ركوب الدراجات الهوائية: بصيص من الأمل في شوارع القاهرة
Salma Tantawi
باستثناء حراس عقار وعمال توصيل طلبات قليلين، راكبي
العَجَل (الدراجات الهوائية) في القاهرة مجموعة صغيرة قوي من الهواة، اللي أكيد بـ
يثيروا استغراب الناس الماشية في الشارع، ياه بقى لو بنات! مشكلتهم هـ تكون من نوع
آخر. ده غير أن الشوارع خطر على اللي في العربيات محميين بصاج وقوائم فولاذ، فما
بالك بركاب العجل والمشاة! (المشاة يمكن وضعهم أفضل لما بـ يكونوا ماشيين على
الرصيف لو لقوه).
ومع ذلك، فيه مجموعة شجاعة من محبي ركوب العَجَل ابتدوا
يتحدوا الظروف دي وبـ يركبوا عجل في مصر. والقاهرة في احتياج لأمثال المجموعة دي
جدًا. حركة المرور اللي أصبحت مؤثرة بشكل عنيف على مستوى المعيشة في مصر، التلوث
الخانق، المواصلات العاصرة للأجسام، والمُكسرة للعظام! إلخ إلخ إلخ.
ده غير فوائد ركوب العَجَل الصحية. فممكن تخرج فيه كل
الطاقة السلبية اللي عندك بعد يوم شغل طويل على المكتب. أي نعم العوادم ممكن تكون
مزعجة وتضيع الفائدة من الموضوع، لكن لو اخترت ميعاد بدري أو متأخر قوي، في
الساعات القليلة اللي الشوارع فيها فاضية، مش هـ يكون فيه مشكلة.
لو عاوز تشتري عَجَلة جديدة، جرب محل «بيسكليتة – Bescletta» اللي موجود في مصر
الجديدة والرحاب. المحل فيه كل أنواع عَجَل الطرق المرصوفة والجبال. فيه عَجَل
هواة وفيه كمان أحدث عَجَل «بي إم دبليو – BMW»، كل ده بهياكل وخامات
مختلفة. عنايتهم بالزبائن هائلة، وكمان ممكن تختار عَجَلة من على موقعهم ويوصلوها لك
لحد بيتك. وطبعًا فيه محلات «أبو الجوخ» المتخصصة في العَجَل من الخمسينات (على
حسب قولهم)، والموجودة في أماكن مختلفة زي الدقي والأوبرا ومدينة نصر وغيرهم.
ودلوقتي بقى معاك العجلة، هـ تركبها فين؟!
الموضوع مش مستحيل أبدًا، فيه أماكن كتيرة هادئة عادةً زي
دجلة في المعادي (جرب شارع 254 أو المنطقة المحيطة بشارع القنال)، أو مدينة الرحاب
أو منطقة الأهرامات أو التجمعات السكنية الراقية الجديدة في 6 أكتوبر، زي «الربوة»
أو «جاردينيا». وفيه أماكن ثانية متعة رهيبة أن الواحد يركب فيها العجلة، لكن حركة
المرور فيها مأساوية، في الحالة دي يوم الجمعة الصبح بـ يكون الحل المثالي. ومن
الأماكن دي كوبري «قصر النيل» أو كورنيش «جاردن سيتي».
ولأن روح المغامرة المصرية ما لها مثيل، مضطرين ننصح بعدم
ركوب العجل فوق الكباري أو على الطرق السريعة أو الشوارع الرئيسية، اللي فوضويتها
مش مستحملة إضافة العجل لسلطة البشر، والعربيات والأتوبيسات والتكاتك والڤيسپات
والعربيات الكارو…
وعلشان الموضوع يكون ممتع أكتر ويكون فيه استمرارية، ممكن
تشترك في المجموعات الرياضية اللي بـ تنظم دورات وجولات، نشاطاتهم هـ تحمسك وتحطك
في قلب مجتمع من راكبي الدراجات الهوائية، يخلي الرياضة دي أكثر امتاعًا بكل المقاييس.
وفي عدد من المجموعات دي لهم وجود جيد على الفيسبوك ومنها «سايكل إيـﭼيبت – Cycle
Egypt» وهي
جزء من «سايكل إيرث – Cycle Earth»، ودي مجموعة شايفة أن ركوب الدراجات الهوائية مش بس رياضة، ولكنه
كمان حل ومنفذ لعالمنا من أزمة الطاقة والاحتباس الحراري.
«سايكل إيـﭼيبت – Cycle Egypt» مجموعة تشمل 11
مجموعة، واحدة لكل محافظة أو حي قاهري. المجموعات بـ تنظم جولات في المنطقة اللي
بـ تنتمي لها في الويك إند، لما بـ تكون الشوارع رائقة وأمان. والجميل أن المجموعة
دي بـ توفر عَجَل للتأجير للي ما عندهوش. مجموعة تانية لها نشاط مماثل هي «بايسكلز
إن كايرو- Bicycles in Cairo» ، وغالبًا بـ ينظموا جولاتهم في هليوبوليس يوم الجمعة. ولو محتاج
شوية إلهام وتشجيع قبل ما تأخذ الخطوة الجريئة دي زور المدونة دي: Cairo
Cyclists Club’s blog.
ركوب الدراجات الهوائية بديل ممتع وصحي للمواصلات، مش بـ
يفيدك أنت بس، دا كمان بـ يخدم المدينة أو الحي بتاعك. خذ احتياطاتك قبل ما تركب
العجلة، البس خوذة وركبة. وكمان البس ألوان فاتحة وخلي معاك مياة دايمًا. ولو ناوي
تركب العَجَل بالليل لازم تزود عَجَلتك بأنوار.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
