The Definitive Guide to Living in the Capital , Cairo , Egypt

رغم وجوده في مكان بعيد عن قلب الأحداث، لكن أوبونتو جاليري بـ يقدر يوم بعد يوم يثبت نفسه عند جمهور الفن في الزمالك نتيجة لاستضافته المستمرة لمعارض رائعة ومختارة بعناية، معروض دلوقت في الجاليري صاحب المساحة الواسعة معرض فني غني بالألوان للفنانة المصرية هيام عبد الباقي، اللي قدرت تقدم أجواء احتفالية من خلال رسوماتها المميزة.

أول لما دخلنا الجاليري شدتنا الصور ودوامة الألوان الشبيهة بالتنورة.

هيام من مواليد 1972 محافظة كفر الشيخ، وحصلت على بكالوريوس في التربية الفن من كلية التربية النوعية جامعة طنطا سنة 1995، ودرجة الماجيستير ودبلومة في الرسم بالزيت سنة 1997 و2002، وكمان درجة الدكتوراة سنة 2003، هيام اشتركت في عدد كبير من المعارض في أماكن داخل وخارج مصر، ومنها بولندا وكوريا وبلغاريا.

لوحات هيام تتميز بالحجم الكبير والألوان والحركة الكثيرة، واحدة من اللوحات بـ تعرض أجواء احتفالية وكل جزء منها فيه ناس بـ ترقص وتلعب، والحقيقة أن جو اللوحة نفسه ممتع وهـ تلاقي نفسك لوحدك واقف أمامها شوية وبـ تتأملها لفترة قبل ما تروح تتفرج على عمل آخر.

من نظرتنا العامة على المعرض نقدر نقول أن ستايل هيام يعتمد على الألوان والفوضوية، كل لوحة من لوحاتها بـ تقدم فكرة وكثير من أعمال هيام الفنية بـ تعرض لمحة من تراث مصر، مع التركيز على الريف وملابسه التقليدية، قطعة ثانية بـ تركز على الحيوانات اللي بـ نشوفها في أي مزرعة، ومنها الماعز والفراخ.

لوحة من اللوحات بـ تعرض شوية سيدات ماشيين في الشارع بـ يتكلموا مع صديقاتهم، وفيها شباب صغير وعمليات تسوّق وسط الزحمة والهيصة، وفيه مخلوق له أربع أرجل يمكن يكون كلب أو معزة ماشي وسطهم، الألوان في اللوحة غريبة ومطرقعة، يعنى لو ركزت على وجه سيدة هـ تلاقيه لونه أزرق والحيوانات لونها برتقالي حاد، الألوان المستخدمة في لوحاتها ماشية على مذهب الرسم المتحرر اللي بـ يرجع لأوائل العشرينات.

عمومًا، المعرض الموجود في أوبونتو حاليًا تجسيد رائع مش بس لموهبة وعشق هيام عبد الباقي للريف والتراث المصري، كمان بـ يعرض حرية استخدام الألوان والستايل اللي بـ يميز مذهب الرسم المتحرر.