The Definitive Guide to Living in the Capital , Cairo , Egypt

فن وثقافة

قصر عابدين: قيمة أدبية هائلة متجسمة في معمار فاخر

قصر عابدين: قيمة أدبية هائلة متجسمة في معمار فاخر
بواسطة
Hannah Cooper

الفرجة على أسلحة
أثرية بالنسبة للبعض هـ تكون تذكار على الأرواح اللي أهدرتها الأسلحة المعروضة٬
ولغيرهم هـ تحيي جواهم نشوة الشعور بالوطنية وفخر بذل الذات من أجل الوطن. لو انت
من الفريق التاني أو حتى الأولاني هـ تحب
تروح قصر عابدين وتزور المتاحف اللي فيه.

مقر للحكم من ساعة
ما اتبنى ولغاية ما الملك فاروق اتطرد منه على إيد ثوار 1952. القصر النهارده بـ
يستقبل الزوار المهمين والوفود الرسمية اللي بـ تيجي مصر. مساحته شاسعة٬ وهو على
فكرة أهم المباني اللي شيدها محمد علي باشا. ومن كتر بواباته هـ توه عقبال ما
تلاقي المدخل. ده غير ان الحرس اللي على بواباته لوحدهم يعملوا جيش صغير.

كشك التذاكر
والمدخل في شارع الجامع. التذاكر 3 جنيه للمصريين و2 جنيه للطلبة٬ أما الأجانب فتذكرتهم
بـ15 جنيه و10 جنيه للطلبة. والأمن هناك بـ يدقق بزيادة ومش هـ يسمح لحد يدخل
ومعاه أي كاميرا أو حتى جهاز مزود بكاميرا٬ زي الموبايلات!

أول ما تدخل القصر
هـ تنبهر بالجناين المُعتنى بها جداً والزرع المقصوص والورد والنافورات – مكان خلاب
ويا لو روحت في يوم شمس وجوه حلو.

صممه المهندس
المعماري الفرنساوي «روسو»٬ القصر تم إفتتاحه رسمياً في 1874 بعد ما اتبنى بعشر
سنين. مبني عشان يكون الجزء الرئيسي من البلاط الملكي٬ ومتأثر بمعمار العصور
الوسطى٬ ودي حاجة بـ تبان في المداخل وتصميماتها المنظمة جداً.

القصر 500 غرفة٬
لكن بطبيعة الحال مش كلهم معروضين في متاحف القصر. كل بهو من اللي هـ تعدي عليهم
في القصر فيه لافتات تشرحلك الخطوة الجاية في جولتك بطريقة واضحة٬ ده غير ان كل
المعروضات منظمة جداً ومترقمة والسجاجيد كمان مرتبة وكل حاجة في منتهى النضافة.

عشان محمد حسني
مبارك هو آخر رئيس أقام في القصر٬ في جزء كبير من القصر مخصص ليه. في متحف في كل
الهدايا اللي حصل عليها بصفته رئيس الجمهورية من زوار مصر٬ أو من خلال رحلاته –
وكل الهدايا عبارة عن أسلحة منها حاجات تعود للقرن الـ18. كل قطعة سلاح تنافس
أختها في الأناقة٬ ومنها اللي ليه مقابض مُرصعة بالعاج أو بكم هائل من المجوهرات.

وأكيد ماينفعش
تفوتوا المتحف الحربي واللي فيه تشكيلة معروضات مشوقة ومن الحاجات اللي أثارت
فضولنا مجوعة زراير الملك فاروق. في كمان تيجان فرعونية٬ وعلب سجاير مزخرفة٬
وإزازة عطر معمولة من مخالب الكابوريا – ودول كانوا من مقنيات راتب باشا. وفي وسط كمان سيف ألماني من القرن الـ17 مُرصع بالأحجار الكريمة والمينا الملونة.

طبعاً مش محتاجين
نقول ان كم الأسلحة في المكان مهول وفي مسدسات الطلقة الواحدة٬ الرشاشات والبنادق.
وبص كويس على تمثال الملك فاروق النصفي البرونزي عشان هـ تلاقيه صورة طبق الأصل منه
وفيه دقة عالية.

القصر بـ يتضمن
كمان متحف الفضيات ومتحف الهدايا الرئاسية وبهو المستندات التاريخية٬ لكن للأسف في
تاريخ زيارة الناقدة الأقسام دي كانت مغلقة. لو حابب تنعش معلوماتك التاريخية
الحربية هـ تستمتع بزيارتك للقصر.

المتحف مفتوح من 10
صباحاً وحتى 2 بعد الضهر٬ من السبت للخميس.

مقترح