The Definitive Guide to Living in the Capital , Cairo , Egypt

كافيهات

جلوريا جينز كوفيز: كافيه روحه حلوة في مول العرب

جلوريا جينز كوفيز: كافيه روحه حلوة في مول العرب

على الرغم من أن الكافيه واخد
زاوية ومساحته بالطول للداخل إلا أنه يجذبك أنك تروح وتجربه وأنت ماشي في مول
العرب قريب من البوابة رقم 22 جنب «بينوس – Beano’s» ، ده غير أن اسم «جلوريا جينز
كوفيز – Gloria Jean’s
Coffees’» غريب واللوجو البرتقالى بتاعه يشدك.

الديكور لونه بني في بيج ووحدات
الإضاءة مبتكرة عبارة عن كذا لمبة مجمعة تحت دائرة كبيرة بيضاء أو بيج، الترابيزات
مدورة صغيرة وفيه جزء كنب وجزء كراسي، والحلو في الكراسي أنها خشب محفور ومفرغ
فيها علامة كوب قهوة، وفيه هناك إنترنت Wi-Fi .

لما قعدنا عرفنا من المنيو أن “جلوريا
جينز كوفيز” من أولى سلاسل القهوة الأسترالية من حيث الحجم والجودة، عندهم
أكثر من 920 محل فى 37 دولة حول العالم، وسميت الشركة اللي عاملة الكافيه باسم
مؤسستها جلوريا جين سنة 1979 فى ولاية شيكاغو الأمريكية.

المنيو مختلفة على شكل كباية قهوة
التيك آواي بتاعتهم ومقسمة لجزءين وبلغتين: اليمين بالعربى والشمال بالإنجليزى، في
البداية معلومات عن بداية الكافيه وتاريخه وإزاي بـ يتم اختيار حبوب القهوة،
وبعدها عناصر المنيو وفيها: مشروبات ساخنة، مشروبات خاصة، شاي سخن، شوكولاتة ساخنة،
مشروبات باردة (قهوة مع الثلج، الإسبريسو الباردة، الموكا الباردة، فروت تشيلرز،
فروت سموذيز، شوكولاتة باردة)، والمشروبات حجمها صغير ووسك وكبير، بالإضافة غلى
الوجبات (مخبوزات، سلطات، سندويتشات وفيه منها بالعيش البانينى، الملفوفات،
والكيش)، إلى جانب قسم الحلوى واللي أغلبه تشيز كيك بأنواع مختلفة إلى جانب أصناف
ثانية.

فيه تنويهات عن عناصر المنيو فى
كل صفحة (لو عاوز المخبوزات روح صفحة كذا.. إلخ) وإعلانات عن المكونات اللي ممكن
تضيفها على قهوتك بجانب الكريمة المخفوقة زي المارشميلو وحبيبات الحلوى المجففة،
وفيه عبوات قهوة من إنتاجهم ممكن تشتريها من عندهم علشان تستمتع بقهوتك في البيت،
وبـ يضاف على طلباتك لما تطلب في الكافيه 12% خدمة و10% ضريبة مبيعات وهى كثيرة
شوية.

طلبنا ساندويتش تركي مدخن (24
جنيه) ونزل معاه بطاطس شيبسي ومخلل، العيش كان حلو قوي رقيق وطازج وكان سخن وسايح
فيه جبنة مع التركي، كمان جربنا كوكو لوكو (حجم صغير 22 جنيه) وهو عبارة عن موكا ولبن
وعليهم كريمة مخفوقة وقطع شوكولاتة فورماسيل، وشوكولاتة بلينديد (حجم صغير 21 جنيه)
الاثنين كان طعمهم حلو قوي لكن القوام بتاعهم كان محتاج يكون سميك عن كده شوية، كمان
ذقنا كريم بورليه (حجم صغير 21 جنيه) وكان فيه كراميل طعمه واضح قوي وهما اللي
رشحوه لنا وكان هائل، في التحلية جبنا كراميل تشيز كيك (24 جنيه) كانت هائلة والجبنة
خفيفة فيها وقوامها مضبوط ده غير كمية صوص الكراميل عليها كان غزير وطعمه حلو قوي.
 

“جلوريا جينز كوفيز” عندهم
أكواب معدنية حافظة للحرارة عليها لوجو واسم الكافيه لو حابب تجيبها، وكمان عندهم
“كارت الضيف الدائم” وهو كارت مخصص لتقدير ضيوف الكافيه، وإحنا بـ ندفع
الحساب ختموا لنا كارت عليه لوجو المحل 3 مرات بعدد المشروبات اللي أخذناها و بـ
تأخذه معاك، وكل مرة لما تروح بـ يحطوا علامات بعدد المشروبات اللي أخذتها، ولما
تكمل عشر علامات (عشرة مشروبات) بـ تأخذ مشروب مجانى من الحجم الوسط من اختيارك.

نصيحة 360

لما تشتري من عندهم الكوب المعدني الحافظ للحرارة هـ تحصل على مشروب مجاني من الحجم الوسط من اختيارك بالإضافة إلى أنك بـ تحصل على علامتين على كارت الضيف الدائم فى كل مرة تقوم فيها بشراء مشروب فى كوبك المعدنى الحافظ للحرارة. كمان عندهم "كارت أعضاء نادي القهوة" من خلاله بـ تحصل على عبوة 200 جرام مجانية من حبوب القهوة المفضلة لك بعد كل عشر مرات شراء عبوة 200 جرام.

أحسن حاجة

الكراميل تشيز كيك وساندويتش التركي – معاملة فريق العمل هناك – وجود Wi-Fi خاصة لو كنت عاوز تخلص شغلك.

أسوأ حاجة

الكنب فى الكافيه محتاج مخدات لأنه مُتعب للظهر شوية - الأسعار في المنيو كانت مكتوبة على ستيكرز وكانت كثيرة قوي في كل الصفحات فشكلها يضايق - صوت الخلاط في المطبخ عالي شوية.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح