The Definitive Guide to Living in the Capital , Cairo , Egypt

فيه حاجات في الدنيا مش بتتقاس ماديًا بس، فيه حاجات بتكون مصدر سعادة لنا، ولازم نعترف أن من الحاجات دي طبعًا الشوكولاتة، أول مرة سمعنا عن برو أند شو – Brew & Chew كان فرعه اللي في إسكندرية واللي كنا كتبنا عنه في 2014، وتشوقنا أننا نروح له لما نزور إسكندرية بس هو فاجئنا وجه لحد عندنا في كورت يارد المعادي، طبعًا فيه مكان خارجي وداخلي، ولازم نقول أن الديكور كان رائع خاصة الدولاب الأبيض اللي فيه ناحية منه مليانة زرع صناعي وناحية ثانية فيها ديكورات صغننة بألوان مختلفة وجواها كلمة "Brew & Chew best dessert in town".

المكان معروف بحلوياته المختلفة اللي حرفيًا مافيش كلام يوصف جمالها وحرفية تقديمها، المنيو كمان مش مقتصر على الحلويات بس، لأ ده منيو كامل فيه شوربة ومقبلات وساندويتشات وأطباق دجاج ولحوم، ده غير المشروبات طبعًا، بس إحنا قررنا نجرب نوع واحد من المأكولات الحادقة وحاجتين حلو.

طلبنا ساندويتش Stuffed Cheesy burger بـ 45 جنيه، ومعاه lemonada smoothie بـ 22 جنيه، الساندويتش جاء لنا تقريبًا بعد ثلث ساعة، وكان حجم كبير جدًا لدرجة أننا ما عرفناش نقضمه فقررنا أننا نقطعه قطعة قطعة، طعم الجبنة جواه كان مميز هو بعض أطرافه كانت مستوية زيادة عن اللزوم بس ده طبيعي علشان الجبنة اللي جواه، أما سموزي الليمون فكان حلو جدًا لأنه كان مع صوص بلو كرواسون لونه أزرق ومنعش واللي إحنا شخصيًا بنحبه جدًا.

بعد كده دخلنا على منيو الحلو ولازم نعترف أننا احتارنا جدًا حرفيًا بين الأصناف، ما بين مولتن كيك بأنواع بالشوكولاتة وبالريد فيلفت وبالفستق، والمكرونة بالشوكولاتة والوافل والميني براونيز والـ Chocolate fountain، وحاجات كثيرة ثانية مغرية لأقصى درجة، قررنا نبدأ بـ Melting chocolate field بـ 58 جنيه، وطلبنا معاه Caramel toffee frappe بـ 27 جنيه، عارفين لما حاجة تُقدم ويبقى شكلها عادي جدًا ومع أول معلقة تنبهر من الطعم اللي لمس لسانك، وما تبقاش عارف توقف أكل خالص، لأن الطعم اللي أنت دوقته مالوش مثيل، ده غير أن مع كل طبق شوكولاتة بيكون جنبه طبق ثانية فيه مياه وثلج بيطلع بخار شكله حلو جدًا بيعمل شكل ظريف يحسسك أنك في مملكة الشوكولاتة فعلًا.

الطبق عبارة عن طبقة كيك مقرمشة مع بولة آيس كريم فانيليا، وأول ما معلقتك بتخترق طبقة الكيك المقرمشة بتنهار أمام الشوكولاتة السايحة البلجيكية اللي طعمها حكاية، وبس خلاص دخلنا مملكة الشوكولاتة المبهرة اللي ما كناش عاوزين نرجع منها أبدًا، طبعًا الكراميل توفي فرابيه كان حلو ومضبوط بس جنب الشوكولاتة كنا محتاجين حاجة أخف.

بعد فترة من الراحة أو الهدنة قلنا نجرب حاجة مختلفة، فطلبنا مولتين كيك بالليمون بس للأسف جات لنا صغيرة مش زي الصورة اللي في المنيو لأنها بتقدم بطريقة مختلفة هنا في القاهرة، والعجينة كانت لزجة شوية، لكن أول ما قلنا للشخص المسئول بدلها لنا بحاجة ثانية وقال أنه هيفاجئنا فجاب لنا مولتن كيك بالـ peanut butter بـ 48 جنيه، واللي كان طعمها خرافي لكن للأسف إحنا ما نقدرش نأكلها علشان مش بنحبها، فغيرها لنا لثالث مرة وقال لنا أن من سياسة المكان إرضاء الزبائن كلهم لأقصى حد، يعني أي حاجة ما تعجبناش من حقنا أنه يغيرها لنا، وبدلها لنا بـ Frosting Oreo mellow بـ 38 جنيه، وده عبارة عن طبقة شوكولاتة مع طبقة بسكويت أوريو فوق بعض وفي الآخر مارشميلو سايح، حاجة كده ولا في الأحلام، إحنا ما قدرناش نكمله خالص، برغم أننا طلبنا Pine Squash smoothie بـ 25 جنيه، واللي كان طعمه مسكر ولاذع في نفس الوقت وعجبنا جدًا.

تجربتنا في Brew & Chew من التجارب القليلة اللي استمتعنا فيها من أولها لآخرها، لدرجة أننا ما كناش عاوزين نمشي، وأكيد مش هتكون زيارتنا الأخيرة لهم، ونتمنى أنهم يفتحوا فروع في أكثر من مكان علشان يسعدوا أكبر قدر من الناس بطعم الشوكولاتة المميزة والخدمة الممتازة.