The Definitive Guide to Living in the Capital , Cairo , Egypt

المحل حجمه ضخم وواخد مساحة محترمة فى الميدان وبالتالى أنك تدور عليه مش هـ يكون أزمة بتاتًا، المكان بـ يتكلم عن نفسه وخاصة أنك كمان هـ تلاقى كام ترابيزة وكام كرسي فيرفورجيه محطوطين بره للى حابب يطلب حاجة ويأكلها، بس الفكرة دي ما عجبتناش شوية لأنها ببساطة على رصيف أو ساحة فى الشارع ومافيش خصوصية، كل اللى رايح واللى جاي كأنه معاك على الترابيزة.
هـ تلاقى هناك كل حاجة لها علاقة بالحلويات الشرقية والجاتوهات والمخبوزات وكمان فيه قسم لعمل الفطائر والبيتزا أمامك، وأطباق الشوكولاتة والتورتات (العادية والآيس كريم) وكمان الآيس كريم نفسه. الناس هناك خدومين ومبتسمين ماعدا واحد بس اللى على الكاشير!
المحل له بابين فى الواجهة للدخول والخروج، أول ما تدخل على إيدك اليمين هـ تلاقى كاونتر زجاجى طويل فيه ما لذ وطاب من الحلويات الشرقية اللى شفناها وعارفينها قبل كده والجديد منها كمان اللى أول مرة نسمع اسمه.. فيه أطباق جاهزة أسعارها 48، و52 و70 جنيه وممكن أنت تعمل تشكيلة من اختيارك بالوزن وهو بـ يحسب لك السعر النهائي للأنواع اللى أنت أخذتها.
بعدها فى الواجهة هـ تلاقى ركن عمل البيتزا والفطائر الحادقة والحلوة (الحاجة الوحيدة اللى لها منيو، الباقى يا إما مكتوب عليه يا إما هما بـ يجاوبوا على أسئلتك)، أسعار البيتزا الصغيرة 10 أو 15 والمتوسطة بـ تتراوح من 15 لحد 24 جنيه والكبيرة من 26 لحد 35 جنيه. الفطائر الحادقة يا إما تأخذها ملفوفة زي الساندويتش (من 7 لـ 17 جنيه) أو تأخذها فطيرة عادية بحجم وسط (من 12 لـ 18 جنيه) والكبير (من 25 لـ 40 جنيه)، والفطير الحلو فيه بالكريمة، وبالسكر، وبالشوكولاتة، والمكسرات والأسعار برضه فى نفس النطاق.
بعد كده هـ تلاقى أرفف للسقف عليها أنواع عيش ومقرمشات ومخبوزات بأسعار لطيفة، باتيه الجبنة الرومي (3.25 جنيه) وبيتزا مدورة حجم صغير (3 جنيه)، وفى المنتصف هـ تلاقى قسم معروض فيه أطباق صغيرة أم على وأرز باللبن ومهلبية وعاشوراء، وجنبها أطباق البيتي فور الجاهزة أو بالكيلو بأسعار 50 جنيه لكيلو العادي و60 جنيه للبيتي فور السواريه، للأسف هنا مش هـ تقدر تأخذ بالكيلو دائمًا لأن المتاح هنا أطباق جاهزة بس لأنهم بـ يجهزوها كده من بدري وقليل ما هـ تلاقى سايب تأخذه بالكيلو.
جنبهم كمان فى المنتصف ثلاجة آيس كريم فيها أصناف مختلفة، وكمان فى ظهرها ثلاجة تورتات آيس كريم أشكالها لطيفة، ولأول مرة نشوف هناك صواني شوكولاتة للمناسبات مكتوب عليها تاريخ صلاحية! عجبتنا قوي، الصلاحية لمدة 90 يوم وفيه بالكيلو وفيه ممكن تجيب صينية كاملة، وكل التفاصيل مكتوبة على الطبق.
فى الجنب الثاني القسم اللى بـ تستلم منه حاجتك ويليه قسم التورتات والجاتوهات والساليزون، التورتات بـ تتراوح أسعارها من 65 لحد 120 جنيه، الجاتوه القطعة إما بـ 5.5 أو 6 أو 8 جنيه، الساليزون المشكل (1/2 كيلو بـ 40 جنيه) وبـ يكون أطباق جاهزة برضه، وفيه ستاند فيه شموع وأشكال لطيفة بـ تتحط فى التورتات للاحتفال بالمناسبات المختلفة.
طلبنا بيتزا سوبريم (وسط بـ 24 جنيه) عبارة عن صوص طماطم وموتزاريلا ومفروم لحم ومشروم وسوسيس وفلفل أخضر وزيتون، وكمان جربنا فطيرة بالمكسرات (حجم صغير بـ 10 جنيه) اللى بـ تتكون من كريمة ومكسرات مشكلة وعسل وسكر وسمن، تحضيرها أخذ حوالى 20 دقيقة، البيتزا كانت حلوة جدًا، حظنا السيء بس جاء فى فلفل مشطشط شوية، تعليقنا الوحيد بس أننا بـ يستحسن –بالنسبة لنا- أن ما يكونش فى البيتزا لحم مفروم لكن عامة طعمها كان كويس، فطيرة المكسرات كانت مردومة مكسرات وزبيب لكن ما كانش فيها ريحة أى كريمة وبالتالى كانت كل مكوناتها ناشفة وما عجبتناش قوي، غير أنها كانت ملسوعة شوية من تحت.
أخذنا كمان ¼ كيلو حلويات شرقية مشكل (7.5 جنيه) وكانت حلوة قوي، وعندهم هناك أصناف غريبة ما سمعناش عنها وكمان ما عرفناش نحفظ اسمها من صعوبته، من ركن المخبوزات اختارنا واحدة باتيه بالجبن الرومي وواحدة بيتزا مدورة والاثنين كانوا أحلى من بعض، أى نعم البيتزا ما كانتش غير صلصة وجبنة رومي وزيتون غير ملحوظ لكن معمولة بحرفية وعجبتنا.
الإغراءات كثيرة فى المكان هناك، والاختيارات مالهاش نهاية وفوق كل ده الأسعار معقولة جدًا بالمقارنة بأماكن ثانية بـ تغالى فى أسعارها، لو عندك مناسبة وحابة تقدمي أصناف متنوعة لضيوفك أكيد هو ده المكان المناسب.. بس خلوا بالكم من وزنكم.