The Definitive Guide to Living in the Capital , Cairo , Egypt

القاهرة مليانة مواهب في مجالات مختلفة، ودايمًا فيه نوعين من المواهب دي، اللي بينتظر فرصة تجيله ويسيبها لظروفها، واللي بيسعى أنه يحقق حلمه وبيعمل المستحيل علشان موهبته تطلع للنور وتوصل لكل الناس، وده الطريق اللي اختاره الفنان الشاب محمد عبد الواحد، 32 سنة، واللي قرر يتمسك بحلمه في التمثيل وأنه يحجز لنفسه مكان في عالن الفن، حتى لو كان على المنصات البديلة، زي تيك توك، واللي حققت للفنان الشاب مشاهدات تخطت الـ 5 مليون مرة.

بيقول الفنان محمد عبد الواحد لـ “كايرو 360” إنه بيحب التمثيل من وهو صغير، وكان بيتفرج على الأفلام، وبيركز في تفاصيلها، زي لوكيشن التصوير، والتمثيل والديكور وحركة الكاميرا، وبدأ يميل أنه يعمل اسكتشات قصيرة وهو في المدرسة الابتدائية، وكان كمان بيقلد الممثلين في البيت، وأهله كانوا بيبقوا مبسوطين، وده كان حافز له أنه يكمل ويطور من نفسه، ولكن بسبب ضغوط الحياة تخلى فجأة عن حلمه علشان يركز في حياته العملية.

ومن فترة قريبة قرر محمد عبد الواحد أنه يرجع لحلمه وبدأ يدخل ورش تمثيل علشان ينمي ويطور مهاراته وموهبته، وبعدها بدأ يدخل اختبارات مكاتب الكاستينج اللي متخصصة في اختيار الممثلين الشباب، وفعلًا اشتغل في بعض الأعمال، منها مسلسل حب عمري، ومسلسل أحمس اللي اتوقف بسبب الحديث عن أخطاء تاريخية.

وعلشان الفرص قليلة وبتعتمد على شبكة علاقات كبيرة، قرر “عبد الواحد” يتجه لمواقع التواصل الاجتماعي علشان ينشر موهبته، وبدأ بالفعل في صناعة قناة خاصة، وأصبح له متابعين بيزيدوا كل يوم، وردود الفعل كانت مرضية بالنسبة له، ورغم أن مش هدفه أنه يكمل في السوشيال ميديا لكن هو بيعتبرها خطوة في طريقه لتحقيق الحلم وأنه يكون ممثل له تواجد وتأثير.

والممثل الشاب شايف أنه في بعض الأحيان بيكون اختيار الممثلين للأدوار الفنية بيكون عن طريق العلاقات والمجاملة والشللية، ومدرك كويس إن فيه صعوبة في الحصول على فرصة للموهوبين الشباب من بعض القائمين على الأعمال الفنية، وده من وجهة نظره بيحطم مستقبل الموهوبين، وبيطالب أنه الاختيارات تكون فقط من خلال اختبارات حقيقية مش مجرد علاقات، ورغم أنه شخصيًا متعرضش لظلم قبل كده، لكنه شاف ناس موهوبة أتظلمت قصاد العلاقات بين الأطراف المشاركة في الأعمال الفنية.

فيديوهات السوشيال ميديا بالنسبة لـ محمد عبد الواحد أقرب لطريق صحي لكل فنان عنده طاقة محتاج يخرجها، لأنه طول الوقت مشدود لحلمه وهدفه، كمان لأنه حابب يرسم الضحكة على وشوش الناس لأن فيديوهاته كوميدية بدرجة كبيرة وده بيساعد الناس على التخلص من ضغوطات الحياة.

محمد عبد الواحد مثله الأعلي الفنان أحمد زكي، اللي وصفه بالعبقري واللي بيوجه له رسالة: “الله يرحمك وحشتنا وكان عندك كتير”، وكمان وجه رسالة لكل فنان موهوب في بداية طريقه أنه يكون صبور ويصمم على هدفه، ولازم يكون مؤمن أن رزقه مكتوب وهيجيله بس لازم يسعى، وكمان وجه رسالة للمنتجين أنه متفائل خير الفترة الجاية خاصة أن الدراما والسينما بقى مستواهم أحسن بكتير ومابقاش فيه مكان للأفلام الهابطة خاصة أن الجمهور واعي وفاهم.

تقدروا تتابعوا محمد عبد الواحد من خلال أكونت الإنستجرام من هنا.

أو من خلال تيك توك من هنا.

ومن خلال صفحة الفيسبوك من هنا.

وحسابه على يوتيوب من هنا.