدرت أنها تحقق مجموعة كبيرة من المنتجات اللي مصنوعة من مكونات طبيعية وبدون مواد حافظة، ده غير مجموعة المنتجات القطنية والكتان اللي ما فيش بيت يستغنى عنها.

...

جوائز اختيارات محرري كايرو 360 لأفضل أماكن التجميل والعناية بالبشرة والشعر لعام 2016
اصدرت في: 22/05/2016

مفهوم الجمال مش بالمظهر الخارجي بس، أصل الجمال في الطيبة اللي في روح كل حد فينا، وفي المشاعر النبيلة اللي بيحسها تجاه الناس ونفسه، بس ده ما يمنعش برضه أن المظهر الخارجي مهم، وأن كل حد فينا لازم يدلع نفسه بأنه يقدم لها الأفضل. الفائزين في جوائز اختيارات محرري كايرو 360 لعام 2015 لأفضل أماكن التجميل والعناية بالبشرة والشعر: نيلز & مور سبا - Nails & More Spa لو حبينا نتكلم عن أفضل مكان تلاقي فيه أعتناء بأظافرك وبشرتك، يبقى لازم نذكر نيلز & مور سبا، اللي بيقدم لك خدمة ممتازة في كل اللي بتعمله هناك. أحمد وعبده - Ahmed & Abdou أما لو عاوزين حاجة تتعمل مضبوط وزي ما الكتاب بيقول، صالون أحمد وعبده، بيقدم لكم خدمة كلاسيكية علشان تاخد للحاجة اللي أنت طالبها بالضبط من غير إفتكاسات. إندرا داي سبا - Indra Day Spa لو عاوز تعيش تجربة آسيوية مالهاش زي، وتجرب أنواع ماساج مختلفة وممتازة، يبقى عليك وعلى إندرا داي سبا، صدقنا هتعيش تجربة فريدة. توا - Toi أما لو تحبوا تجربوا تسريحات شعر جديدة، وتتعاملوا مع محترفين متدربين في أفضل المراكز العالمية، يبقى توا هو المكان المناسب ليكم في الزمالك. ذا سبا - The Spa في ناس بتعشق الفخامة والاحترافية ودي السمات الأساسية اللي بتميز ذا سبا في فندق كامبنسكي، واللي بيتسخدموا مستخضرات مميزة عضوية. سبا فور سيزونز نايل بلازا - Four Seasons NilePlaza إيه رأيك تستمتع بوقتك وتسترخي قدام منظر النيل الرائع، وكمان تتمتع بمقبلات خفيفة مالهاش زي، سبا فور سيزونز نايل بلازا بيوفر لك تجربة فريدة من البداية للنهاية. كريس - Kriss عاوز تروح مكان سريع وجديد وأسعاره معقولة، كريس في المهندسين هيحقق لك كل أمنياتك. سو سبا - So Spa في سوفتيل الجزيرة في الزمالك هيحقق لك حلم أنك تستجم في حمام السباحة مع منظر النيل، ده غير طبعًا الخدمات المتنوعة اللي بيقدمها، باختصار أنت تحلم وهم هيحققوا لك الحلم. لا كوب - La Coupe جميل أن من وقت للتاني نكافئ نفسنا بأننا نعمل لها حاجة بتحبها، وده اللي حصل لنا بالضبط مع لا كوب، اللي خدمته ممتازة وسريعة ومرضية لأقصى درجة. مانويلا تاي سبا - Manuela Thai Spa سبا للسيدات بس وفيه مزايا ثانية كثير زي الماساج وعلاج البشرة وكل اللي تحتاجيه علشان تحسي بالإشراق والحيوية. محمد الصغير - Mohamed Al Sagheer ملوك التسريحات الجديدة والإلتزام بالمهنية والاحترافية، أكيد ماحدش يقدر ينكر تميز محمد الصغير في كل فروعه وحفاظه على سمعته وتكبيره لمحله لحد بقى من أشهر سلاسل محلات التجميل والصالونات في مصر. ويلو ستريم سبا - Willow Stream Spa سبا مميز في فيرمونت نايل سيتي، هيبهرك بالمساج بتاعه والخدمات المتنوعة اللي بيقدمها.

...

 جوائز اختيارات محرري كايرو 360 لأفضل أماكن الصحة واللياقة لعام 2016
اصدرت في: 19/05/2016

القاهرة مليانة أماكن صحة ولياقة، لكن مش كلها محترفة وبتقدم لك اللي بتدور عليه، علشان كده قررنا نوفر عليك مجهود اللف والدوران ونقولك إيه هي أفضل أماكن ممكن تروحها لو كنت مهتم بصحتك ولياقتك من خلال جوائز محرري كايرو 360 لأفضل أماكن الصحة واللياقة في القاهرة. جوائز اختيارات محرري كايرو 360 لأفضل أماكن الصحة واللياقة لعام 2016: جولدز جيم - Gold's Gym اسم كبير ومش محتاج نتكلم عنه كتير، سبب شهرته أنه بيقدم أفضل أجهزة تمرين كمان له أكتر من فرع، وتجربة الرياضة فيه مختلفة جدًا. هيرز - Hers هيرز جيم برعاية Reebok، مش مجرد مكان للرياضة وبس، ده كيان ضخم فيه كل اللي المرأة ممكن تحتاج له سواء كان صالون تجميل، عناية بالأظافر، أو مجرد اهتمام باللياقة والجمال. فيبرز - Fibers سكان المعادي دائمًا محظوظين! المكان ده فعلًا بيوفر أفضل معدات ومدربين محترفين والهدف أنك تلاقي كل اللي بتدور عليه وتخرج منه في أحسن شكل وصحة. كيرفز - Curves جيم مش تقليدي خالص، بيطبق حاجة اسمها النظام الدائري، وبيحاول يحقق لك كل اللي محتاجه علشان جسمك يبقى في أحسن حالة. سامية علوبة – Samia Allouba اسم مميز ومعروف لناس كتير، ممكن نوصفه بأنه جيم معاصر بيهتم بشدة باللياقة وبيقدم تدريبات مختلفة ومتنوعة تحت إشراف مدربين متخصصين. أكسجين - Oxygen كيان مميز، ومحترف، بيوفر لك أفضل معدات تتجمع لك مع أحسن فريق ودود في معاملته وتعاونه، غير الدلع من المكان في العروض، يبقى أكيد المكان ده يستحق يكون في جوائزنا. بودي شيبرز - Body Shapers نقدر نقول أنه فعلًا تجربة متميزة جدًا، المكان بيوفر لك كل اللي أنت محتاجه علشان تقدر تضبط شكل جسمك وتخليه زي ما بتحلم. بول فيت إيجيبت – Pole Fit Egypt بتحب الرقص؟ طب إيه رأيك تخوض التحدي؟ المكان ده بيقدم لك تجربة أكتر من من مجرد الرياضة، من خلال الرقص على عمود! الفكرة دي مبهجة. Fight & Fitness Factoryفايت أند فيتنيس فاكتوري – المركز بيقدم كل أنواع الرياضة من ملاكمة وكيك بوكسينج لغاية رياضة جو جيتسو البرازيلية والماي تاي، تجربة مهمة لازم يكون عندك الجرأة تخوضها في القاهرة. مودرا يوجا ستديوز - Mudra Yoga Studio إحنا في كارو 360 بنشجع الناس تجرب أي حاجة فيها سلام نفسي، ومكان زي ده قدر يثبت نفسه في الزمالك ومينفعش ما يكونش في قائمة جوائزنا، جربوه وهتنبسطوا. نون سنتر - Nūn Center واضح أن الزمالك قررت تكون منطقة أماكن الصحة واللياقة العظيمة، نون سنتر بيقدم لك تجربة رياضية مميزة جدًا هتخليك تخرج وكأنك إنسان جديد. شانتي يوجا سنتر - Shanti Yoga Cairo في مصر الجديد اليوجا لها طعم مختلف، شانتي يوجا سنتر مركز متكامل هيرضيك وهتلاقي فيه كل اللي يخليك تخرج منه جسمك مضبوط وحالتك النفسية عالية جدًا. مبروك لكل الفائزين!

...

فايت أند فيتنيس فاكتوري: مهرجان رياضي متكامل من أول الفنون القتالية المختلطة لليوجا
اصدرت في: 13/04/2016

تعتبر رياضة الفنون القتالية المختلطة MMA من أشهر أنواع الرياضة في العالم. وكمان بتعد أسرع رياضة من ناحية الانتشار ومصر طبعًا من الأماكن اللي منتشرة فيها الرياضة دي بشكل كويس. من أهم أسباب شعبية الرياضة دي إنها بتجمع بين عدد كبير ومتنوع من الرياضات القتالية، وكلهم موجودين عند فايت أند فيتنيس فاكتوري. بعد افتتاحهم لأول فروعهم في أركان مول الشيخ زايد في إبريل 2014، قدموا فرعهم الثاني في the Courtyard في المعادي، وده أكبر دليل على نجاحهم. المركز بيقدم كل أنواع الرياضة من ملاكمة وكيك بوكسينج لغاية رياضة جو جيتسو البرازيلية jiu-jitsu والماي تاي Muay Thai، وصحيح ده مش أول جيم في القاهرة يقدم حصص MMA، لكن الأماكن اللي عندها حصص MMA عادًة بتكون أماكن متخصصة في نوع واحد من الفنون القتالية ودخلت في هوجة رياضة MMA. لكن فيتنس أند فايت فاكتوري موضوع مختلف، لأنه فتح بصفته جيم متخصص في رياضة MMA وده واضح في شكل الجيم وتصميمه. وواضح كمان من نوعية المدربين المحترفين هناك والتصميم المستوحى من الشكل الأوروبي إن المكان ده مهتم بدروس MMA وحصص اللياقة البدنية، وكمان عنده أجهزة ممتازة وحصص لياقة زي اليوجا وBoxercise وspinning وحصص تدريب للأطفال وغيرهم. الموضوع مش مجرد تنوع في أنواع الحصص وخلاص؛ نجاح المكان الحقيقي في أجواه الحماسية الرائعة. طبعًا الموضوع متعب والتمارين قوية جدًا، بس أكيد هيغيروا من شكل حياتك تمامًا، بس المهم يكون عندك استعداد. فيتنس أند فايت فاكتوري مناسب لكل المستويات، من المبتدئين اللي مش عارفين أي حاجة، للمحترفين اللي عارفين سكتهم كويس، المهم أنك هتلاقي حصص مناسبة بيقدمها مدربين محترفين منهم بطل الجو جيتسو محمد عمر "زيزو" اللي عمل حصة خاصة لفريق كايرو360 في فرع المعادي. صحيح زيزو متخصص في رياضة الجو جيتسو لأكثر من 4 سنين، بس قدر يفوز أكثر من مرة بالبطولة العالمية لرياضة الجو جيتسو البرازيلية، وكمان حقق نجاح كبير في عالم رياضة MMA وفاز ببطولة EFC سنة 2011 وبطولة المصارعة في أمريكا الشمالية سنة 2013. نقدر نفهم أن استضافة دروس زيزو في الجيم هدفها تقديم أحسن مستوى لحصص الرياضة في المكان، وكمان بيساعدوا المشتركين أنهم يحققوا أحسن استفادة من الحصص على يد أهم الرياضيين في مصر. على مستوى حصص اللياقة والصحة العامة، فايت أند فيتنيس فاكتوري يعتبر من أهم الأماكن اللي بتروج لثقافة الجيم في مصر. أكيد رياضة زي الملاكمة والكيك بوكسينج بتقدم تمارين متكاملة لكل عضلات الجسم، وطبعًا هايلة لتنشيط العقل. نقدر نلخص الموضوع أن الرياضة زي أي حاجة جديدة، محتاجة تعليم وصبر. لمعلومات أكثر عن فايت أند فيتنيس فاكتوري، دوس هنا.

...

شاهد المزيد
مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح