The Definitive Guide to Living in the Capital , Cairo , Egypt

على أرض مصر فنانات وفنانين مميزين، قدروا بإبداعهم يصنعوا فرق في العالم كله، والفنانة شوشة كمال نموذج إيجابي للفنان المصري المبدع، واللي قدرت تصمم تحفة فنية بيتعامل معاها البيت الأبيض الأمريكي باعتبارها قطعة فنية فريدة من نوعها.. تعالوا نعرف حكاية الفنانة المصرية وتحفتها اللي بتزين البيت الأبيض.

 

بعد انتهاء ولاية الرئيس الأمريكي دونالد ترامب، تم عرض حوالي 8 آلاف هدية حصل عليها الرئيس السابق وزوجته خلال السنوات اللي كانوا مقيمين فيها في البيت الأبيض، وبحسب بيان للبيت الأبيض كان من بين أكثر 5 هدايا من حيث التميز، الهدية اللي حصلت عليها ميلانيا ترامب من الرئيس المصري عبد الفتاح السيسي، خلال زيارتها لمصر في أكتوبر 2018، وهي عبارة عن كرسي فني على هيئة جعران مصنوع من النحاس.

وفي أمريكا، وبعد ما بيترك الرئيس منصبه رسميًا، بيتم حصر قائمة الهدايا اللي حصل عليها، وبتنشر الحكومة الفيدرالية قائمة بجميع الهدايا، لأنها بتكون من ممتلكات البيت الأبيض.

وبحسب تقرير نشره موقع “سكاي نيوز عربية”، مصممة الكرسي ده هي الفنانة شوشة كمال، واللي قالت “إنه في أكتوبر 2018 طلبت الرئاسة المصرية منها العمل على نسخة من الكرسي علشان يتقدم كهدية لميلانيا ترامب خلال زيارتها لمصر”.

وبتضيف إنه “بالفعل تم العمل على الكرسي وتجهيزه، وتم عمل غطاء له من القطيفة قبل تقديمه لميلانيا”.

وبتحكي “شوشة” إنه “بعد ما وصل الكرسي لأمريكا وصلهم بريد إلكتروني من البيت الأبيض بعدها بشهر من الشخص المسؤول عن التقييم، ووصف القطعة أنها قطعة فريدة وعلى قدر كبير من الجمال وإنها مختلفة عن كل القطع الفنية الموجودة في البيت الأبيض.

وعن الكرسي، بتقول “شوشة” إنه “مصمم من النحاس بأيادي مصرية وخامات محلية، وعليه الجعران المشهور، وهو رمز من رموز جلب الحظ والحماية، علشان كده كان بيقتنيه الملوك، والقطعة الأصلية التي استلهمت منها التصميم موجودة في مقبرة الملك توت عنخ آمون”.