The Definitive Guide to Living in the Capital , Cairo , Egypt

في قلب وسط البلد، وسط دوشة شارع 26 يوليو وزحمة القاهرة اللي مابتنامش، دايمًا بنبقى محتاجين مكان نهرب له شوية، نفصل فيه عن الإيقاع السريع ونرجع نحس بالروقان والفن الحقيقي. مركز مولانا الثقافي واحد من الأماكن النادرة دي، مكان أول ما تدخله تحس إنك خرجت من الزمن الحالي ودخلت عالم تاني مليان تفاصيل فنية، مزيكا حية، ودفا ثقافي بيخلي التجربة مختلفة من أول خطوة جوه المكان.

عالم تاني لما بتدخله بتلاقي ديكور بيخطف العين، المكان مش مجرد كافيه أو مسرح، ده أشبه ببيت فنان قديم الحيطان من الطوب الحراري المرسوم عليها “مولوية”، ومكتبة الكتب اللي معمولة بذكاء من أقفاص الجريد، وماكينة الخياطة القديمة اللي بتفكرنا ببيوت جداتنا، حتى الإضاءة بـ “الطرابيش” الحمراء وصور العمالقة زي أم كلثوم وعبد الحليم بتكمل الحالة، باختصار، كل ركن هناك ينفع “كادر” صورة مميزة.

كل خميس وجمعة بيتجمع 5 أفراد عاملين باند اسمه “مولانا” واللي جمعهم المكان من خلال لقاءات بالصدفة  لكن المميز هنا مش بس المزيكا المتنوعة اللي بتلبي كل الأذواق، المميز هو “الروح” اللي في الفرقة اللي حكايتهم بدأت من قلب المكان واتعرفوا على بعض في “مولانا”، والصدفة وحب المزيكا جمعهم فقرروا يعملوا فرقة خاصة بيهم، عشان كدة لما بتسمعهم، بتحس بتناغم وكيميا عالية بينهم، كأنهم عيلة واحدة مش مجرد عازفين بيؤدوا شغلهم، وده بيخليك تعيش معاهم حالة “سلطنة” حقيقية، ومنهم اللي من البحيرة واللي من القاهرة واللي من المنوفية وهكذا، تجميعة متنوعة وغريبة ولكن عملت باند بروح مصرية أصيلة يغلبها خفة الدم والطابع الفكاهي.

مركز مولانا مش بس مكان للسهر ولكن هو له طابع ثقافي برعاية وزارة الثقافة المصرية، وبيقدموا “ورش” لتعليم آلات موسيقية مختلفة، ومفتوح كمان كـ “Work Space” هادي وملهم للمذاكرة أو الشغل الصبح أو في أوقات غير الحفلات.

أما عن الأسعار فهي حسب تجربتنا لهم، سعر تذكرة الحفلة بـ 200 جنيه، ولازم حجز مسبق والحفلات بتبدأ 8 مساءً.

ولو حابين تعملوا عيد ميلاد فخدمة التورتة بتكون 250 جنيه، وللأسف مفيش عندهم أكل ولكن ممكن تجيبوا أكل معاكم وتدفعوا 10 جنيه على الفرد كخدمة، وكمان هما عندهم 50 جنيه بتدفع كمشروب إجباري والخيارات ما بين “قهوة – شاي – كانز”، وهنا احنا عندنا ملحوظة، رغم جمال المكان وقصة الفرقة الملهمة، موضوع أن ندفع مع تكت الحفلة 50 جنيه مشروب إحباري عكرت مزاجنا شوية، بصراحة، الفكرة دي مش مستحبة وحسستناإننا مقيدين ومطلبناش اللي نفسنا فيه، خصوصاً إن تذكرة الحفلة سعرها مش قليل، كان الأفضل إن الطلبات تكون اختيارية عشان نحس بترحيب أكبر، وبنتمنى إدارة المكان تعيد النظر في النقطة دي عشان التجربة تكون مثالية 100%.

الخلاصة: “مولانا” تجربة بصرية وسمعية تستحق الزيارة، مكان بيحترم الفن وبيقدر التراث، ومثالي لـ “شلة صحاب” غاويين فن، أو خروجة رايقة تفصل بيها من ضغط الشغل في قلب وسط البلد.

تقدروا تعرفوا أكتر عنهم من خلال صفحة الفيسبوك من هنا.

والحجز من خلال واتس آب رقم 01150954225