The Definitive Guide to Living in the Capital , Cairo , Egypt

لو حبينا نتخيل شوارع القاهرة بشكل مختلف وحضاري ولطيف، هنلاقي كل واحد فينا بيتخيلها بشكل مختلف، شكل يليق بطبيعة شغله أو أسلوب حياته، أو بيئته اللي اتربى فيها، ودي حاجه بديهية، لكن تعالوا نفكر كده لو فيه فنان شامل ومبدع في نفس الوقت، قرر يتخيل شوارع القاهرة بدماغه وأسلوبه؟! ممكن الشوارع تطلع عاملة إزاي؟

هو ده بالضبط اللي عمله الفنان الإيطالي “كارمينيه كارتولانو”، الشهير بـ”كارم كارت” واللي قرر من أكتر من 20 سنة فاتت إنه يعيش  في مصر، وتحديدًا في “القاهرة” ومن ساعتها سخر كل إمكانياته وإبداعاته وطاقته، سواء في الكتابة أو الترجمة أو التصوير أو الفن التشكيلي، لاكتشاف هوية “القاهرة” المليانة ثقافات وحضارات.

آخر إبداعات “كارمينيه” مشروع فني نشرت عنه صحيفة “الشرق الأوسط” في موقعها الإلكتروني، وهو معرض بيستضيفه جاليري “المشربية” للفنون المعاصرة في القاهرة، وبيضم حوالي 20 لوحة بتجمع بين التصوير الفوتوغرافي والنوستالجيا السينمائية، بيخلق بيها صور مُتخيلة وسيناريوهات بديلة لأشكال الجدران والشوارع في القاهرة أقرب للجرافيتي.

بيقول “كارمينيه” عن بداية مشروعه: “بدأت بتصوير الشوارع والمباني، وبالأخص العالية اللي مفيش فيها أي شبابيك، وتخيلت لو إنها تحولت لجداريات فنية” وفعلًا اشترى الفنان الإيطالي مجلات فنية قديمة من “سور الأزبكية” كان لفت نظره الصور القديمة للفنانين من هوليوود ومصر اللي فيهم، وبدأ يستخدم الفوتوشوب في توظيف الصور دي وكأنها جرافيتي مرسوم على واجهات المباني في العاصمة.

 أول تجارب “كارمينيه” كانت صورة لنجم هوليوود “كاري جرانت” وبعدها عمل صور تانية كتير لفنانيين من هوليوود، لقى عليها تفاعل كبير على مواقع التواصل الاجتماعي بعد ما نشرها على صفحته، وبعد كده جت تعليقات بتطلب منه يستخدم صور لفنانين مصريين، وكانت أول مرة يعملها بعد وفاة الفنان “عزت أبو عوف” اللي كان ليه مكانة خاصة في قلب “كارمينيه” وفعلاً استخدم صورته كجرافيتي على سطح مبنى قديم، وفوجئ بإن الصورة لقت تفاعل هايل في وقت قياسي، ومن هنا قرر “كارمينيه” إنه يخلي مشروعه يتضمن 10 فنانين مصريين و10 فنانين من هوليوود.

هتلاقوا في المعرض المستمر لـ 23 فبراير لوحات لـ “فاتن حمامة” و”عمر الشريف” وكأنهم جرافيتي على مبنى مجمع التحرير، وهتلاقوا كمان صورة للسندريلا “سعاد حسني” وكوكب الشرق “أم كلثوم” و”رشدي أباظة” والفنانين “حسين فهمي” و”ميرفت أمين”، وغيرهم من فناني مصر والعالم، في لقطات بتظهر فيها حركة الشوارع.

اعرفوا أكتر عن المعرض وجاليري “المشربية” من هنا.