The Definitive Guide to Living in the Capital , Cairo , Egypt

طبعًا كلنا عارفين أن سمعة الزمالك سابقاها باعتبارها المركز الرئيسى للأكل فى القاهرة، وكمان مشهورة بتقديمها لأكلات مطرقعة. مع مطاعم زى جمبالايا اللى بـ يقدم المطبخ الأسبانى، وبابليشيوس صاحب شاى الفقاعات الوحيد فى العاصمة، المنطقة عمومًا تعتبر لوحة فنية مفتوحة لكل أنواع الأكل الفريدة من نوعها. 

صحيح القاهراوية بـ يستمتعوا بقى لهم سنين بالمطبخ الإيطالى، لكنهم ما عرفوش الجرافا أو graffa  إلا مع افتتاح بارتيتا؛ يعنى إيه الكلام ده؟ الجرافا ببساطة هو تعديل إيطالى على الدوناتس التقليدية، بـ يُقدم بمجموعة من النكهات الحلوة والحادقة.                                                         

على شارع صغير متفرع من 26 يوليو، بارتيتا محل بسيط يميزه ديكورات مبهجة ومنيو جذابة مكتوبة بالطباشير على سبورة. وعلشان المكان صغير، مافيش قعدة متاحة، والحل هو التيك أواى أو الديلفرى.

عجينة الجرافا طرية وسهلة المضغ، تشبه الدوناتس؛ بـ تكون ملفوفة بشكل بيضاوى، وبـ تدخل الفرن وبعدها تتقلى، بس الحاجة الكويسة أن زيتها أقل من نظيرها الأمريكانى. مع أول قضمة، حسينا أن فكرة الجرافا ما هى إلا نسخة مختلقة من الدوناتس العادية، وطعمها قريب جدًا منها، فعادى يعنى مافيش جديد.

من وسط كل الحوادق، أجمد حاجة من وجهة نظرنا كانت السجق (15 جنيه)، بكمية كبيرة من اللحم، وخليط من التوابل مع فلفل أخضر. بالنسبة للجرافا بالرومى والجبنة (15 جنيه)، الجبنة كانت ذائبة على الرومى، وده زود من جمال الطعم والقوام المتماسك، ونفس الموضوع كان مع الهوت دوج والجبنة (18 جنيه).

يمكن كان طعم الحادق منها حلو ولذيذ، بس المطعم بـ يظهر قدراته بجد فى الحلويات. لكل عشاق النوتيلا، نحب نقول لكم أن النوتيلا جرافا (15 جنيه) هـ تبهركم بكميتها الكبيرة من النوتيلا سبب إدمان شعب مصر كله. ما قدرناش نمسك نفسنا عن مربى جرافا، اللى كانت على عكس الشوكولاتة، مقسومة نصفين، مع طبقة مربى مسكرة مفروشة وسط العجينة، قبل ما يتم رشها بسكر بودرة لإضافة طعم بديع.

بغض النظر أن الطباخين تأخروا شوية فى تحضير الأوردر، برتيتا بـ يقدم نكهات لذيذة وكميات كبيرة. على العموم، بـ ننصح تجرب حلوياتهم أكثر من الحوادق.