The Definitive Guide to Living in the Capital , Cairo , Egypt

كتبنا
أكثر من مرة في كايرو 360 عن السبا وحمامات البخار البلدي، الرجالي والحريمي،
المرة دي تجربة فريدة في مكان اسمه برضه «حمام الثلاثاء» لكن في مكان مختلف عن
الأول اللي كان بالقرب من منطقة وكالة البلح، وعادة الحمامات دي بـ تبقى في أماكن
شعبية ولها طابع تاريخي. المكان ممكن توصل له بأكثر من طريقة، هو في ميدان باب
الشعرية  وأمام حديقة الميدان على اليمين
ده لو كنت جاي من شارع الموسكي وميدان باب الخلق، وهـ يبقى على الشمال لو قادم من
ميدان العباسية وشارع أحمد سعيد. هو في شارع صغير على ناصيته محل أدوات منزلية وألومنيوم
والشارع من الداخل كله محلات ألومنيوم على الصفين. بعد حوالي 20 متر من مدخل الشارع
هـ تلاقي مدخل الحمام وهو له شكل مستدير بالحجر الجيري الأبيض وشكله مميز جدًا
وفيه لافتة على الباب مكتوب عليها (حمام بخار).

المدخل
على شكل بيضاوي من أعلى وهو من الطوب الحجري الأبيض والباب عبارة عن ستارة قماش غامقة
اللون لعدم توضيح اللي بالداخل، والستارة بعد 3 درجات سلم من المدخل. أول ما بـ تدخلي
هـ تلاقي مكتب الست أم رأفت (صاحبة الحمام) وفوقها بدرجة مكان واسع مربع فيه كنبة وكرسيين
وده مكان مخصص للحنانة (اللي بـ ترسم الحنة) والمكتب من الناحية الثانية له سلم من
أربع درجات لأعلى للوصول لغرفتين بباب أخضر خشب وده مكان إزالة الشعر بالحلوى وجنب
الغرفتين مكان واسع مربع به 2 أو 3 باجور لتجهيز الحلوى، وعلى شمال مكتب أم رأفت
مدخل حمام البخار بمجرد الدخول فيه ممر صغير آخره يمين مكان مرتفع فاضي تمامًا وده
لخلع الملابس قبل وبعد البخار.

غرفة
البخار عبارة عن مكان واسع في وسطه ما يشبه صينية الميدان فيها حنفية صغيرة وحولها
مقاعد بشكل مستطيل من الرخام وده مكان للتدليك والتكييس فيه ثلاثة أحواض فيهم مياه
ساخنة وباردة واحدة على يمين الصينية وواحدة على شمالها وواحد خلفها وعند مدخل  الغرفة دش للاستحمام وبعدها بحوالي 10 متر غرفة
ثانية، فيه على أطراف الغرف مكان لترك الملابس وأمام الصينية مدخل بخار بـ تصعد له
بحوالي ثلاثة سلالم، وفيه في غرفة البخار مغطس كبير وماسورة مياه ساخنة جدًا أعلاه
بـ تفرغ المياه اللي بـ تتزايد حول المغطس من الخارج ويزداد البخار بالغرفة. المغطس
حوله سور للجلوس للاستفادة من البخار وطبعًا يوجد دورق (شفشق) لأخذ المياه من
المغطس.

بداية
يتم الاتفاق مع السيدة أم رأفت على إيه المطلوب، لو عروسة هـ تدفع 250 جنيه (شاملة
حلوى إزالة الشعر وتكييس وماسك ترمس وماسك مغربي وليفة مغربي وطبعًا حمام البخار)
لو حمام بخار وتكييس وماسك ترمس وماسك مغربي 60 جنيه فقط، لو بخار وتكييس وماسك
ترمس فقط 50 جنيه وبعد الاتفاق بـ تسلمي كل الفلوس اللي معاكي والموبايل (علشان
ممنوع التصوير) للأمانات بعد عد الفلوس كويس. بعد الاتفاق مع أم رافت هي بـ تحدد
لك مين هـ تبقى معاكي وهـ تعمل لك اللي اتفقتوا عليه.

بـ
تدخلي غرفة الحلوى (ده لو هـ تعملي حاجة) وبعد كده حمام البخار وبـ تقعدي من ربع إلى
نصف ساعة على حسب ما هـ تناديلك اللي هـ تكيسك وبعد كده بـ تروحي لرخامة التكييس وطبعًا
اللي بـ تكيسك هـ تقول لك أنا هـ اعمل لك الماسك وهـ أحميكي لكن ما تنسنيش بقى لما
تخرجي! طبعًا عايزة بقشيش.. بـ تطلعي لمكان ارتداء الملابس ولو عاوزة رسم حنة
الحنانة بـ تكون قاعدة بره بجوار مكتب أم رأفت بـ ترسم لك الرسمة الصغيرة بـ 5
جنيه والكبيرة بـ 10 جنيه  وبـ تستني لما
تنشف الرسمة وبـ تدخلي تستحمي ثاني من الحنة بس الرسمة بـ تطلع حلوة قوي ده غير أن
عليها زيوت رائحتها حلوة. بـ تحاسبي الحنانة بعد ما تغسلي الحنة وتلبسي وتأخذي
فلوسك من الأمانات وموبايلك وطبعًا قبل ما تمشي بلغتهم “لازم تراضي” اللي
كيستك علشان لما تروحي ثاني تظبطك.