The Definitive Guide to Living in the Capital , Cairo , Egypt

فن وثقافة
شبابيك

شبابيك: محاولة أخرى للخروج من ثقافة وسط البلد

تم التقييم بواسطة
Ahmed Abd El Gawad
قيم
قيم الآن
شبابيك: محاولة أخرى للخروج من ثقافة وسط البلد

مركز ثقافى جديد تم افتتاحه من حوالى شهرين فى المقطم كمحاولة
ثانية للخروج من ثقافة وسط البلد، بمعنى أنه محاولة جديدة للخروج من فكرة وجود
التجمع الثقافى فى منطقة وسط البلد.

المكان تأسيسه جميل واخد فيلا فى منطقة المقطم، جنب ميدان
النافورة وهو ثلاثة أدوار، الدور اللى تحت كافيه وفيه مكتب الإدارة والمكتبة،
والدور اللى فوق فيه جاليرى للفنون التشكيلية وغرف مغلقة للورش، والدور الثالث فيه
مسرح كبير، آه ونسينا نقول لكم أنهم بـ يفتحوا من 10 صباحًا إلى 11 مساءً، وفيه
اشتراك سنوى قيمته 250 جنيه.

الجميل فى الموضوع أن فكرة شبابيك قائمة على خدمة المنطقة
اللى فاتحين فيها ثقافيًا، يعنى عاوزين يغطوا منطقة المقطم، ولما ينجحوا فى ده هـ يعملوا
مركز ثقافى ثانى فى مكان ثانى، وتستمر سلسلة “شبابيك” لحد ما يغطوا
المناطق المحرومة من المراكز الثقافية فى مصر.

فكرة نبيلة بالفعل ولو تمت زى ما أصحاب المكان بـ يخططوا هـ
تبقى مكان ثقافى مهم، لكن مين اللى قائم على شبابيك وإيه الفكرة؟

المؤسسين هم د. مجدى أحمد على، د. محمد رأفت، الكاتبة ضحى
عاصى، وفكرتهم قائمة على شعارهم “للحرية.. الحياة”، فكرة شبابيك قائمة
على الحرية اللى بـ تعمل متنفس للحياة الثقافية فى المكان اللى بـ يفتح فيه
شبابيك، مع الوضع فى الاعتبار أنهم بـ يقصدوا مستهلكى الثقافة فى المقام الأول
يعنى مش عاملين مكان يقعد فيه المثقفين وبس، لكن مكان يعرف الناس يعنى إيه ثقافة
ويتفاعل معاهم، وده من خلال الأنشطة اللى بـ يقدموها.

الأنشطة هى: الرسم، وفيه تعليم خزف، ورسم للأطفال مع د.
شريف القزاز، والرسم للكبار مع الفنانة إنجى نور، والرسم على الحرير مع الفنانة
نجوى، وتصنيع الحلى مع الفنانة هيام حسين، وفن الباليه والأيروبكس مع د. نشوى
منجى، جيتار مع الفنان شريف سالم، بيانو مع العازفة الروسية بولينا، عود مع العازف
على طنطاوى، إيقاع شرقى مع الأستاذ زين العابدين، كمان مع د. سامى الروبى، سيناريو
مع الأستاذ عاطف بشاى، إخراج مع المخرج زياد سعودى، تمثيل مع الأستاذة عبير لطفى
والفنان فتحى عبد الوهاب، ماريونت مع الفنانة ابتهال، برنامج العناية بالبشرة والشعر،
أوريجامى مع د. مارو، ورشة كتابة للأطفال مع الكاتبة ضحى عاصى. ومجموعة كبيرة من
الورش الأخرى مع تقديم عدد كبير من الندوات والحفلات تضم أسماء كبيرة فى عالم
الثقافة والغناء والأدب.

نصيحة 360

زور صفحتهم على الفيسبوك.

أحسن حاجة

تعدد الأنشطة فى المكان وفرصة قراءة الكتب فى المكتبة، وخدمة مكان كان محروم من الأنشطة الثقافية.

أسوأ حاجة

المكان بعيد شوية عن حركة الناس فى منطقة وسط البلد، علشان كده هـ تلاقى أن رواده فى الغالب من ساكنى المقطم.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح