The Definitive Guide to Living in the Capital , Cairo , Egypt

بقلم: رنا شرف

لو كنت من عشاق منطقة وسط البلد، أكيد عديت على السندباد، وهو مكان مميز بيقدم أشكال متعددة للبهجة، يعني هتلاقي فيه أكل وعصائر وتسالي وحاجات أكتر، وكل ده بسعر معقول وجودة عالية.. في السطور الجاية هنعرفكم أكتر على تجربتنا في المكان ده.

السندباد موجود في وسط البلد، وبالتحديد في 33 شارع قصر النيل، أول ما هتوصل هتعرف المكان بسبب موقعه المميز والإقبال اللي عليه، وهتلاقي ناس من مختلف الأعمار.

المكان مبهج بدرجة كبيرة، من أول الفيو الجميل، مرورًا بالقعدة الحلوة، ووصولًا للجودة العالية والسعر المناسب.

جربنا في قسم العصائر عصير برقوق باللبن، وكان جامد جدًا، وسعره 15 جنيه، جربنا كمان لبن العصفور، وده عبارة عن مشروب اختراع، كوكتيل بلح وكيوي ولبن وعسل، ميكس يجنن بسعر 20 جنيه.

ومن قسم الأكل جربنا هناك البيتزا، وكانت حلوة، وبتتصحكم تجربوا بيتزا بسطرمة أو بيتزا سندباد، الاتنين دول هايلين. بيتزا البسطرمة عبارة عن بسطرمة وموزريلا مع طماطم وفلفل وزيتون، ودي سعرها 40 جنيه، أما بيتزا السندباد سلامي، فهي بتتكون من بسطرمة وروزبيف، مع مشروم وطماطم وجبنة موزريلا، بالإضافة لفلفل وزيتون، وهى حجمها مناسب لفرد واحد، والصغيرة منها سعرها 45   جنيه.

ولو حابب تحلي، المكان بيقدم لك فطائر حلوة، عجبنا هناك فطيرة البسبوسة بالكنافة، ودي سعرها 40 جنيه للحجم الصغير، وفيه كمان الفطيرة القنبلة، ودي حاجة من الآخر، عبارة عن رز باللبن مع تفاح وموز وقشطة وكيوي.

كلنا وحلينا واستمتعنا بالعصير؟ نيجي بقى للنقنقة، اللي هتلاقيها في ركن التسالي، واللي مليان بكل ما تتخيله، هتلاقي سوداني على الفحم، ولب إيراني، ولب سوري، ونكهات ملسيات سورية.

نيجي بقى لنقطة مهمة، لو نفسك تحتفل بعيد ميلادك في وسط البلد، تقدر تعمله في السندباد، لإن المكان فيه صالة جميلة ومناسبة لأعياد الميلاد.

أكيد هنزور المكان تاني وتالت ورابع.