The Definitive Guide to Living in the Capital , Cairo , Egypt

علشان تتكلم عن مركز ثقافى جواه ثلاثة مراكز ثقافية وبـ يشتغل من أول تنمية الطفل وتعليمه والعمل على تربية ملكة المهارات بأسلوب علمى وعملى لذيذ لحد حوار الحضارات يبقى حضرتك لازم تقف معايا وتتبتل فى محراب الكتابة لحد ما ييجي لك الفتح وتكتب عشر خطوات من تنمية الطفل إلى حوار الحضارات.. وده خلاهم يؤسسوا ثلاثة مراكز متخصصة علشان تكتمل منظومة “بناة السلام” وهم: “مركز هاوى للمواهب والفنون.. ومركز حل النزاعات وإدارة الحوارات المجتمعية.. ومركز دراسات التفاعل الحضارى.. ونبدأ العشر خطوات:

(1)

ابدأ البناء من تحت جدًا.. ابدأ من الطفل علشان تقدر تبنى مجتمع حقيقى.. ومن المنطلق ده قدر مركز هاوى يعمل مجموعة أنشطة فى الرسم والتصوير وصناعة الحلى والمسرح والتمثيل والمايم واللغة ودمج بعض الكورسات مع بعض لعمل حالة من الثقافة زى دمج المايم والتمثيل واللغة لعمل ممثل حقيقى قادر على صناعة المستقبل الفنى لنفسه ولبلده.

 

(2)

اشتغل على المجتمع وهنا ييجى دور مركز حل النزاعات وإدارة الحوارات المجتمعية واللى هدفه واضح من اسمه بـ يعمل حوار داخل المجتمع وده عن طريق تقريب وجهات النظر ودراسة البنية التحتية للمجتمع وتشريحه وطبقاته وإيه أوجه الاختلاف ما بينهم ودراسة ثقافة المجتمع.

 

(3)

هاه اطمنت على المجتمع؟ بدأ تعمل حالة من حوار الحضارات ولازم تبدأ بفكرة الهوية المصرية وهنا ييجى دور مركز دراسات التفاعل الحضارى اللى بـ يشتغل على الهوية المصرية بطرق مبتكرة زى مثلًا الأعمال المسرحية وأشهرهم مسرحية “ماعت” اللى تكلمت عن الهوية المصرية القديمة بشكل مسرحى يجذب الكبار والصغار.

 

(4)

أول ما تطمن أنك رميت أساس الهوية لازم تشتغل على تصحيح المفاهيم الخاطئة واللى ترسبت عبر سنين كثير داخل وجدان المصرى.. علشان يعرف يتعامل صح وده من خلال مجموعة أنشطة هدفها تصحيح المفاهيم وبـ تكون فى الغالب لقاءات عامة مع الناس.

 

(5)

هنا وقت اللعب على الاختلاف بين الثقافات المختلفة وإزاى نلاقى أرضية مشتركة.. أرجوك قبل ما تفكر فى إيه المختلف بينك وبين غيرك لازم تفكر إيه المشترك ما بيننا وإزاى نقدر نتقابل؟

 

(6)

لما يحصل ده.. تلقائيًا وعى الأفراد هـ يبقى كله على موجة واحدة وهـ يعرف أن فى التنوع داخل المجتمع الواحد وداخل الحضارات المختلفة قمة التناغم بين البشر.

 

(7)

هنا المؤسسة لازم تشتغل على الصورة الذهنية للمجتمع وتشوف مناطق الخرافة وتوصل مكانها لغة العلم وده بـ يتم عن طريق الكتابات واللقاءات العامة والشغل على المجتمع من خلال تطوير أداءه ومن خلال ورش العمل المختلفة.

 

(8)

اكسب ثواب فى الناس واعمل حاجة تحافظ على لغتهم لأنها المدخل الأساسى لثقافتهم، ومن الثقافة اشتغل على التبادل الثقافى بين المؤسسات والهيئات المختلفة.

 

(9)

انشر قيم التسامح والمحبة والحوار من خلال الأنشطة المختلفة اللى بـ تقدمها.

 

(10)

هنا لازم تتعرف على صانع مؤسسة بناة السلام وهو أ. محمد جاد الله المرشد السياحى والمحاضر الدولى والمثقف والكاتب والدراماتورج المسرحى علشان تفهم ليه المؤسسة قائمة على السلام والثقافة.