The Definitive Guide to Living in the Capital , Cairo , Egypt

فن وثقافة
قصر الأمير بشتاك

قصر الأمير بشتاك: عن الروقان نتحدث

  • 92 شارع المعز لدين الله
  • متاحف
تم التقييم بواسطة
Ahmed Abd El Gawad
قيم
قيم الآن
قصر الأمير بشتاك: عن الروقان نتحدث

فرمان:

بأمر مولانا الأمير بشتاك فى عام 1339 من ميلاد السيد المسيح، 740 من هجرة محمد صلى الله عليه وسلم، قرر الأمير سيف الدين بشتاك الناصرى بناء القصر.. وبـ تقول لنا كتب التاريخ أن المكان كان حوله دكان للسقا (انضم للقصر بعد كده) و11 مسجد، لكن مع التجديد اللى عمله الأمير بشتاك فى القصر خلى جامع واحد ووسع فى القصر ووصل له المياه (بشادوف) علشان تنزل فى بركة وسط حديقة القصر.. ياه تخيلوا الناس دى كانت رايقة فعلًا.

 

عن الروقان نتحدث:

الروقان تيمة مهمة وأنت بـ تدور فى التاريخ لازم تعمل حسابها، وده هـ يبان لكم فى المعمار وانتم بـ تتفرجوا على القصر من الداخل.. طبعًا مش كله.. لكن الأعمدة الضخمة اللى قائم عليها والنقوش اللى بعضها لسه موجود والشبابيك الضخمة كلها بـ تدل على طراز معمارى عبقرى، وعن روقان المهندسين وإبداعهم الكبير.

 

الإبداع:

لازم نقول هنا أن الإبداع جزء مهم من تاريخنا والاهتمام به واجب، والقصر بـ يتكون “زمان” من دورين الأرضى كان فيه مخازن للغلال وأسطبلات وغرف الخدم، والعلوى كان فيه قاعة احتفالات وغرف النوم.. وطبعًا لازم يشد عينك المشربيات والشغل الهندسى العالى عليها، كمان القاعات المتغطية بالرخام والسقف الخشبى اللى نازل منه قناديل إضاءة عبقرية والزجاج المعشق والملون.. يعنى من الآخر عينك هـ تستريح جدًا وأنت بـ تشاهد عبقرية المكان.

 

شريط أخبار:

تعرضت البلاد لزلزال قوى بمقياس “كذا” ريختر ووقعت بيوت والعام عام 1992.

 

الوزارة:

قررت وزارة الآثار التعاون مع معهد الآثار الألمانى لإنقاذ قصر الأمير بشتاك من التهدم اللى كاد يحصل له علشان الزلزال.

 

الزلزال:

تخيلوا بقى أن الزلزال كان سبب فى الالتفات للقصر وقرر صندوق التنمية الثقافية يعمل هناك مشروع كبير ويسميه “بيت الغناء” وهدفه الأساسى الحفاظ على الغناء الشرقى، يعنى يحافظ على الهوية العربية للغناء، وده طبعًا زى ما إحنا عارفين موضوع مهم جدًا وكلنا بـ نسمع الأغانى الجديدة واللى بـ يحصل فيها، والأنشطة الأساسية للبيت قائمة على مجموعة من العازفين المهرة والمغنيين الرائعين وكلهم بـ يواجهوا موجات الغناء الهابط وبـ يحافظوا على تاريخ الغناء العربى.

 

العربى:

محتاجين قوى نرجع لفكرة الأصل العربى ونبعد عن التقليد الغربى لحاجات كثير فى حياتنا، لأن من الطبيعى مش كل حاجة غربى تبقى جميلة.. مش كده ولا إيه.. المهم بيت الغناء العربى مكان مهم لكل اللى عاوز يتعلم موسيقى عربية على أصولها، لأنه بـ يقدم مجموعة من الورش اللى بـ تدرب على الأصوات والغناء والعزف على الآلات الموسيقية المختلفة والمكان مُقسم لمجموعة أنشطة:

 

قاعة الاحتفالات:

اللى بـ تستضيف الحفلات الكبيرة من مصر والوطن العربى ومهمتها تعرف الناس بالغناء الشرقى.

 

صالون المقامات:

وكل هدفه نشر ثقافة الموسيقى العربية عن طريق الندوات اللى بـ يجيب فيها متخصصين فى كنوز الموسيقى العربية المختلفة.

 

قاعة المعارض:

وفيها هـ تلاقى معارض الفن التشكيلى جنب الحفلات اللى شغالة علشان تتكون لوحة كاملة من الموسيقى والرسم.

 

بيت الهدايا:

وده مكان بـ يُباع فيه إسطوانات الموسيقى اللى على أصولها. يعنى تروح تتفرج وتستمتع وتسمع وتشترى هدايا كمان.

نصيحة 360

زوروا صفحة مجموعة الفنانين اللى تخرجوا من البيت.

أحسن حاجة

المكان بـ يهتم بالغناء الشرقى الأصيل وفيه خدمات متنوعة.

أسوأ حاجة

ممكن ما تعرفش توصل بسهولة.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح