The Definitive Guide to Living in the Capital , Cairo , Egypt

الجديد:

الفكرة لازم تكون جديدة علشان تسمَّع فى الوسط الثقافى.. الفكرة هى المحرك الكبير للمراكز الثقافية،وقبل الفكرة لازم يكون فيه هدف كبير وبـ تسعى له.. وهنا لازم نأخذ المثل الصينى الشهير.. “لو حبيت شيء فاتركه حرًا.. لو بـ يحبك هـ يرجع ولو غير كده فقد تركته” والريس زكريا ساب الغناء الشعبى حر طليق.. لكنه استمر فى متابعته له من وقت للثانى.. لحد ما رجع له ثانى لكن بشكل جديد.

ما تيجى نحكى:

زمان كانوا يقولوا:”ما تيجى نحكى شوية وإحنا قاعدين على المصطبة”.. وكانت ليالى السمر والحكى والهزار والضحك كلها والناس قاعدة على المصطبة فى الهواء وما كانش فيه تليفزيون ومراوح وتكييفات.. علشان كده كان للحكى والغناء تأثير كبير.. مدير مركز المصطبة هو أ/ زكريا إبراهيم أو زى ما هو مشهور وسط الناس بالـ “ريس زكريا”.. ليه بقى الريس زكريا؟ لأن روحه الحلوة وبساطته هى اللى خلت كل اللى شغالين معاه يحبوه ويساعدوه فى الفكرة الجديدة.

الفكرة:

الفكرة باختصار هى أن يبقى فيه مركز يجمع الفرق الشعبية المختلفة ويجهز لهم عروض وحفلات وورش عمل فى مختلف الأماكن.. وبالفعل بعد جهد كبير قدر الريس زكريا يعمل الفكرة دى ويخليها حقيقة على أرض الواقع وبـ يعملوا حفلات فى كل مكان فى مصر والعالم.. وتعالوا نتعرف على الفرق.

فيه فرقة الطنبورة..وهى فرقة بورسعيدية بـ تقدم أغانى بورسعيد عن المقاومة وهى فرقة غنائية موسيقية راقصة بـ تتفاعل مع المسرح الارتجالى الشعبى..هدفها جمع وحفظ وإحياء التراث الموسيقي الشعبى، وربطه بالحياة القومية من مصر.

وفرقة الحنة.. وهى فرقة سويسية الأصل وقائدها هو الفنان “سيد كابوريا” وبـ يغنوا أغانى السويس الشعبية اللى بـ تلعب على فكرة المقاومة برضه بالذات الأغنية المشهورة “يا بيوت السويس يا بيوت مدينتى” وطبعًا العزف الأساسى لها بـ يبقى على آلة السمسمية.

فرقة الوزيرى.. وهى فرقة من الإسماعيلية وواضح أن المركز مهتم قوى بمدن القناة وقائدها الفنان/ عبد العال سلامة والفرقة مزج ما بين العزف والغناء والرقص الشعبى الجميل.

وفرقة دراويش أبو الغيط الصوفية اللى بـ تقدم رقص التنورة والأناشيد والابتهالات الصوفية الرائعة وبـ تصنع حالة إنسانية وروحية عالية.

وفرقة الجركن البدوية اللى فى العريش وبـ تقدم الفن البدوى غير المعروف والآلة الموسيقية الجديدة من نوعها “الجركن” اللى كانوا بـ يستخدموه فى الحرب فى سيناء.. وشوفوا بقى الجركن ممكن يطلع منه إيه.

وفرقة نوبانور النوبية اللى بـ تتكلم عن أحزان وأفراح النوبة وإزاى اتهجروا وبـ تعمل كمان شغل الحنة النوبي الجميل وأغانيهم اللى كلها فرح وموسيقى عالية.

من الآخر مركز المصطبة موضوع كبير وقصة كفاح لواحد كان عاوز يحقق حاجة وحققها.