The Definitive Guide to Living in the Capital , Cairo , Egypt

الصورة: هشام توحيد

الشطرنج لعبة بيعشقها ناس كتير، بنلعبها على القهوة، في البيت، أو حتى على الموبايل، لكنها في الأصل لعبة ملوك. بس هل عمرك تخيلت شطرنج مش من خشب أو بلاستيك، لكن من الذهب الخالص ومرصع بالماس؟

في الإسكندرية، جوه متحف المجوهرات الملكية، موجود واحد من أندر وأغلى أطقم الشطرنج في العالم، شطرنج الملك فاروق، قطعة فنية فريدة مش بس في تاريخ مصر الملكي، لكن في تاريخ المجوهرات والألعاب الملكية على مستوى العالم.

في السطور الجاية، هنعرف حكاية شطرنج الملك فاروق من خلال 5 معلومات فيهم الخلاصة، وهنعرف ليه ملوش مثيل، وإزاي بقى واحد من أهم كنوز متحف المجوهرات الملكية في الإسكندرية.

1 – شطرنج الملك فاروق هو قطعة نادرة من مقتنيات الملك فاروق، وهي الوحيدة من نوعها في العالم، وبحسب خبراء فالقطعة دي لا تقدر بثمن، وهي مصنوعة من الذهب والماس.

2 – بحسب إدارة المتحف، فالشطرنج ده كان هدية من شاه إيران محمد رضا بهلوي للملك فاروق آخر ملوك مصر، والهدية دي كانت قطعة فنية فريدة ومميزة في عالم المجوهرات وعالم الشطرنج كمان، وده لأنها مالهاش مثيل في كل متاحف العالم.

3 – الشطرنج مصنوع من الذهب ومرصع بالماس ومحلى بالمينا الملونة ومكون من 32 قطعة بتشمل: (قطعتين للملك، قطعتين للوزير، 4 جمال، 4 أحصنة، 4 أفيال، و16 عسكري على كتفهم الأيمن بندقية ولابسين عمامة بيتوسطها حجر من الماس).

4 – بتنقسم قاعدة الشطرنج لقسمين؛ جزء قاعدته باللون الأحمر وعليها من الأسفل صور 8 من ملوك الهند، و8 صور تانيين لمجموعة من الملكات.

5 – أما الجزء الثاني من القاعدة فبيتميز باللون الزيتي والقاعدة عليها من تحت مجموعة مميزة لأهم المزارات والأماكن بالهند، زي تاج محل والقلعة الحمراء والمسجد الجامع وغيرهم من الأماكن.

معلومات عن المتحف

بيعتبر متحف المجوهرات الملكية أهم مكان في مصر مختص بعرض مجوهرات الأسر المالكة اللي حكمت مصر، واتبنى القصر سنة 1919 في منطقة زيزينيا، وكان خاص بالأميرة فاطمة الزهراء وهي واحدة من أميرات الأسرة المالكة، وتصميم المبنى على طراز المباني الأوروبية في القرن التاسع عشر ومن الداخل مزخرف بوحدات فنية مميزة.