The Definitive Guide to Living in the Capital , Cairo , Egypt

ناظر المعارف:

سنة 1870 وهو قاعد يفكر ويفكر ويفكر قرر على باشا مبارك.. ناظر المعارف فى عصر الخديوى إسماعيل أنه يعمل حاجة جديدة ومهمة فى البلد، الحاجة دى اسمها “الكتب خانة الخديوية المصرية” وكان مكانها فى الدور الأرضى بسراى الأمير مصطفى فاضل أخو الخديوى إسماعيل والمكان تحديدًا فى درب الجماميز. وكان الهدف الكبير اللى هـ يعمله ناظر المعارف العبقرى هو تجميع المخطوطات النفيسة من اللى خباه السلاطين والأمراء والعلماء والمؤلفون فى أماكن كثير زى المساجد والأضرحة ومعاهد العلم المختلفة وبدأ الموظفين فى التجميع وبقى عندنا فى مصر مكان لتجميع الوثائق المهمة.

ها وبعدين؟

بس يا سيدى ما نطولش عليك فى الكلام.. مع تطور الموضوع والكتب والوثائق بقت كثير جدًا اتنقلت الدار سنة 1903 للمبنى الجديد بميدان باب الخلق واللى اتعمل مخصوص للدار اللى بقيت اسمها “دار الكتب ودار الآثار العربية” وافتتحوه فى أول سنة 1904م.

 وفى سنة 1961م بدأوا إنشاء مبنى جديد للدار، –ولو حضرتك مركز– يبقى أكيد هـ تعرف أن المبنى القديم بقى ضيق على الكتب، والمبنى الجديد اتعمل المرة دى على كورنيش النيل برملة بولاق، وافتتحوه سنة 1977م.

الدار:

الدار هناك عبارة عن مبنى كبير جدًا سهل أنك تتوه فيه.. فيه أماكن كثير للحفظ وفيه مكتبة كبيرة علشان لو عاوز تصور جزء من مخطوطة أو حاجة.. وفيه كمان جزء للموظفين والإداريين والفنيين.. ولما تقول لى ليه فيه فنيين هناك نقول لك ببساطة لأن فيه علم كامل اسمه “علم تحقيق التراث والمحافظة على المخطوطات”.. وده بـ يدخل فيه مواد كيماوية وقدرة على قراءة الخطوط ومعرفة باللغة فى تطوراتها المختلفة والسير الذاتية للمؤلفين وله علاقة بالتاريخ.. دنيا واسعة.

تخيلوا بقى أن الدار فيها حوالى 57 ألف مخطوط من أنفس المجموعات وهي مرقمة ومفهرسة وبـ تغطى مواضيع كثير جدًا، وبـ تضم كمان مجموعة نفيسة من أوراق البردى العربية ومن بينها مجموعة لاقوها فى مكان اسمه “كوم أشقاو” بالصعيد كانت حوالى 3 آلاف بردية فيها عقود زواج وبيع وإيجار واستبدال وكشوف وسجلات وحسابات خاصة بالضرائب أو تقسيم مواريث وغيرها.

والجميل بقى أن هناك فيه مجموعة من الوثائق الرسمية ووثائق الوزارات المختلفة وسجلات المحاكم وغيرها واللى بـ يفيد الباحثين فى التاريخ والآثار.. وكمان فيه هناك مجموعة من النقود العربية يعود أقدمها إلى سنة 77هـ (696 م).

لكن صراحة أجمل حاجة هـ تشوفها هناك هى التشكيلة الكبيرة من مخطوطات القرآن المكتوبة على الورق والجلد وبعضها مكتوب بالخط الكوفى القديم غير المنقط، وبعضها لخطاطين مشهورين.

المهم أن دار الكتب والوثائق دلوقت بـ تقوم بحاجة مهمة جدًا وهى توثيق كل الكتب اللى بـ تطلع فى مصر يعنى حضرتك لو عامل كتاب علشان يعترف به لازم تروح هناك وتأخذ رقم إيداع وبكده يبقى معترف بك هناك.