The Definitive Guide to Living in the Capital , Cairo , Egypt

بقلم: رنا شرف

في فيلمه الكلاسيكي “آيس كريم في جليم”، نجح الفنان عمرو دياب يحببنا في الآيس كريم حتى في عز البرد.. و لو كنتم من عشاق الآيس كريم بشكل عام، والآيس كريم في الشتاء بشكل خاص، فالموضوع ده علشانكم!

مؤخرًا، روحنا فرع “جيلاتو ميو – Gelato Mio” في المعادي، علشان نجرب المكان، وحقيقي المكان ماخيبش ظننا، جودة عالية، وبيقدم الآيس كريم بشكل جديد ونكهات مختلفة، ده غير ميكسات الشوكولاتة بأنوعها مع الآيس كريم.

جربنا آيس كريم كركديه، وده نوع هيحبه كل عشاق المأكولات الطبيعية، لأنه من غير أي إضافات وبدون سكر، يعني منتج طبيعي 100%، ومناسب جدًا للناس اللي بتحب تاكل صحي، أو اللي بيعملوا دايت وممنوعين من السكريات.

جربنا كمان آيس كريم بالشوكولاتة كيندر والتويكس، ودي أطعمة عظيمة للناس اللي بتحب الشوكولاتة والآيس كريم مع بعض.

جربنا كمان آيس كريم بنكهة الفستق، وده بقى طعمه حكاية، ولو كنت من عشاق الفستق يبقى لازم تجربه.

نيجي بقى للشكل اللى بيتقدم بيه الآيس كريم؛ البسكويت عندهم فيه منه أشكال وألوان ونكهات، زي البلو بيري، ودي بتبقى شكلها أزرق، والريد فيلفت بتبقى أحمر، والفانيليا بتبقى أسود، يعني لو حابب النكهات دي هتقدر تجربها مع أي طعم آيس كريم تحبه.

أما بالنسبة للأسعار، فنقدر نقول إنها معقولة؛ يعني مثلًا البسكويت الكون بيبتدي سعره من 35 جنيه، وده مناسب أكتر للأطفال، والبسكويت الألوان سعره 70 جنيه لو وافيل، والعادي سعره 55    جنيه.

المكان بيوفر كمان علب صغيرة سعرها 60 جنيه، وفيه علب عائلية نص كيلو، ودي مناسبة للمة الحلوة، لأنها بتكفي حوالي 4 أفراد وسعرها بيكون 115 جنيه. أما سعر العلبة الكيلو فبيوصل لـ 215 جنيه.

إحنا روحنا فرع المعادي اللي موجود في شارع 231، دجلة، لكن المكان له فروع تانية، زي فرع الزمالك اللي في 6 شارع البرازيل، وفرع أركان مول في 6 أكتوبر.

والأكيد إننا هنجرب “جيلاتو ميو – Gelato Mio” تاني قريب!