The Definitive Guide to Living in the Capital , Cairo , Egypt

تريانون بـ يقدم
مجموعة متنوعة جداً من المشروبات الساخنة والقهوة بأشكالها  والعصائر والمخبوزات الغربية والحلويات والسندويشات والبيتزا والباستا،
ده غير السلاطات والشوربات بالإضافة لمجموعة من الأطباق الرئيسية الساخنة.

 فروع «تريانون» بـ تغطي معظم المناطق في القاهرة الكبرى والأسكندرية،
وأهم  حاجه بـ تميزها هو طابع الديكور
الكلاسيكي جداً للجداريات المرسومة يدوياً والمصممة خصيصا للمكان ومع ذلك هـ تشعر بجو من
الرحابة والإسترخاء.

يفضل أنك
تروح وسط الأسبوع بـ يكون المكان أقل زحمة والويترز قادرين يقدموا خدمة أفضل وأسرع
طبعاً. 
ترتيب الترابيزات عامل شوية زحمة
في المكان، لكن إذا كنت بـ تحب الناس اللي انت جاي معاهم، أكيد مش هـ تمانع في الجلوس على مسافة قريبة جداً منهم .
«تريانون» بـ يقدم مجموعه كبيرة من المشروبات،
تقريباً كل أنوع القهوة والعصائر والكوكتيلات الطازجة، كلها معموله فريش، ودائما هـ
تسمع صوت الخلاط بعد ما تعمل الأوردر بتاعك، وخصوصاً لما تطلب عصير البطيخ الفريش (16 جنيه)
في يوم
صيف حار، تجربة منعشة جداً. 
جعان وعايز تأكل؟ ممكن تختار من
الأصناف الكتير اللي في المنيو، وبأسعار معقولة جداً وللي بـ يحب الوجبات الخفيفة فيه
سلاطات كتير قوي أشهرها سلاطة السيزار بالفراخ (39 جنيه)، بـتـ تقدم في خبز
التورتيا الخاص بيهم ده غير المجموعة المتنوعة من السندويشات
الباردة والساخنة. 
تقريباً غير
محلات الفول والطعميه، مش سهل أبدا أنك تلاقي مكان تفطر فيه بره البيت  الساعة 7:30 صباحا ولكن «تريانون» بـ يقدم ده.
جربنا هناك المنيو اللي مقدمينه للفطار وهو طبق أومليت مع كابتشينو (21 جنيه)،و هو عبارة عن طبق
من الأومليت من إختيارك وسلاطة خضراء عليها الدرسينج أو الصوص الخاص بيها، تقدم مع
كيك البطاطس المخبوزة وعيش توست مع فنجان الكابتشينو، بداية لذيذة فعلاً لليوم.

الملاحظة الوحيدة في تريانون روكسي هي انك لو كنت عاوز تشتغل على
اللاب توب بتاعك عشان شغلك أو حتى دراستك هـ تواجه صعوبة أنك تلاقي مكان قريب تحط
فيه الفيشه ده غير ان الإضاءة الضعيفة مش هـ تساعدك في مهمتك، اه.. والموسيقى في بعض
الأحيان بـ تكون مملة. 

تريانون إختيار جيد والأكل لذيذ بأسعار معقولة، وفي فرع روكسي بس ممكن تستمتع
بالشيشة ( 20.50 جنيه) في الدور الارضي وانت بـ تدردش مع أصحابك.