مكتبة مصر العامة… جنة عشاق الكتب في الجيزة
الجيزة الدقي شارع الطحاوية عنوان مكتبة مصر كتب معلومات عن مكتبة مصر مكتبات القاهرة مكتبة مبارك سابقاً مكتبة مصر العامة
Rehab Aly
ساعات بتحس أنك محتاج مكان جديد تتردد عليه بانتظام ويكون ملجأ لك لما تحب تنفرد بنفسك، وتفكر بهدوء، وتحس أنك بجد بتستجم عقليًا، وبترمم دماغك من كمية الضغوط والمشاكل اللي بتواجهك في كل دقيقة، إحنا نعرف مكان كده اسمه “مكتبة مصر”، المكتبة دي في الجيزة لكنها معزولة بشكل عجيب عن الدوشة، وموقعها بيطل على النيل مباشرة، وكل حاجة فيها لونها أبيض، والناس اللي شغالة فيها بتحافظ على الهدوء، وبتحب شغلها، ولما تروح هناك بجد هتنبسط ومش هتندم أنك رحت.
المكتبة ممكن تروح لها بثلاث طرق من ثلاث اتجاهات، لو أنت في الجيزة، تعالى عند مديرية أمن الجيزة، ومن هناك هتوصل بسرعة في ثواني، وهتلاقي يافطة على أول الشارع بتقول لك أن المكتبة موجودة، ولو أنت في الدقي عندك طريقتين تروح بهم: إما أنك تدخل شارع النيل اللي على أوله الشيراتون وتتمشى وسط المناظر التحفة اللي هناك على النيل، أو تدخل الشارع اللي فيه مجلس الدولة ومدرسة الأورمان اللي بيوصل لك على مديرية الأمن وهتلاقيه في السكة برضه.. أنت وراحتك.
كان اسمها قبل يناير 2011 “مكتبة مبارك العامة”، وتم تغيير اسمها إلى “مكتبة مصر” بعد الثورة، لكن سيبك أنت من الاسم أهم حاجة المضمون، وفعلاً المكتبة من الداخل تحفة، مكونة من أربعة أدوار وجنينة، الجنينة فيها أماكن للقعود، علشان لما تستعير كتب وتحب تقرأها قبل ما تمشي في المكتبة تقدر تقعد وتستمتع بالمشهد حولك، أما المكتبة نفسها ففي الدور الأرضي هتلاقي شئون الاستعارة والاشتراكات والدفع والمعاملات، والإعلانات عن الندوات.
وفي الدور الأول هتلاقي الكافيتريا وقسم القراءة للكبار، كتب رصينة ومهمة في كل المجالات، وكمان فيه مراجع ضخمة جدًا وقواميس قديمة وضخمة برضه، ودي مش للاستعارة، للاستخدام الداخلي لكن مهمة، ومنها حاجات نادرة وغالية جدًا المكتبة هتسعفك فيها.
في الدور ده هتلاقي كافيتريا ممكن تدخل تقرأ داخلها وتشرب أو تأكل حاجة وأنت بتقرأ، والكافيتريا دي ميزتها أن فيها كل أنواع الجرائد والمجلات اللي ممكن تخطر على بالك من أول الأهرام لحد الفجر، ومن أول روزاليوسف لحد النيوزويك النسخة العربي، وفي الدور ده كمان هتلاقي أجهزة كمبيوتر مظبوطة على أنك تقدر تعمل بها بحث عن اسم الكتاب اللي أنت عاوزه، ويقول لك مكانه، وعدد النسخ المتوافرة منه، أو تبحث عن كاتب معين وعدد الكتب المتوفرة له.
في الدور الثاني متعة خاصة، ده بقى دور الأطفال، والشباب، دور حلو جدًا، كله قصص وروايات، قصص عالمية وكتب عن حاجات كلنا بنحبها، إحنا تحديدًا من عشاق ركن قصص الرعب والأشباح ودي هتلاقي على الرف بتاعها قصص صرخة الرعب، وقصص دكتور أحمد خالد توفيق أسطورتنا.. كمان هتلاقي كل أعمال أجاثا كريستي، والروايات العالمية.. بجد متعة.
علشان تشترك في مكتبة مبارك هتدفع مبلغ رمزي، ثمن الاشتراك واستمارة العضوية وهتحتاج صورتين شخصيتين، وصورة بطاقتك والاشتراك بيستمر لمدة سنة كاملة، تقدر خلالها تستعير خمسة كتب كل ما تروح المكتبة وتستعير غيرهم بشرط أنك ترجعهم قبل مرور أسبوعين كاملين، لكن لو عجبك الكتاب قوي وحابب تكمله في البيت ممكن تجدد الاستعارة من خلال التليفون وتكمل الاستعارة أسبوعين كمان، وترجعهم وتأخذ غيرهم وهكذا.
العنوان: 4 شارع جمال حمدان (الطحاوية)، متفرع من شارع النيل بالقرب من مديرية أمن الجيزة.
تليفون: 33360291-33360293
