The Definitive Guide to Living in the Capital , Cairo , Egypt

كافيهات
تشوكوليت مانيا – Chocolate Mania

تشوكوليت مانيا: شوكولاتة متقدمة بشكل مبهر لكن بطعم مقبول في المعادي

تم التقييم بواسطة
Nagla Ashraf
قيم
قيم الآن
تشوكوليت مانيا: شوكولاتة متقدمة بشكل مبهر لكن بطعم مقبول في المعادي

بطبيعة عملنا كمحررين لكايرو 360 بـ نجرب أماكن كثيرة، وبـ نقدر نفرق ما بين الطعم القوي الشهي وبين الطعم العادي اللي ممكن يكون أقل من المستوى المطلوب في الطعم والاحترافية، وللأسف ده اللي لاقيناه في تجربتنا مع تشوكوليت مانيا – Chocolate Mania.

فرحنا جدًا لما عرفنا أن فرع جديد لهم فتح في المعادي في شارع 9 وكنا متشوقين نجربه، وشوقنا زاد أكثر لما شوفنا المنيو اللي مليان حاجات مختلفة، زي البرجر اللي معمول من الـ Macron وحقنة الشوكولاتة وبيتزا الشوكولاتة وشاورما الشوكولاتة، بس ده كله يتوقف على نوع الشوكولاتة، هل الاختراعات دي هـ تنجح ولا هـ تكون مجرد مغامرة غير محسوبة؟ إحنا قلنا كبداية ناخد الحاجات العادية فـ طلبناchocolate pot  بـ 80 جنيه، وكان معاه 4 اختيارات اختارنا مارشميلو وموز وكيوي وكور بروفترول.

أول ما وصلت كانت الشوكولاتة باردة للأسف، فـ طلبنا من الجرسون يسخنها وكان طعمها أقرب للشوكولاتة العادية كأننا اشترينا بار شوكولاتة وسيحناه، مش ممتعة أو غنية زي ما متعودين برغم أن المفروض أن نوع الشوكولاتة يكون بلجيكي زي ما قال لنا الجرسون بس قولنا نعديها، وقلنا نجرب المولتين كيك (35 جنيه) وقدم لنا معاه آيس كريم مالتيزر ومكسرات من فوق.

هو شكله كان حلو والشوكولاتة خرجت منه سايحة برضه عادي، لكن للأسف كطعم ما عرفناش ناخد منه أكثر من معلقتين، طعم الشوكولاتة كان جاف جدًا مع مكسرات من فوق وآيس كريم ثقيل غير القهوة اللي فوق الشوكولاتة، كانت تركيبة ثقيلة جدًا وغير مرضية بالمرة، برغم أن الجرسون حاول يصلحها بأنه يجيب لنا آيس كريم فانيليا، بس برضه طعمه كان غير مقبول، ختمنا يومنا بـ 2 شاي في الجو البرد اللي كنا فيه، منهم شاي عادي بالكراميل (15 جنيه)، وشاي بالفراولة (18 جنيه)، وكانت باكيت عادي مافيهوش اختراع.

كنا نتمنى تجربتنا في المكان ده كانت تكون مبهجة أكثر من كده، ونتمنى أنهم يهتموا بطعم وجودة الحاجة زي ما بـ يهتموا بشكلها، لأنها فعلًا هـ تفرق كثير.

نصيحة 360

ممكن تتابعوهم على صفحتهم على الفيسبوك.

أحسن حاجة

شكل المعروضات في الحقيقة وفي المنيو.

أسوأ حاجة

طعم الشوكولاتة وجودتها.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح